1 Webena 21 - mzwDBL

Kooro Devid kure o laa tena

¹ Bɔnsam dɛ nyin Israel tena na wa, dɛ ɡel Kooro Devid dɔ liire kɛŋɔ a chɛ kɛ ó kure Israel tena.

² Anomanta, Kooro Devid ŋɔ Joab ne laa nomonome la be ŋɔ, “Hé valɛ Israel deene la bwa ta, le Dan waa lɔ weekaŋle nyunduabɔr pera dɛ́ ba kaa Beɛseeba weekaŋle harɛbɔr, dɛ́ chwerɛ ba sɔna dɛ́ ba bol n be, ásɛ n jemɛ ba nyoa.”

³ Anee Joab chaŋe kooro ŋɔ, “N naa kooro, Korowii haa dɛ tomɔ la ɡel laa tena la warɛ bele lafa dɛ́ ɡwaa, ásɛ he na. N naa, he bonɔɔna laa ba bwa naa, aa ɡel ya harɛ nɔ tena bwa di bolchɔɡe aa?”

⁴ Kooro waa la tɔɔɡe Joab waa la ta, anomanta, Joab iro ka ɡaaɡe Israel harɛ bwa ta, dɛ berɛ ba Jerusalam.

⁵ Joab ba kooro be ba baɡle laa tena la nyoa baɡlo ŋɔ Israel harɛ ta ɡbo, ba lɔ laa tena kaɡboŋa bele kaɡboŋ, dɛ kaɡboŋa lafa, asɛ Juda harɛ ta ɡe kaɡboŋa lafraanaarɛ fifraanuanɛ.

⁶ Joab ta Lewi dea tena ne Bɛnjamen dea tena kure ja, dɛkalkɛ dɛ kooro waa la aa somɛ o be.

⁷ Dɛ Korowii ɡe sie ta waa la ta lɛɛ, anomanta, o kpɔ deŋnetɛra ba ta Israel tena nɛ.

⁸ Belaa Kooro Devid ŋɔ Korowii be ŋɔ, “Waa maa ɛa nɔ ɡelɔ n ɛ wechɔɡa kohona. N dɛ soŋe, laa bolchɔɡe men maa ɛ he bonɔɔ aa dia nɔ kpɔ n nɛ. N ɛ ɡɛnewa tenten.”

⁹ Ate, Korowii ŋɔ Kooro Devid keame Gad be ŋɔ,

¹⁰ “La ka ŋɔ Kooro Devid be ŋɔ, ‘Kenii men Korowii ɛɛ bol, webele atoroo n kpɔ dɛɛ tɛɛ, kpɔ a bini beŋkpoŋ, ń kpɔ tɛr he deŋne.’ ”

¹¹ Anomanta, Gad la Kooro Devid be ka bɔɔro ŋɔ, “Waa Korowii aa bola laanee nɔ, ‘Baɡle onla haa dɛ nyin.

¹² He dɛ nyin kɛŋɔ lɔr chole he harɛ ta bene atoro, kɛɛ he teŋɛ chwa dɛɛ le he dɔma be, ásɛ ba ɡe chwa dɛɛ tii korobie atoro bwa naa? Kɛɛ Korowii che o nyundua torome nɛɛ kpɔ weechɔɡa ba ta he harɛ nɛra bwa nɛɛ bobɛlbwa.’ Gel ń jemɛ waa maa ka bol naate waa tom mɛ la be.”

¹³ Anee Kooro Devid chaŋo ŋɔ, “N lɔ suna kohona dii ta. Maa nyin kɛ nɛwɛnyini te dɔɔ mɛ dɛ́ tɛr n deŋne. Korowii ɡbabirii dɛ́ tɛr n deŋne, dɛkalkɛ onee dɛɛ sune nɛn nɛɛ kohona.”

¹⁴ Anomanta, Korowii kpɔ weechɔɡa ba ta Israel harɛ ta, asɛ baala kaɡboŋa fifraanuanɛ serewe.

¹⁵ Korowii le nyundua torome bɛl dɛ tɛo kpeɡri ŋɔ ó ba chɔɡ Jerusalam. Waa dɛ la ka chɔɡo la, Korowii berɔ charɛ o liire, dɛ ŋɔ torome la be ŋɔ, “Gel! A maɡre ɡɛ.” Gɛ saŋ dɛ torome la lɔ Jebus te Arauna mea lɔ bɔr.

¹⁶ Kooro Devid ha sie nyiŋi dɛ na Korowii nyundua torome la kɛŋɔ waa cheɡɛ harɛ ne nyundua baah, dɛ pamɛ kere pa Jerusalam dɛɛ ba o chɔɡa. Dɛ Kooro Devid ne o nomonome tɔ lweyale, ba cholo dɛ kpɔ sie pi harɛ.

¹⁷ Kooro Devid soŋe Korowii ŋɔ, “N Naa Korowii, menee ɡela ba kure nɛra la, anomanta, menee ɛ wechɔɡa dɛ di a bolchɔɡe. Nɛra nɔ baa do kɛŋɔ peera nɔ laa ɛ waane. Kpɔ deŋnetɛra bɛlbwa ba ta n ne n haahna ne n bii nɛ, dɛ́ ɡel he nɛra Israel tena.”

¹⁸ Belaa Korowii nyundua torome bɛl ŋɔ Gad be ŋɔ, ó ka ŋɔ Kooro Devid be ŋɔ ó la Jebus te Arauna mea lɔ bɔr bela dɛ́ ka ma kon baa dɛ ɛ saraha o ta tɛ Korowii.

¹⁹ Anomanta, kooro teŋɛ Korowii nyoa wobol Gad aa baa bol o be la ta, dɛ ka ɛ ɡɛ tenten.

²⁰ Dɛ Arauna ne o bibaala banaarɛ lɔ mea lɔ bɔr bela dɛɛ lɔ mea. Baa na nyundua torome la, bibaala la chwao ka sɔh.

²¹ Ate, Kooro Devid suuh tel, asɛ Arauna nao dɛ le ka chemo, dɛ ka ɡuŋu dɛ kpɔ sie pi harɛ.

²² Kooro Devid chaŋo ŋɔ, “N balɔ dɛ́ ba yawɛ he mea lɔ bɔr nɔ, dɛ́ ma kon maa ɛ saraha o ta tɛ Korowii, ɡɛ aa ɛ ásɛ weechɔɡa la ɡel nɛra kpoora. Yoɡ tɛ mɛ ɡɛ bwa aa chɛa.”

²³ Ate, Arauna ŋɔ Kooro Devid be ŋɔ, “N naa kooro, kpɔ komɛlbwa haa dɛ nyin ka ɛ saraha la tɛ Korowii. Nabala haa kpɔ ɛ saraha baa fuah, ne daa aa sarawe mea lɔ bɔr la ɡee nɔ bá kpɔ mar, ne mea ɡe haa kpɔ ɛ saraha. N naa kooro, n kpɔ anɔ bwa tɛɛ.”

²⁴ Asɛ kooro chaŋo ŋɔ, “Akai, n ta cheɡɔɔ kɛ ń bɔe o kem. Maa kwaa kpo, dɛ́ fuah ɛ saraha tɛ Korowii maa dɛ tomɔ pɛɛpɛɛ, maa wola kem bɛlbwaa bɔ.”

²⁵ Anomanta, o yawɛ mea lɔ bɔr la suuɡaswɛm bwea lafraanumɛl.

²⁶ Kooro Devid ma kon waa ɛ saraha o ta tɛ Korowii bela, dɛ kpoo kwaa ɛ sarahare baa fuah ne deŋnesɔɔhna sarahare tɛo. O soŋe Korowii asɛ o ɡel nii le nyundua, dɛ ba fuh saraha kwaa la bwa.

²⁷ Ate, Korowii bol waa nyundua torome la be, asɛ o berɛ kere la su o tɔɔ ta.

²⁸ Kooro Devid aa naa kɛŋɔ Korowii no o wesoŋa Arauna waa ɛ Jebus te mea lɔ bɔr la, o kpoo kwaa ɛ sarahare bela.

²⁹ Dɛ Korowii Tɛnte Dea Mosis aa baŋro pua hɛŋle ɡbo harɛ ta, ne kon baa dɛ fuh saraha kwaa o ta la bwa ta lɔ bela baa dɛ tomɛ Korowii Gebeɔn.

³⁰ Kɛ Kooro Devid ta wone la o ta ka soŋe Korowii, dɛkalkɛ dɛ o dɛ ɔmɛ kere Korowii nyundua torome la aa pama la.