1 Webena 26 - mzwDBL

Nɛra baa dɛ daah Korowii Dea doonyoa

¹ Kenii ba bɔne nɛra baa dɛɛ daah Korowii Dea doonyoa la bini. Kora dea bini la, Kore bibaa Mɛselemea, o ɛ Asaf naa.

² Mɛselemea ɡe bibaalaa, Sekariaa biloɡle, Jedial waa teŋa nɛɛ, Sebadia teŋɛ tooro, Jatneɛl teŋɛ naarɛ.

³ Elam teŋɛ nue, Jehohanan teŋɛ anumɛl, Eliehonai teŋɛ anuanɛ.

⁴ Ɔbɛd Edom ɡe bibaalaa, Sɛmayaa biloɡle, Jehosabad teŋɛ nɛɛ, Joa teŋɛ tooro, Saka teŋɛ naarɛ, asɛ Nɛtanɛl teŋɛ nue.

⁵ Ameɛl teŋɛ numɛl, Isaaka teŋɛ nuanɛ, asɛ Peuletai teŋɛ nuatoro. Dɛ Korowii swee Ɔbɛd Edom andɛɛɡa.

⁶ O bibaa Sɛmaya ɡe lolɛ bibaala ba ɛ nomonome ba mɛɛ dem, dɛkalkɛ dɛ ba dɔ ba te.

⁷ Sɛmaya bibaalaa, Otni ne Refaɛl ne Ɔbɛd dɛ Ɛlsabad. Dɛ o lolanaree, Elihu ne Sɛmakia, dɛ ba ɡe dɔ ba te.

⁸ Ɔbɛd Edom naanaree a ɡɛ nɛra nɔ bwa, dɛ ba ne ba bibaala ne ba lolanar dɔ ba te, dɛ dɔ bokpeɡa dɛɛ ɛ toma la. O naanar lɔ nɛra fifraanumɛl dɛ banɛ.

⁹ Mɛselemea dɔ bibaala ne lolanar baa dɔ ba te kɛrɛdɛ. Ba lɔ nɛra fi dɛ banuatoro.

¹⁰ Hosa waa ɛ Merari te bibaalaa, Simri, onee o mɛɛ leo binomoa, kɛ dɛ o laa fe,

¹¹ asɛ Hilkia teŋɛ nɛɛ, Tabalia teŋɛ tooro, asɛ Sekaria teŋɛ naarɛ. Hosa bibaala ne o lolanar bwa lɔ nɛra fi dɛ batoro.

¹² Ba bɔne nɛra baa dɛ daah Korowii Dea doonyoa la kuore ta. Ba dɔ ba nomonome baa nyiŋi ba nɛɛ toma baa kpɔa tɛɛ ba ta bela, ɡɛ ba lolanar baa tɔ sie faa ɛa la.

¹³ Doonyoa bɛlbwa ta la, ba bil daa lolanar bɛlbwa bini, le bechale nɛɛ ba nomonome nɛ, dɛ jemɛ onɔ la waa nyiŋi o ta.

¹⁴ Wee leebɔr doonyoa la lawɛ Sɛlɛmia, asɛ o bibaa Sekaria waa dɛ ja nɛra la, weekaŋle nyundua doonyoa lawɛ o ɡe.

¹⁵ Weekaŋle harɛbɔr doonyoa kon lawɛ Ɔbɛd Edom, asɛ dea baa dɛ cheɡ laala a yoɡ aa kpeɡa o bini kon lawɛ o bibaala ɡe.

¹⁶ Wee cholibɔr doonyoa kon, ne Saleket Doonyoa waa lɔ ŋwɛnɛ waa chɔ dea la nyunduabɔr la ɡe lawɛ Supim ne Hosa. Ba bɔne tɔpera tɛ bɛlbwa ba la kaa daahna.

¹⁷ Tɔpebeŋkpoŋ bɛlbwa, Lewi dea nɛra banumɛl lɔ wee leebɔr doonyoa la ta, banaarɛ do o weekaŋle nyunduabɔr, banaarɛ do o weekaŋle harɛbɔr, asɛ ba nɛra banɛnɛ ɡe pɛ dɛɛ so dea baa dɛ cheɡ laala a yoɡ aa kpeɡa o bini la doonyoa.

¹⁸ Wee cholibɔr dembaah la ta te, nɛra banaarɛ dɛ daah ŋwɛnɛ waa chɔ bela, asɛ banɛ do dembaah bela tenten.

¹⁹ Gɛɛ ba bɔne Kora ne Merari naanar bini, dɛ kpɔ do ba nɔn ta ŋɔ baa daah doonyoa bela.

Korowii Dea la tomare ane ɡe

²⁰ Ba bala Lewi dea tenaa chɔ laala aa lɔ Korowii Dea bela ne deene baa dɛ cheɡ laala a yoɡ aa kpeɡa a bini, ne anɔ la baa kpɔa baa tɛ Korowii la bwa nyoa.

²¹ Ladan ɛ Gɛsɔn tena la bini bɛl, o naanar warɔ taeh. O bibaa Jehieli bibaala ne naanar ɡe jao.

²² Ladan bibaala banɛ Sɛtam ne Joel, dɛ ba ɡee chɔ laala aa lɔ Korowii Dea, ne deene baa dɛ cheɡ laala a yoɡ aa kpeɡa a bini la nyoa.

²³ Amram naanar, ne Isiha naanar, ne Hɛbrɔn naanar dɛ Usiel naanar dɔ toma baa kpɔa do ba nɔn ta.

²⁴ Subael waa ɛ Mosis bibaa Gɛɛsɔm naa laanee chɔ nɛra baa dɛ daah laala la nyoa.

²⁵ A cheɡɛ o lole Eliesa nɛ o ne Sɛlomet ɛɛ di lola. Eliesaa lolɛ Rehabia, o ɡe lolɛ Jesaya, Jesaya ɡe lolɛ Joram, Joram lolɛ Sikri, asɛ Sikri lolɛ Sɛlomet.

²⁶ Dɛ Sɛlomet ne o lolanaree chɔ deene baa dɛ cheɡ laala a yoɡ aa kpeɡa, Kooro Devid aa kpɔa baa tɛ Korowii nyoa, ne nomonnyuune baa chɔ laa tena kaɡboŋa ne lafare nyoo, dɛ laa tena nomonome bane baa kaa la nyoa.

²⁷ Ba kpɔ laala baa paa laa ta la ane ba tɛ, ba kpɔ ɛ Korowii Dea la toma.

²⁸ Komɛlbwa Samoɛl waa dɛ na chaahna ne Kes bibaa Sɔɔl, ne Nɛr bibaa Abna, dɛ Seruya bibaa Joab aa kpɔa tɛ Korowii ne laala aa jaa bwa, dɛ Sɛlomet ne o lolanaree dɛɛ nyiŋi a ta.

²⁹ Isiha naanar bini, Kenania ne o bibaalaa ba kpɔ toma aa wola Korowii Dea bela ta jae tɛ, dɛ ɛɛ ba nomonome baa bol nɛra ne ba bala baah ta wa Israel harɛ ta.

³⁰ Hɛbrɔn naanar bini ɡe, Hasabia ne o lolanar kaɡboŋ lafraanuanɛ baa dɔ ba te kɛrɛdɛ, ɡee chɔ Jɔɔdan Moo wee cholibɔr ne Korowii toma bɛlbwa soo siwi, ne kooro toma nyoa Israel harɛ ta.

³¹ Hɛbrɔn naanar bini la, dɛ Jɛrea ɛ ba nyu te, ɡɛ baa chwerɛ ba sɔna denaa ta ba teŋɛ dɔŋa nɛ. Kooro Devid aa di kora bene fifraanaarɛ ta la, ba nyiŋi tɔne bini, dɛ na kɛŋɔ ba bini laa tena baa kpeɡa bane soɡe Jasa waa lɔ Gelead harɛ ta.

³² Kooro Devid le nomonnyuune kaɡboŋa banɛ lafraanuanɛ, baa dɔ ba te le Jɛrea lolanar bini, ba chɔ Rubin ne Gad deene dɛ Manasɛ dea pera, ne Korowii be pera waa ne kooro waa bwa nyoa ta.