2 Kɔrent 10 - mzwDBL

Gɛ Pɔɔl aa baɡle o toma wa

¹ Men Pɔɔl, n dɛ soŋe heya. Ba ŋɔ n lɔ he be naa, n pwɛre, kɛ n le he be te naa, n waa kpeɡri. N dɛ soŋe heyaa kɛŋɔ hé nyiŋi ɡɛ Yeesu Kristo aa pwɛra o tea do som la,

² ásɛ dɛ no n be. Mɛɛ baɡle kpeɡri nɛra baa dɛ lii kɛŋɔ harɛ bonɔ waa ŋwɛnɛre taa ya teŋɛ dɛɛ ɛ ya waa la nɛɛ. Maa nyin kɛ n baɡle a ɡɛ kpeɡri la he nɛ.

³ A ɛ kasinteŋ kɛŋɔ harɛ bonɔɔ ya so. Kɛ harɛ bonɔ laa laa yaa yo.

⁴ Dɔmkwaa yaa dɛ yo a ne la, nɛwɛnyina kwaa laa. A ɛ Korowii dɔmkwaa o kpeɡri aa lɔ a ta, asɛ ya kpɔ dɛɛ paɡre dekpeɡa.

⁵ Nɛwɛnyina wejema baa dɛ maŋkuraa dɛɛ tɔŋle waa la, a ne webaɡla baa dɛ maŋkuraa kohona dɛɛ tɔŋle waa asɛ nɛra jemɛ Korowii kahonɛ la do kɛ dekpeɡa yaa dɛ ba wona paɡre la. Ya berɔ dɔ kpeɡri dɛ won berɛ nomɛlbwa liire, asɛ ba no Yeesu Kristo be.

⁶ N kpɔ n te dɛ so dɛɛ kpa, ásɛ he te dɔɔ ba no n be ka tonaa, n tɛr nɛra baa vɛah la deŋne.

⁷ Haa waa kari kɛɛ? Nomɛlbwa dɛ lii kɛ o ɛ Yeesu Kristo nɛn aa, ó jemɛ kɛŋɔ ɡɛ waa ɛ Yeesu Kristo nɛn la, ɡɛɛ ya ɡe ɛ Yeesu nɛra.

⁸ Dɛ n dɛ maŋkura kpeɡri ya Dɔɔ aa tɛ yaa ŋɔ yá kpɔ dɛɛ cha heyaa la aa, sihiih aa men kpo. O tɛ mɛ kpeɡri ń won cha heya. O ta men kpeɡri tɛɛ ń kpɔ chɔɡ heya.

⁹ Maa nyin kɛ a ɛ kɛŋɔ aahraa n kpɔ tɔne dɛɛ aah heya.

¹⁰ Bane ɛɛ ŋɔɔ, “Pɔɔl tɔne nyoa kpeɡri to. Kɛ he na o ɡbaɡba aa, waa kpeɡe. O wobol ɡba ta wale dɔe.”

¹¹ A ɡɛ tena nɔ, a chɛ kɛ ba jemɛ kɛŋɔ ya toole he be naa, waa yaa chwera dɛɛ ha heyaa ta korɛ, asɛ waa yaa lɔ he be dɛɛ ɛ ɡe korɛ.

¹² Yanee bamewa ya kpɔ ya te maɡɛ nɛra baa dɛ lii ba te nɛnjena ɔ? Yaa ya nyu kpɔe dɛɛ bɔ ba. Ba yon nyiŋi ba bala we-ɛɛla dɛ kpɔ maɡɛ ba kwaa dɛ ŋɔ ba kwaa toɡrɔ. Ba ɡɛnɔ te!

¹³ Waa aa wola toole anɔ la Korowii aa ɡela yaa ɛ ta la, ya te aa anee kpɔ maŋkura ya te. Anɔ la bwa waa maɡa tɛ yaa la, a ɡbo taa yaa ba ya te maŋkurae. Toma yaa dɛ ɛ he be la ɡba ja anɔ la waa tɛ yaa la ta.

¹⁴ He be bala ja ya toma ta. Yaa ba he be la, dɛ ya ta ɛɛ ka ɡarɛ. Yaa kpɔ Yeesu Kristo Amanesoma la ba he be la, dɛ ya ta ɛɛ ka ɡarɛ ya toma jaɡa.

¹⁵ Yaa nyin kɛ ya ɡarɛ bela Korowii aa maɡa tɛ yaa. Toma yaa ɛa la, anee ya kpɔ dɛɛ maŋkura ya te. Toma nɛra bane aa ɛa la, yaa an kpɔe dɛɛ maŋkura ya te. Ya dɔ hwɛɡa kɛ he yarada ɛɛ kaa siee, ásɛ toma yaa dɛ ɛ he bini la ɛɛ ja dɛ kaa sie.

¹⁶ A taa yaa ba wona bol Amanesoma la harɛre aa lɔ sie la ta, ásɛ dɛ bɛ waa nɛra bane aa ɛa kpɔ maŋkura ya te.

¹⁷ Anee ba chwerɛ Korowii Tɔn bini la. “Nomɛlbwa waa dɛ nyin o te maŋkurae la, wɛɛ maŋkura o te waa Korowii aa ɛa ta.”

¹⁸ Naate waa dɛ kpɛɛ o te la, o laa nɛndɛɛɡe. Naate Korowii aa dɛ kpɛɛro la, onee nɛndɛɛɡe.