1 Webena 5 - mzwDBL

Rubin naanar

¹ Jekɔb binomoa sɔne Rubin, dɛ onee biloɡle, kɛ waa lawɛ o mɛɛ haah chɔ la nomanta, ba laa o nomonome lɛ o be tɛ o nime Josef. A ɡɛ nomanta, o sɔn toole ɡɛ baa lol ba teŋɛ dɔŋa nɛɛ la ta.

² Dɛ Juda dea tena dɔ kpeɡri ɡwaa deene la bwa. Kooro le bela dɛ tɛ deene la bwa, a lole kɛŋɔ dɛ Josef dea fe dɔ kpeɡri kɛ biloɡle.

³ Rubin waa ɛ Jekɔb binomoa la bibaala waa lol ba laanee, Hanɔk ne Palu ne Hɛsrɔn dɛ Kaami.

⁴ Joel bie ne o naanar ɡee nɔ, Onee lolɛ Sɛmaya, Sɛmaya lolɛ Gɔɡ, Gɔɡ lolɛ Simee,

⁵ Simee lolɛ Maeka, Maeka lolɛ Reaya, Reaya ɡe lolɛ Baal,

⁶ Baal lolɛ Beera. A ɡɛ Beera nɔɔ Asiiria koojen Tiɡlat Pilesa lawɛ laa ta kaa harɛfale ta la. Dɛ onee Rubin dea tena sitɔɔ.

⁷ Kenii ba chwerɛ Rubin dea nomonome lolanar ba teŋɛ dɔŋa nɛ. Jeyɛl waa ɛ ba sitɔɔ ne Sekaria,

⁸ ne Asas bibaa Bɛla, Sema bibaa Asas, dɛ Sema bibaa Joel. Dɛ ba soɡo le harɛ waa le Arowa, dɛ kpoŋe ba le Nɛbo ne Baal Meɔn.

⁹ Harɛ la wee leebɔr, ba soɡo ka le pua hɛŋle ɡbo harɛ ta dɛ kaa Yufretis Moo ta, dɛkalkɛ dɛ ba kondɛɛra yao Gelead harɛ ta.

¹⁰ Kooro Sɔɔl bere saŋ la, ba kaa yo Haɡri tena laa dɛ kpoo ba, dɛ kpɔ ba harɛ waa lɔ Gelead wee leebɔr pera la so.

Gad dea tena

¹¹ Gad dea tena ɡe soɡo teŋɛ ba nɛ Basan harɛ ta, dɛ kpoŋe ka le bwɛɛ bɛl baa dɛ yerɔ Saleka.

¹² Joel ɛ ba sitɔɔ, asɛ Safam teŋɛ, asɛ Janai ne Safat ɡe ja ba bwa so Basan harɛ ta.

¹³ Ba lola bini, ɡɛ baa teŋɛ dɔŋa nɛɛ laanee, Maekel ne Mɛsolam ne Seeba ne Jorai ne Jakan ne Siia dɛ Iba. Ba lɔ nɛra banuanɛ.

¹⁴ Dɛ ba ɛ Huri bibaa Abihel bibaala, Jaroa bibaa Huri ne Jaroa bibaa Gelead, ne Gelead bibaa Maekel ne Maekel bibaa Jesisai, ne Jesisai bibaa Jado, dɛ Jado bibaa ne Bus,

¹⁵ ne Abdeɛl bibaa Ahi, o naa ɛ Guni la, onee ɛ nomonnyu dɛ chɔ ba nyoa.

¹⁶ Dɛ Gad tena soɡe Gelead ne Basan harɛre ta ne bwɛɛre aa bara bwa, dɛ kondɛɛra dibɔra aa chɔa dɛ kaa dɛ do Sarɔn bwa.

¹⁷ Ba chwerɛ ɡɛ naanar nɔ bwa sɔna, ɡɛ saŋ Juda Kooro Jotam aa di kora, ne Israel Kooro Jɛroboam waa teŋa nɛɛ aa di kora.

¹⁸ Rubin ne Gad dɛ Manasɛ dea pera tena lɔ baala kaɡboŋa fifraanaarɛ dɛ banaarɛ, lafraanuanɛ fifraanumɛl baa dɛ ba wona yo laa. Ba ɛ baala baa dɛ ba wona kpoŋe kwaa baa kpɔa dɛɛ tɔ ɡbemɡbe, dɛɛ yo laa ne keri ne tori, dɛ dɔ laa yoi wejema.

¹⁹ Ba kaa yo Haɡri ne Jetur ne Nafis dɛ Nɔdab tena bwa.

²⁰ Korowii cha ba dɛ ɡel ba pɔ ba nɛ, dɛ kpɔ Haɡri tena ne nɛra baa ja ba nɛɛ bwa do ba nɔn ta, dɛkalkɛ laa la ta la, ba wio no Korowii.

²¹ Ba lawɛ Haɡri tena kondɛɛra bwa kaa. Nyoɡmare lɔ kaɡboŋa fifraanue, ne peera kaɡboŋa lafraanɛ fifraanue, dɛ keeɡore kaɡboŋa anɛ. Ba lawɛ nɛra kaɡboŋa lafa laa la ta,

²² asɛ dɛ kpoo nɛra baa wara keri ne, dɛkalkɛ dɛ Korowiirii yoa dɛɛ tɛɛ ba. Ate, ba so harɛ la ta ka tel kɛŋɔ baa laɡ ba kaa harɛfale ta.

Manasɛ dea pera nɛra

²³ Manasɛ dea pera tena la warɔ, dɛ so le Basan harɛ ta, dɛ kpoŋe kaa Baal Hɛmɔn ne Senir, dɛ Hɛmɔn Bwejen ta.

²⁴ Nomonnyuune baa chɔ ba nyoo laanee, Efar ne Isi ne Eliel, ne Asriel ne Jeremia ne Hodavia dɛ Jadiel. Dɛ ba ɛ nomonnyuune, dɛ ɛ banyoola dɛ berɛ dɔ sɔna kɛrɛdɛ.

²⁵ Kɛ dɛ ba waa ta kasinteŋ dɔe Korowii ba naawa aa tomɔ la be, dɛ ɡelo kaa tomɛ nɛra Korowii aa doŋa ba siwi ta voɡare.

²⁶ Anomanta, Korowii Israel tena aa dɛ tomɔ ɡelɔ Asiiria koojen Pul baa bera dɛɛ yerɔ Tiɡlat Pilesa ka yoo ba, dɛ lawɛ Rubin ne Gad dea, dɛ Manasɛ dea pera tena bwa laa ta kaa harɛfale ta. O kaa bane Hala ne Habɔ ne Hara dɛ Gosan Moo ta. Ba lɔ bela dɛ ba le fini.