1 Webena 23 - mzwDBL

Lewi dea tena

¹ Kooro Devid aa baa hwɛɛh kohona la, o kpɔ o bibaa Solomɔn cheɡ Israel kora ta.

² O yerɛ Israel nomonome bwa, ne Lewi dea tena dɛ sɔfore bwa cheme.

³ O kure Lewi dea tena baa dɔ bene fifraatoro ne a habɔɔ la, ba ɛ baala kaɡboŋa fifraatoro dɛ banuatoro.

⁴ Belaa Kooro Devid ŋɔ, “Gɛ baala nɔ, ba bini kaɡboŋa fifraanɛ dɛ banaarɛ chɛ kɛŋɔ baa nyiŋi toma aa lɔ Korowii Dea bonɔ ta, ásɛ ba bini kaɡboŋa banumɛl ɡe ɛ karakere, dɛ bɛl ne o dɔŋ dɔ wa aa, ba bini bane nyiŋi dɛɛ bola.

⁵ Ba bini kaɡboŋa banaarɛ ɛɛ daah doonyoo la, ásɛ kaɡboŋa banaarɛ ɡe kpɔ kwaa baa dɛ hɛlɛ ane ɡo yela dɛɛ kpɛɛ Korowii. N nyin a bwa, bá kpɔ ɛ toma nɔ.”

⁶ Kooro Devid bɔne Lewi dea tena denaa ta. Gɛsɔn ne Kohat dɛ Merari luɡri nɛra.

Gɛsɔn dea nɛra

⁷ Gɛsɔn bibaalaa, Ladan ne Simee.

⁸ Ladan ɡe bibaalaa, Jehiel, onee biloɡle ne Sɛtam dɛ Joel. Ba lɔ bibaala batoro.

⁹ Simee ɡe bibaalaa, Sɛlomɔt ne Haseɛl dɛ Haaran. Ba lɔ bibaala batoro. Banee Ladan dea nomonnyuune.

¹⁰ Simee ɡe bibaalaa, Jahat ne Sesa ne Jeyus dɛ Bɛrea. Ba lɔ bibaala banaarɛ.

¹¹ Jahat, onee biloɡle asɛ Sesa teŋɛ, kɛ Jeyus ne Bɛrea te ta bibaala lolɛ warɛ. Anomanta, baa dɛ kur ba la, ba kur ba pɛ dɛ kpɔ tombeŋkpoŋ do ba nɔn ta.

Kohat dea nɛra

¹² Kohat bibaalaa, Amram ne Isiha ne Hɛbrɔn dɛ Usiel. Ba lɔ bibaala banaarɛ.

¹³ Amram ɡe bibaalaa, Arɔn ne Mosis. Ba le Arɔn cheɡ, asɛ o ne o naanar ɛɛ nyiŋi kwaa baa lea cheɡ tɛ Korowii a do ɡoroŋ kohona ta. Asɛ ba kpɔ saraha kwaa dɛɛ la Korowii sie, dɛɛ ɛ toma o sie dɛ che o sɔn ta swee andɛɛɡa tɛ nɛra saŋ bɛlbwa dɛɛ la.

¹⁴ Ba kure Korowii bonɔɔ Mosis bibaala kɛŋɔ Lewi dea tena pera.

¹⁵ Mosis bibaalaa, Gɛɛsɔm ne Eliesa.

¹⁶ Gɛɛsɔm ɡe naanaree, Subael, onee binomoa.

¹⁷ Eliesa ɡe naanaree, Rehabia, onee ɛ binomoa. Eliesa ta bibaa bɛlbwa lolɛ kpa, kɛ Rehabia te lolɛ bibaala warɛ.

¹⁸ Isiha ɡe bibaalaa, Sɛlomet, onee binomoa.

¹⁹ Hɛbrɔn ɡe bibaalaa, Jɛrea, onee binomoa, ne Amaria ne Jahaseɛl dɛ Jekameam. Ba lɔ bibaala banaarɛ.

²⁰ Usiel ɡe bibaalaa, Maeka, onee binomoa asɛ Isihia ɡe teŋɛ.

Merari dea nɛra

²¹ Merari ɡe bibaalaa, Maali ne Musi. Maali ɡe bibaalaa, Eliasa ne Kes.

²² Eliasa aa baa sewɛ la o ta bibaala lolɛ, bihaahna ɡboo o lolɛ. Kes bibaala baa ɛ ba nimanar laanee kpɔ ba mo.

²³ Musi ɡe bibaalaa, Maali ne Ida dɛ Jerimot. Ba lɔ bibaala batoro.

²⁴ Dɛ ɡɛ nɛra nɔɔ le Lewi dea dɛ ɛ ba nomonnyuune, ba kur ba beŋkpoŋa beŋkpoŋa dɛ chwerɛ ba sɔna la. Ba bini tom-ɛɛra baa di bene fifraanɛ kɛɛ dɛ ɡwaa dɛɛ ɛ toma Korowii Dea la.

²⁵ Kooro Devid fa bolɔ ŋɔ, “Korowii Israel tena aa dɛ tomɔ ɡelɔ o nɛra dɔ deŋnesɔɔhna, asɛ Korowii ɡbabir ɛɛ ba ba so Jerusalam saŋ bɛlbwa dɛɛ la,

²⁶ ɡɛ nomanta, Lewi dea tena la ta chɛ kɛŋɔ bá che Korowii Tɛnte Dea la kɛɛ komɛlbwa baa kpɔa dɛɛ tomɛ Korowii la kpa.”

²⁷ A cheɡɛ waa Kooro Devid aa bola ta, ba kure Lewi dea tena la le banɔ la baa di bene fifraanɛ kɛɛ dɛ ɡwaa la.

²⁸ Dɛ Lewi dea tena la tomaa kɛŋɔ baa cha Arɔn naanar Korowii Dea bini toma ta, dɛɛ nyiŋi dembaahna la ne dejeɡre aa lɔ o ta, dɛ laa doŋa dɛɛ kpɔ kwaa aa do ɡoroŋ bɛlbwa aa lɔ bela ta.

²⁹ Ba tomaa kɛŋɔ ba nyiŋi dɛ kpɔ paanoo ba dawɛ teebur ta, ne men aa kpera kɛrɛdɛ ba kpɔ ɛ mea saraha, ne biskeeti baa wola iisi a ta do, a charama ne ɡɛ baa maɡa bwa.

³⁰ Toma ane ɡee kɛŋɔ chɔɔ ne jɔmɔra bɛlbwa, bá ir dɛɛ jam dɛɛ kpɛɛ Korowii,

³¹ ne saraha kwaa baa dɛ fuah nɛra aa dɛ ba a ne Ona Tɔpera ne Korobifala Tɔpejena, ne anɔ la aa jaa Korowii lea cheɡ. Saŋ bɛlbwa chɛ kɛ bá warɛ do bela dɛɛ tomɛ Korowii ɡɛ baa kpɔa do ba nɔn ta.

³² Gɛɛ Lewi dea tena ɛ ba tomare baa kpɔa do ba nɔn ta Korowii Dea Cheremibɔr la bini ne Boɡoroŋ bela, ba do Arɔn naanar lɔɡa, dɛɛ cha ba Korowii Dea bela.