1 Webena 20 - mzwDBL

Kooro Devid pɔ bwɛjen Raba tena nɛ

¹ Lɔmɔɡa saŋ koranar yon dɛɛ la laa la, Kooro Devid tomɛ Joab ŋɔ ó tɔ o laa tena sie, dɛ́ ka yo laa. Ba kaa yo Amɔn tena dɛ pɔ ba nɛ, dɛ ka bar bwɛjen Raba ɡe cheme, dɛ chɔɡ o bwa o berɛ dimɡbia, kɛ Kooro Devid te soɡe Jerusalam.

² A habɔɔ, Kooro Devid la Raba dɛ ka laa ba voɡ Molɛk kooɡbɛrɛ kpɔ o nyu ta. O tɔɡre ɛɛ ɛ suuɡaswɛm kilore fifraatoro dɛ anaarɛɛ, ba bil bwedɛɛɡa a yoɡ aa kpeɡa o ta, asɛ o kpɔ pi. O pa ba laaladɛɛɡa kɛrɛdɛ le bwɛjen la ta kaa,

³ asɛ dɛ lawɛ nɛra baa lɔ bwɛjen la ta, dɛ ɡel baa peɡri daa dɛɛ loɡɛ para ne kpanfɛre. Gɛɛ o ɛ Amɔn bwɛɛre la bwa ta, asɛ o ne o laa tena la bwa berɛ kaa Jerusalam.

Filisti tena yoi wa

⁴ Anɔ habɔɔ, ba ne Filisti tena berɔ yo laa Gɛsa. Laa la ta la, Sibekai waa le Husa kpo Refa te waa kpeɡa, o bwara do kpeɡri kohona naanar la bini bɛl baa yerɔ Sipai, asɛ Filisti tena ba do ba lɔɡa.

⁵ Ba ne Filisti tena berɔ yo laa, asɛ Jɛɛ bibaa Ɛlhanan kpo Laami waa ɛ Goliat nime, waa le Gat. O lampea nyoa buni tɔɡre kɛŋɔ yasɔɔh kokorowa daa ken.

⁶ Laa bɛl ɡe chole Gat ja. Dɛ baa bɛl kpeɡo o bwara do kpeɡri kohona. O nɔn bɛlbwa ta, o dɔ nonie anumɛl, o nanie ɡe ɛ anumɛl o nakpale ta. A bwa lɔ fifraanɛ dɛ anaarɛ. O ɛ Rafa naa.

⁷ O muɡli Israel tena baah, asɛ Simea waa ɛ Kooro Devid dɔɔranar la bini bɛl bibaa Jonatan kpoo.

⁸ A ɡɛ nɛra nɔɔ Rafa naanar baa lɔ Gat, asɛ Kooro Devid ne o laa tena kpoo ba.