1 Webena 19 - mzwDBL

Kooro Devid yo Amɔn ne Siiria tena dɛ pɔ ba nɛ

¹ A habɔɔ la, Amɔn Kooro Nahas baa sewɛ, asɛ o bibaa Hanun ba chiɡ o naa ta, dɛ di kora.

² Anee Kooro Devid lii ŋɔ, “Mɛɛ kpɔ Kooro Nahas bibaa Hanun daramee, ɡɛ n ne o mɛɛ fa aa kpɔ darame la.” Anomanta, kooro tomɛ toroma o be ba ka bwɛɛlo o mɛɛ seo wa. Toroma la aa tel Kooro Hanun be Amɔn tena harɛ ta la,

³ anee Amɔn nomonjena ŋɔ Kooro Hanun be ŋɔ, “He dɛ lii kɛŋɔ duuree Kooro Devid kpɔ dɛɛ tɛ he mɛɛ, dɛ tomɛ toroma ŋɔ bá ba bwɛɛle nɔ naa? Toma laa o tom ba ŋɔ bá ba sɔh nyiŋi ya harɛ nɔ, dɛ́ won ba yo yaa, dɛ́ pɔ ya nɛ aa?”

⁴ Anomanta, Kooro Hanun lawɛ Kooro Devid toroma la dɛ fonɛ bɛlbwa tampona pera ta, dɛ teŋni ba laala baa doa la muŋkela ta, dɛ ɡel ba bá kaa.

⁵ Kooro Devid aa no ɡɛ waa nɔ la, o tomɛ toroma ba kpɔ kala ka tɛɛ ba, dɛkalkɛ ba ɡelɔ sihiih kpo ba kohona. O ŋɔ toroma la be kɛŋɔ bá ŋɔ ba be ŋɔ, bá so Jeriko ka tel kɛŋɔ ba tampona la aa moɡa mɔɔ ba berɛ ba.

⁶ Amɔn tena aa na Kooro Devid bandia kɛŋɔ o mee le ba we-ɛɛla ta la, Kooro Hanun ne Amɔn tena la kpɔ suuɡapoŋa a tɔɡre aa ɛ kilore kaɡboŋa lafraatoro fifraanaarɛ, dɛ kpɔ nyin kwaa aa do kɛ torɔɡore, ne laa tena baa dɛ so jaɡre ta le Mɛsopoteemea ne Siiria bwɛɛre Maaka ne Soba ba.

⁷ Kwaa aa do kɛ torɔɡore kaɡboŋa fifraatoro dɛ anɛ la ne nɛra baa so a ta baa nyina la, ba soŋe Maaka kooro ne o laa tena ja, asɛ ba ba so Medeba, asɛ Amɔn tena bwa ɡe le ba bwɛɛre ta dɛ́ ba yo.

⁸ Kooro Devid aa no waa nɔ la, o tomɛ Joab ne laa tena la bwa, ŋɔ bá ka yoo ba.

⁹ Amɔn tena la kpɔ ba te, dɛ ba che Raba waa ɛ ba bwɛjen la doonyoa, asɛ koranar baa bala dɛ ba cha la ɡe che bwɛɛ la dahare.

¹⁰ Joab nao kɛŋɔ laa tena lɔ o sie ne habɔɔ, anomanta, o le Israel laa tena baa jemɛ yoi kɛrɛdɛ, dɛ kpɔ ba ka che Siiria tena la sie ba ne ba yo.

¹¹ O kpɔ laa tena la kabora do o nime Abisae nɔn ta, asɛ Abisae kpɔ ba ka che Amɔn tena la sie ba ne bá yo.

¹² Belaa Joab ŋɔ Abisae be ŋɔ, “Dɛ he baa na kɛŋɔ Siiria tena la dɛ pɔ n nɛ aa, he ba dɛ́ ba lɛɛ mɛ, dɛ Amɔn tena ɡe kpeɡri ba dɛ ɡwaa he nɛ aa, ń ɡe ba lɛɛ.

¹³ Dɔ bambile dɛ́ che kiŋkiŋ, dɛ́ ɡel ya won yo bansua ne lɛ ya nɛra ne Korowii bwɛjena cheɡ. Waa aa too Korowii tea laanee wɛɛ ba ɛɛ.”

¹⁴ Ate, Joab ne o laa tena kpɔ ba te dɛ ka yo Siiria tena la, asɛ ba chwa le ba sie kaa kwaraa.

¹⁵ Amɔn tena aa na Siiria tena ba chwa dɛɛ kaa la, ba chwao le Abisae be dɛ kaa bwɛjen la bini. Anomanta, Joab berɔ ba Jerusalam.

¹⁶ Siiria tena aa naa kɛŋɔ Israel tena pɔ ba nɛɛ la, asɛ ba tomɛ toroma ba ka kpɔ laa tena le Yufretis Moo wee leebɔr baŋ le, asɛ Kooro Hadadesa laa sitɔɔ Sobak tɔ ba sie.

¹⁷ Kooro Devid aa no waa nɔ la, o boa Israel laa tena bwa nyoa, asɛ ba ɛɡɛ Jɔɔdan Moo le. Ba bɔne o laa tena la bini ba ka che ba chebɔra dɔma la baŋ bɛl. Ba pa yoi la mun,

¹⁸ kɛ Siiria laa tena la ta wone che Israel laa tena la sie. Kooro Devid ne o laa tena kpoo nɛra baa soɡe kwaa aa do kɛ torɔɡore bini kaɡboŋa banuanɛ, ne laa tena kaɡboŋa fifraanaarɛ baa dɛ valɛ. Ba kpo Sobak waa chɔ ba laa tena nyoa la ɡe.

¹⁹ Koranar baa lɔ Kooro Hadadesa lɔɡa aa naa kɛŋɔ Israel tena pɔ ba nɛɛ la, ba ne Kooro Devid kaa fɔwɛ deŋnesɔɔhna fɔo, dɛ kpɔ ba te do o lɔɡa dɛɛ tomɔ. Gɛɛ a do Siiria tena ɔmɛ, ba ta Amɔn tena chae kpa.