1 Webena 29 - mzwDBL

Koŋkɛɛla baa kpɔ ma Korowii Dea

¹ Kooro Devid ŋɔ nɛra baa cheme bela la bwa be ŋɔ, “N bie Solomɔn Korowii aa leo la nɔn ta kao, waa wola wobɛlbwa jemɛ mɔɔ. Toma la kan, dɛkalkɛ Dea waa dɛ ba doe la ɛ Korowii kon, o ta nɛwɛnyini kon ɛɛ.

² N takapɔ nyin laala baa kpɔ do Korowii maa dɛ tomɔ Dea la. N dɔ suuɡaswɛm ne suuɡapoŋa ne ayaawa ne bune ne daa, ne bwedɛɛɡa ane a yoɡ aa kpeɡa baa yera onis ne tɛɛkoes, dɛ bwea bwa soo siwi, a warɔ kɛrɛdɛ.

³ Anɔ bwa habɔɔ, maa dɛ nyin Korowii Dea la kɛrɛdɛ nomanta, n berɔ kpɔ n ɡbaɡba suuɡaswɛm ne suuɡapoŋa dɛɛ tɛ bá kpɔ ɛ o toma.

⁴ Suuɡaswɛm tenten a tɔɡre aa ɛ kilore kaɡboŋa lafa dɛ anɛ, ne suuɡapoŋa aa wera kɛrɛdɛ a tɔɡre aa ɛ kilore kaɡboŋa lafraanɛ fifraatoro dɛ anuatoro, n kpɔ tɛ bá ɛa dawɛ o danjwɛɛ ta,

⁵ ne anɔ la aa jaa bwa nɛra baa dɔ a wejema aa kpɔ ɛ toma bwa. Umee dɛɛ nyin ó le o bambile bini, dɛ́ tɛ kwaa bá kpɔ ɛ Korowii toma fini nɔ?”

⁶ Belaa nomonnyuune ne Israel deene nomonome ne laa sitɔɔla baa chɔ laa tena kaɡboŋa ne lafare nyoo, dɛ kooro nomonome baa chɔ o tomare nyoo bwa, le ba bambile ta, dɛ kpɔ kwaa kɛ bá kpɔ ɛ Korowii Dea la toma.

⁷ Kwaa kɛŋɔ suuɡaswɛm a tɔɡre aa ɡwaa kilore kaɡboŋa lafa fifraanuanɛ, ne suuɡapoŋa a tɔɡre aa ɛ kilore kaɡboŋa lafraatoro fifraanaarɛ, ne ayaawa a tɔɡre aa ɛ kilore kaɡboŋa lafraanumɛl dɛ fi dɛ anɛ, dɛ bune a ɡe tɔɡre aa ɛ kilore kaɡboŋ bele kaɡboŋa atoro, dɛ kaɡboŋa lafraanaarɛ.

⁸ Nɛra baa dɔ bwedɛɛɡa a yoɡ aa kpeɡa la kpɔa ba tɛ nɛn waa dɛ nyiŋi Korowii Dea laala ta baa yerɔ Jehiel waa le Gɛsɔn dea.

⁹ Nɛra la bwa sie lɛ ɡɛ ba nomonome la aa le ba bambile ta dɛ tɛ kwaa la, Kooro Devid ɡe sie lɛo kɛrɛdɛ.

Kooro Devid Korowii kpɛɛra

¹⁰ Kooro Devid kpɛɛ Korowii nɛra la bwa sie dɛ ŋɔ, “N Naa Korowii ya naa Jekɔb aa tomɛ, henee chɛ kɛ ya kpɛɛ saŋ bɛlbwa dɛɛ la.

¹¹ Henee kana dɛ do kpeɡri, dɛ dɔ jirima dɛ dɔ sɔn kohona, dɛkalkɛ kwaa aa lɔ nyundua ne harɛ bwa ɛ he kwa. Henee dɛɛ di kora, dɛ ɡwaa nomɛlbwa.

¹² Kondɔɔh ne jirima bwa le he be, dɛɛ di kpeɡri komɛlbwa nɛ. He bee kpeɡri ne bokpeɡa le, he ɡɔɔ nɛra dɛɛ tɛɛ ba kpeɡri.

¹³ N Naa Korowii yaa dɛ tomɛ, ya dɛ jaame, dɛɛ kpɛɛ he sɔnjen la.

¹⁴ Menee ume, n ne n nɛra nɔ bwa, kɛŋɔ ya ɡe won dɔ kwaa nɔ bwa dɔŋa ŋɔ ya kpɔɔ dɛɛ kɛɛ nɔ? Anɔ bwa yaa dɔa le he be laanee ya berɛ kpɔ baa tɛɛ la.

¹⁵ Ya ɛ hɔɔhra he sie kɛŋɔ ya naawa bwa fa aa ɛa la. Ya tɔpera yaa di harɛ nɔ ta do kɛŋɔ lileo, tamaa ken dɛ o kaalɔ la ken. Ya ta hwɛɡa bɛlbwa dɔe.

¹⁶ N Naa Korowii yaa dɛ tomɛ, he sɔn waa do ɡoroŋ la waa ya kpɔ kondamanta nɔ bwa tɛ ŋɔ bá kpɔ do he Dea, he bee a bwa le, henee dɔ a bwa.

¹⁷ N jemɔ kɛŋɔ bambile binii hɛɛ nyiŋi, he sie ɛɛ lɛ nɛra ba wa aa toɡra ta. Anɔ bwa, n ta n bambile dɛ kpɔ tɛɛ. N berɔ na silɛɛ he nɛra baa lɔ bonɔ ɡe aa dɔa, dɛ le ba bambile ta, dɛ kpɔ kwaa ba tɛɛ.

¹⁸ N Naa Korowii, ya naa Abraham ne Aesek dɛ Jekɔb aa tomɛ, ɡel ɡɛ nyina nɔ do he nɛra bambile ta saŋ bɛlbwa dɛɛ la, asɛ ba waa dɔ kasinteŋ tɛ he ɡbo.

¹⁹ Gel n bie Solomɔn kpɔ o bambile bwa dɛɛ teŋɛ wobɛlbwa haa doo ta, ó won ma Korowii Dea maa kpɔ o laala tɛo nɔ.”

²⁰ Belaa Kooro Devid ŋɔ nɛra la bwa be ŋɔ, “Hé kpɛɛ Korowii haa dɛ tomɔ.” Anomanta, ba kpɛɛ Korowii ba naawa aa tomɔ, dɛ chole kpɔ sie pi harɛ Korowii ne kooro sie.

²¹ Tɔ aa pera la, ba fuh kwaa ɛ saraha tɛ Korowii saraha kon la ta. Nabala kaɡboŋ ne pebala kaɡboŋ ne pebali kaɡboŋ, dɛ kpɔ sen saraha, dɛ sarahare aa wara ja a ta tɛ Israel tena bwa.

²² Ba di saraha kwaa la, dɛ nyɔ sen lɛ ba sie kohona Korowii sie awola. Belaa ba lɛ Solomɔn waa ɛ Kooro Devid bibaa do nɛɛtena kɛŋɔ kooro, dɛ fuɡe noo do o nyu ta Korowii sie, dɛ cheɡo kora ta, dɛ fuɡe noo do Sadɔk nyu ta o ɡe ɛ sɔfo.

²³ Gɛɛ Kooro Solomɔn ba so kora Korowii aa cheɡo ta, o chiɡ o mɛɛ Kooro Devid naa ta. O wobɛlbwa wer tɛo, Israel tena bwa kpɔ duure tɛo.

²⁴ Nomonome la bwa ne banyoola, dɛ Kooro Devid bibaala bwa sɛoh, dɛ kpɔ ba te do Kooro Solomɔn lɔɡa dɛɛ tomɔ.

²⁵ Korowii ɡɔɔ Kooro Solomɔn Israel tena bwa sie, dɛ tɛo jirima kohona Israel harɛ ta kooro bɛlbwa aa wola a dɔŋ dɔe.

Kooro Devid seo wa

²⁶ Jese bibaa Devid di kora Israel harɛ ta bwa.

²⁷ O di kora Israel harɛ bene fifraanaarɛ. Hɛbrɔn lɔ bene anuanɛ, asɛ bene fifraatoro dɛ atoro ɡe Jerusalam.

²⁸ O biɡro kɛrɛdɛ mɔɔ dɛ ba sewɛ, dɛ o dɔ kondɔɔh ne jirima kɛrɛdɛ, asɛ o bibaa Solomɔn chiɡ o naa ta, dɛ di kora.

²⁹ Ba chwerɛ Kooro Devid kora dii le mumpar dɛ ba a jaɡa, do Korowii keamere Samoɛl ne Netan dɛ Gad waa tɔne bini,

³⁰ ne ɡɛ waa di kora dɛ di kpeɡri, dɛ waa bwa aa chiɡa o bere saŋ, dɛ Israel harɛ ta waa ne harɛre ane ɡe ta waa bwa.