1 Webena 28 - mzwDBL

Kooro Devid baɡle ɡɛ baa ma Korowii Dea

¹ Kooro Devid yerɛ Israel nomonome la bwa cheme Jerusalam. Nomonome baa chɔ Israel deene nyoo ne nomonome baa chɔ kooro tomare nyoo, ne sitɔɔla baa chɔ laa tena kaɡboŋa ne lafare nyoo, ne nomonome baa chɔ kooro bibaala ne o laala ne kondɛɛre nyoo, ne koodem nomonome dɛ banyoola bwa.

² Ate, Kooro Devid ir che dɛ ŋɔ, “Hé no n be, bwɛɛla. N liiro ŋɔ a chɛ kɛ ń do dea dɛ́ kpɔ Korowii Ne Nɛwɛnyina Fɔo Daka la ba cheɡ o bini, ó ɛ Korowii natiɡribɔr. Asɛ dɛ baɡle ɡɛ baa mao.

³ Kɛ Korowii ŋɔ n be ŋɔ n laa dɛ́ do Dea tɛo, n yo laa dɛ kpoo nɛra kohona.

⁴ Kɛ ane a bwa, Korowii Israel tena aa dɛ tomɔ le n ne n naanar kɛ, yá ɛ Israel harɛ koranar saŋ bɛlbwa dɛɛ la. O le nomoa le Juda dea tena bini, dɛ le nomoa le n mɛɛ wa luɡe waa le Juda. N mɛɛ bibaala bwa bini ɡe menee o bambile lawɛ, dɛ cheɡ mɛ kora Israel harɛ bwa.

⁵ Korowii tɛ mɛ bibaala warɛ taeh, o le Solomɔn ba bini ŋɔ ó so Israel kora waa ɛ Korowii kon ta.

⁶ O berɔ ŋɔ n be ŋɔ, ‘He bie Solomɔn, onee dɛ́ do n Dea ne a dembaahna bwa tɛ mɛ, dɛkalkɛ n leo dɛ kpɔɔ ɛ n bie, o ɡe kpɔ mɛ ɛ o mɛɛ.

⁷ Mɛɛ ɡeloo o kora che kiŋkiŋ saŋ bɛlbwa dɛɛ la, dɛ o sɛoh dɛɛ teŋɛ me Mmarare ne waa maa kpɔa tɛo bwa ta, ɡɛ aa lole fini nɔ ta naa.’

⁸ Anomanta, n dɛ ŋɔ he be Korowii yaa dɛ tomɔ ne o nɛra Israel tena bwa siwi ta kɛŋɔ, hé nyiŋi kɛrɛdɛ dɛɛ teŋɛ Korowii yaa dɛ tomɛ nɔ mmarare ne waa maa kpɔa tɛ heyaa bwa ta, ásɛ dɛ won dɔ harɛdɛɛɡe nɔ, hale he naanar bwa ɡe bá dɔ ɛ ba kon saŋ bɛlbwa dɛɛ la.”

⁹ Kooro Devid berɔ ŋɔ, “N bie Solomɔn, kpɔ he te do Korowii he naawa aa dɛ tomɔ la lɔɡa, dɛ́ tomɔ he bambile ne liire bwa ne. Korowii dɛ nyiŋi bambile bini dɛ jemɛ liire bɛlbwa. He kpɔ he te tɛo waa, hɛɛ nao, kɛ dɛ he berɛ habɔɔ kpoo tenaa, o ɡe ɛɛ vɛɛh saŋ bɛlbwa dɛɛ la.

¹⁰ Jemɛ kɛŋɔ henee Korowii le ŋɔ he do o Dea tɛo. Gel he siwi beɡre dɛ́ ɛ ɡɛ waa doe la bwa.”

¹¹ Ate, Kooro Devid kpɔ ɡɛ baa ma dea la pato ne o bini deene, ne deene baa cheɡ laala a yoɡ aa kpeɡa bini, ne nyundua deene ne o bini deene, dɛ bela baa kpɔ nɛra wechɔɡa la Korowii be kaa soŋe, ó kpɔ kɛ ba tɛo.

¹² O kpɔ ɡɛ dea la mar aa dɛ ba doe tɛo ɡɛ Korowii Doma la aa kpɔa do o liire bini. O dembaahna ne deene aa baro baa kpɔ laala a yoɡ aa kpeɡa, ne koŋkɛɛla baa kpɔa baa tɛ Korowii dɛɛ cheɡ a bini bwa.

¹³ O baɡ ba ɡɛ baa le sɔfore ne Lewi dea tena baa ba ɛ toma Dea la bini bwa, dɛɛ nyiŋi loɡa baa kpɔ dɛɛ ɛ toma o bini bwa ɡe ta.

¹⁴ O baɡle ɡɛ baa kpɔ suuɡapoŋa ne suuɡaswɛm baa kpɔ kwaa loɡa baa kpɔ dɛɛ ɛ tomare Dea la bini.

¹⁵ Suuɡaswɛm baa kpɔ kwaa kandea daa la ne o kandere, ɡɛ aa chɛ kɛ a bɛlbwa tɔɡre do, ne suuɡapoŋa baa kpɔ kwaa kandea daa ne o kandere, ɡɛ aa chɛ kɛ a bɛlbwa tɔɡre do, ne ɡɛ baa kpɔ kandea bɛlbwa dɛɛ ɛ toma,

¹⁶ ne suuɡaswɛm tenten baa kpɔ kwaa teebur bɛlbwa baa kpɔ paanoo baa lea cheɡ tɛ Korowii aa do ɡoroŋ dɛɛ dawɛ a ta ne a tɔɡre, ne suuɡapoŋa baa kpɔ kwaa teeburre ne a tɔɡre,

¹⁷ ne suuɡaswɛm tenten baa kpɔ ɛ bune baa kpɔa dɛɛ toh ola, ne loɡa baa do nee kɛɛ chal a bini dɛ ɛ dɛɛ merɛ kwaa ta, ne viine, ne suuɡaswɛm baa kpɔ kwaa loɡ bɛlbwa, dɛ suuɡapoŋ baa kpɔ kwaa loɡ bɛlbwa ne a tɔɡre,

¹⁸ ne suuɡaswɛm tenten baa kpɔ ɛ kon baa dɛɛ fuh daawiile a sɔɔh aa soma o ta ne a tɔɡre. Kooro Devid kpɔ kon waa do kɛ torɔɡo baa kpɔ Kerobim baa kpɔ suuɡaswɛm tenten ɛa, a paɡri kena tɔ Korowii Ne Nɛwɛnyina Fɔo Daka la ta ne a tɔɡre ɡe baɡlo.

¹⁹ Kooro Devid ŋɔ, “Anɔ bwa, Korowiirii tɛ mɛ ɡɛ o Dea la mar aa doa wejema, n won no a mun, dɛ chwera bil.”

²⁰ Kooro Devid berɔ ŋɔ o bie Solomɔn be ŋɔ, “Dɔ bambile dɛ́ che kiŋkiŋ, dɛ́ ɛ toma la. Dɛɛ berɛ ɔma, Korowii maa dɛ tomɛ la ja he nɛ. Waa he habɔɔ le bwa ka tel kɛŋɔ Dea la toma bɛlbwa aa tona.

²¹ Sɔfore ne Lewi dea tena la baa kpɔ tomare do ba nɔɔra ta dɛ kpa, dɛ́ ɛ toma Korowii Dea bela. Nomɛlbwa ɡe aa le o bambile ta o dɔ wejema bwa soo siwi toma ɛɛ ta la ɛɛ bao, dɛ́ ba chae toma la ta. Nomonome la ne nɛra la bwa ɛɛ no wobɛlbwa haa bol ba be laanee.”