2 Kɔrent 11 - mzwDBL

Pɔɔl ne nɛra baa ɛ ba te kɛ Yeesu toromaa ban wa

¹ N dɛ nyin he lawɛ bambile dɛ́ no n ɡɛnewaa nɔ tama. Soŋaa mɛɛ soŋe heya.

² He waa dɛ we n bwara kɛŋɔ he wa aa dɛ we Korowii nɛɛ la. He do kɛ haah waa wola baa jemɛ bwa, asɛ n kpɔɔ tɛ baa bɛl yal ken. Yeesu Kristo ɡbaɡbaa a ɡɛ baa nɔ, o ɡboo chɛ kɛ ó ɛ he jaa.

³ Kɛ n dɛ ɔmɛ kɛŋɔ Bɔnsam bɛ bɔr ba dɔ che dɛ́ berɛ he liire, ásɛ he bɛ Yeesu Kristo dɛɛ nyin tepoŋ ne kpa, kɛŋɔ waa berɛ harɛkon dɛ kpɔ nyosone neɡre Hawa la.

⁴ Kɛ he dɛ lawɛ bambile dɛɛ no nɛra baa ba he be dɛ baa baɡle Yeesu waa a korɛ waa ya fa aa baɡle heyaa la ta nɔ? Kɛ ba dɛ baɡle kwaa aa dɛ ir nɛra nɛɛ waa a korɛ Korowii Domadɛɛɡe waa soɡe he nɛɛ la ta, kɛɛ ba dɛ baɡle heyaa amanesoma a korɛ anɔ la ya fa aa baɡle heyaa la ta naa, he dɛ lawɛ bambile dɛɛ no ba be nɔ?

⁵ Maa lii kɛ nɛra baa dɛ maŋkura ba te kɛ ba ɡwaa Yeesu Kristo toroma la ɡwaa mɛ ŋwɛnɛ bɛlbwa ta.

⁶ Bɛl lole n nyoa ken ta chaahnɛ wobol ta, kɛ wejema te, n dɔɔ. Wobɛlbwa yaa jema ɡe la, ya ɡelɔ a bini chaah he jemɛ a bwa ŋwɛnɛ bɛlbwa ta.

⁷ N fa aa baɡle heyaa Korowii Amanesoma la, n ta heyaa komɛlbwa sese lɛɛ. Maa pwɛr n te ɡɛ asɛ nɛra siwi ɛɛ su heyaa la, dɛ wechɔɡaa n ɛ aa?

⁸ Maa dɛ ɛ toma he be la, dɛ bobɛl asɔre tenaa dɛɛ bɔ mɛ kem. He nyiŋo na naa, dɛ a kaa ɛ kɛ maa ŋwɛɛ ba, dɛ kpɔ dɛɛ cha heya.

⁹ Gɛ saŋ maa lɔ he be la, suuɡa waa hiah mɛ naa, maa n te kpɔe dɛɛ dawɛ he nɛ. Yabala baa le Makidoonia harɛ ba laanee baa tɛ mɛ kwaa maa dɛ nyin bwa. Gɛ n fa aa wola n te kpɔe dawɛ he nɛɛ wubwa la, ɡɛɛ maa wola n tenee kpɔ dawɛ he nɛɛ saŋ bɛlbwa bwa.

¹⁰ N cheɡɛ Yeesu Kristo kasinteŋ la waa ɡela n dɔ la ta dɛɛ ŋɔ he be ŋɔ, nomɛlbwa toole Akaya harɛ bobɛlbwa dɛ́ tɔ mɛ ŋwɛnɛ maa wola won maŋkura n te a ɡɛ waa nɔ ta.

¹¹ Maa dɛ ŋɔ ken nɔ, a ta ɛɛ kɛŋɔ maa heyaa nyin. Korowii ɡbabir jemɔ kɛŋɔ n dɛ nyin heya.

¹² Waa maa dɛ ɛ nɔ, maa a ɛɛ ɡela ba. Mɛɛ dɛɛ ɛ ɡɛɛ, ásɛ nɛra baa dɛ maŋkura ba te ŋɔ tombeŋkpoŋii ya ne baa ɛ la bɛ won dɔ ŋwɛnɛ dɛɛ maŋkura ba te.

¹³ A ɡɛ nɛra la, Yeesu Kristo toroma ɡbaɡba laa ban. Neɡraa baa neɡre nɛra, dɛ ɛ ba te kɛ Yeesu Kristo toromaa ban la.

¹⁴ A ta nyokpowaa ɛɛ, dɛkalkɛ Bɔnsam ɡbabir won o te beɡra dɛ do kɛ Korowii nyundua torome tenten ken.

¹⁵ Anomanta, dɛ Bɔnsam bonɔɔna ɡe beɡre ba te kɛŋɔ, banee dɛɛ chaɡle ŋwɛnɛ yaa kpɔ o ta dɛ ɛ nɛndɛɛɡa ya waa ɛɛ su Korowii siwi aa, dɛ a ta nyokpowaa ɛɛ. Korowii ɛɛ bɔ ba kemee ɡɛ ba toma aa doa.

Pɔɔl dɛ maŋkura o te kɛ o ɛ Yeesu torome

¹⁶ N dɛ ŋɔ he be ja. Nomɛlbwa bɛ lii kɛŋɔ ɡɛnee men. N ɡɛnɔ ɡba kwara naa, hɛ́ɛ no n be ásɛ n ɡe won maŋkura n te tama.

¹⁷ N jemɔ kɛ waa maa dɛ bol taraken nɔ, ya Dɔɔ Yeesu laa ŋɔa ń bola. Maŋkurae nɔ maa dɛ maŋkura n te nɔ, ɡɛnewaa mɛɛ ɛ la.

¹⁸ Bane aa koh harɛ bonɔ kwara waa dɛɛ maŋkura ba te nomanta, n ɡee maŋkura n tenee.

¹⁹ Haa jemɛ waa kohona nomanta, he dɛ lawɛ bambile, dɛ kpɔ silɛɛ dɛɛ no ɡɛna be.

²⁰ Nɛra kpɔ heyaa berɛ yoma, dɛ neɡre heyaa dɛɛ di, dɛɛ faah heya, dɛɛ nyiŋi he nyu baahna, dɛɛ kpaa he lwɛrɛme, kɛ he waane laa.

²¹ A dɛ ɛɛ mɛ sihiih kɛ n bol waa nɔ. N ta jemɛ kɛ ya berɔ do pwɛre tɛ heyaa to. Ya ta an kɛrɛdɛ ɛɛ. Dɛ nomɛl dɔ wobɛl dɛ won koh a waa maŋkura o te naa, n ɡba ɛɛ wonoo maŋkura n te a ɡɛ waa la ta. Gɛnewaa mɛɛ bol nɔ te.

²² Dɛ Hibru tenaa ban aa, bɛlee n ɡe. Israel tena ɡee ban aa, bɛlee n ɡba. Abraham naanaree ban aa, bɛlee n ɡe.

²³ Yeesu Kristo bonɔɔnaa ban kɛɛ? N dɛ bol choɡla wobol te, kɛ dɛ ba ɛ Yeesu Kristo bonɔɔna aa, n ɛ o bonɔɔ ɡwaa ba! N ɛ toma ɡwaa ba. Ba do mɛ dea ɡwaa ba, dɛ cha mɛ chweremi ɡwaa ba. Waa maa naa a yon ka jɛɛ n sewɛ warɔ.

²⁴ Kera anue bwaa Juu tena cha mɛ ba chweremi fifraatoro dɛ anuanaarɛ la.

²⁵ Kera atoroo Rom tena lɔɔ mɛ chweremi ne, dɛ foɡ mɛ bwea kera beŋkpoŋ. Kera atoroo stiimae morɛ n ne. N lɔ nee siebɔr bir dɛ chaah, dɛ kwaa bir a ɡɛ stiimae mora nɔ bɛl ta.

²⁶ N ɡaaɡebala nɔ ta la, neerare suuɡo dɛ tɔ mɛ do, n do siswɛm ta ka, asɛ ŋwɛɛra baa dɛ kpo nɛra dɛɛ kpɔ ba laala ɡe fe ɛɛ nyin n kpoe. N bala Juu tena ne nɛra baa wola Juu tena ɛɛ bwa ɡe cheɡɛ n nɛɛ dɛ fe ɛɛ nyin n kpoe. Bwɛjena ta ne kpɔɡ baah ne mpo ta bwaa n na sibeɡrewa. N na sibeɡrewaa nɛra baa wola asɔre tena kpelakpela ɛɛ be.

²⁷ N ɛ toma dɛ koh kɛrɛdɛ. A kɛrɛdɛ ta, dɛ maa dom chɔ. Lɔr ne nyɔɡre ɡe kpo mɛ kɛrɛdɛ. N vala kɛrɛdɛ ta, dɛ teloɡaa mɛɛ chɔ, dɛ busee mɛɛ chɔ, dɛɛ chɔ waa.

²⁸ Anɔ te bwa chɔ keŋkeŋ. Maa won baɡle a bwa. Waa aa lɔ n bini dɛɛ swɛɛ n siwi laanee kɛŋɔ, asɔre tena baa lɔ bobɛlbwa la waa dɛɛ ha mɛ tɔpere te bwa.

²⁹ Asɔre tena la bɛlbwa sɔɔhnaa, dɛ n ɡbabir bwara yɔrɔ. Dɛ Bɔnsam neɡre bɛlbwa kaa wechɔɡa ta naa, dɛ a ɛɛ mɛ bandia.

³⁰ Dɛ mɛɛ maŋkura n tenee yaa, waa aa dɛ chaɡle kɛ n ɛ nɛŋɡwɛɡre la taa mɛɛ ba n te maŋkurae.

³¹ Ya Dɔɔ Yeesu Mɛɛ Korowii jemɔ kɛ nyosone laa mɛɛ teŋe. O chɛ kpɛɛra saŋ bɛlbwa.

³² Maa lɔ bwɛjen Damaskɔs la, bwɛɛ la nomoa waa lɔ Kooro Aretas lɔɡa le nɛra ŋɔ báa daah doonyoone aa lɔ danjwɛɛ waa bar bwɛɛ la bwa cheme ta la, ásɛ dɛ laɡ mɛ.

³³ Aa ba ɡɛ la, n daamanar bane do mɛ wɛɡrɛjen bini dɛ do ŋwɛn o ta kɛŋɔ baa dɛ ta kɔlɔŋ ken, dɛ che danjwɛɛ la tokoro bɛl ta dɛ kpɔ mɛ tu dahara, asɛ n le o nɔn ta.