1 Webena 22 - mzwDBL

¹ Belaa Kooro Devid ŋɔ, “Korowii Dea la ne kon Israel tena aa dɛɛ fuh saraha kwaa o ta la chɛ kɛŋɔ ó che bonɔ.”

Korowii Dea mae mumpar

² Anomanta, Kooro Devid ɡelɔ ba boa hɔɔhra baa lɔ Israel harɛ nyoa, asɛ o le ba bini bane baa dɛɛ peɡri bwea baa kpɔ ma Korowii Dea la.

³ O nyin bune a warɛ ba kpɔ kwaa dadowɛre ne njinasoɔre baa kpɔ do ɡbeni ta, dɛ ayaawa aa wara baa wola won maɡa.

⁴ Kooro ɡelɔ bwɛjena Sidon ne Taaya tena ɡe ba tɛo peleme daa aa wara kɛrɛdɛ.

⁵ Belaa o lii ŋɔ, “N bie Solomɔn nɔn ta kao, waa wobɛlbwa jemɛ, Korowii Dea waa dɛ ba doe nɔ ɡe chɛ kɛ ó do wer kohona, dɛ́ lɛ sɔn harɛre bwa ta. Amɔ a chɛ kɛŋɔ ń nyiŋi dɛ́ kpɔ o laa kɛrɛdɛ.” Anomanta, o nyin laala waa kpɔ ma Dea la bil warɛ mɔɔ dɛ sewɛ.

⁶ Kooro yerɛ o bibaa Solomɔn dɛ doo ŋɔ onee chɛ kɛ ó do Dea tɛ Korowii Israel tena aa dɛ tomɔ la.

⁷ O ŋɔ Solomɔn be ŋɔ, “N bie, dɛ n bambile fe lawɔ kɛŋɔ ń do Dea tɛ Korowii maa dɛ tomɔ la.

⁸ Kɛ Korowii ŋɔ n be ŋɔ, ‘He yo laa dɛ kpoo nɛra kohona. Anomanta, he laa chɛ kɛŋɔ hé do Dea tɛ mɛ, dɛkalkɛ he fuɡe chal ta kohona harɛ nɔ ta n sie.

⁹ Hɛɛ ba dɔ bibaa bɛlee, o ɛ nɛn waa dɛ nyin deŋnesɔɔhna, mɛɛ ɡeloo o dɔ bosɔɔhna le o dɔma bwa nɛ. Baa dɛɛ yerɔ Solomɔnee. O bere saŋ, mɛɛ ɡeloo deŋnesɔɔhna ba Israel harɛ ta ba bwara sɔɔh ba.

¹⁰ Onee dɛ́ ba do n Dea tɛ mɛ. Mɛɛ kpɔɔ ɛ n bie n ɡe ɛ o mɛɛ, dɛ́ ɡel o kora che kiŋkiŋ Israel harɛ saŋ bɛlbwa dɛɛ la.’

¹¹ N bidɛɛɡe, Korowii haa dɛ tomɔ ja he nɛɛ dɛ́ tɛɛ hɛɛra he won do Dea tɛo ɡɛ waa bola la.

¹² Ó tɛɛ wejema ne waa mun noe kɛrɛdɛ, he won kpɔ nyiŋi o nɛra Israel tena nɛ, dɛɛ teŋɛ o Mmarare bwa ɡe ta.

¹³ He do sie dɛɛ teŋɛ mmarare Korowii aa cheɡɛ Mosis nɛɛ, dɛ kpɔ tɛ Israel tena la ta naa, anee dɛ́ ɡel he wobɛlbwa do wer. Bɛ ɔmɛ, dɛ́ ɡel he sie beɡre waa maa doe nɔ ta kɛrɛdɛ.

¹⁴ N takapɔ dɛ kpɔ suuɡaswɛm a tɔɡre aa ɛ kilore kaɡboŋ bele kaɡboŋa atoro, dɛ kaɡboŋa lafraanaarɛ, ne suuɡapoŋa a ɡe tɔɡre aa ɛ kilore kaɡboŋ bele kaɡboŋa fifraatoro dɛ anaarɛ, ne ayaawa dɛ bune aa wara ne daa ne bwea bwa ba, ásɛ he nyin ane ja do dea la.

¹⁵ Nɛra baa ɛ toma la warɔ, banɔ la baa peɡri bwea ne mamaala ne kapenta tena, dɛ baala baa dɔ toma bwa soo siwi wejema,

¹⁶ kɛŋɔ suuɡaswɛm ne suuɡapoŋa ta, ne ayaawa ne bune. Nɛra baa jemɛ kwaa bwa soo siwi sɛɛh baa wola nyoa dɔe. Name, pa toma la mun, Kórowii ja he nɛ.”

¹⁷ Ate, Kooro Devid ŋɔ Israel nomonome bwa be ŋɔ bá cha o bibaa Solomɔn.

¹⁸ O ŋɔ ba be ŋɔ, “Kórowii haa dɛ tomɔ la ja he nɛ. O ta ɡelɛ he so deŋnesɔɔhna ta he bwara sɔɔh heya aa? O ɡelɔ n yo dɛ pɔ nɛra ba fa aa soɡe harɛ nɔ ta nɛ, ba do on Korowii ne ya lɔɡa.

¹⁹ Name, le fini kpɔ he bambile ne liire bwa ne dɛɛ tomɛ Korowii. Pa mun ma Korowii Dea la, ásɛ dɛ won kpɔ Korowii Ne Nɛwɛnyina Fɔo Daka la ne laala aa do ɡoroŋ ba kpɔ dɛɛ tomɔ la bwa ba cheɡ o bini.”