1 Webena 18 - mzwDBL

Kooro Devid laa waa yoa

¹ A habɔɔ la, Kooro Devid berɔ ka yo Filisti tena dɛ pɔ ba nɛ, dɛ lɛ bwɛjen Gat ne o bwɛɛre aa baro bwa le Filisti tena ba fa aa dɛ di a kpeɡri la be.

² O berɔ ka yo Moab tena ɡe dɛ pɔ ba nɛ, ba ba do o lɔɡa dɛ kpɔ harɛ la ta kwaa baa tɛo.

³ Belaa Kooro Devid berɛ ka yo Soba Kooro Hadadesa, hale dɛ ka le Hamat, ɡɛ saŋ waa la Yufretis Moo nyoa dɛ ka lɛ bela harɛ ba do o lɔɡa ja la.

⁴ Kooro Devid lawɛ Kooro Hadadesa kwaa aa do kɛŋɔ torɔɡore kaɡboŋ, ne laa tena baa soɡe laa torɔɡore bini kaɡboŋa banuanɛ, dɛ laa tena kaɡboŋa fifraanɛ baa dɛ valɛ. O ɡel kwaa aa do kɛ torɔɡore la lafa, ne jaɡre ane aa dɛ ba torɔɡore la tɛɡra, dɛ chaa a kabora habɔɔ nadɛɛne.

⁵ Siiria tena baa le Damaskɔs balɔ dɛ ba cha Soba Kooro Hadadesa, asɛ Kooro Devid kpoo ba bini nɛra kaɡboŋa fifraanɛ dɛ banɛ.

⁶ Kooro Devid bɔne laa tena la bini ba so kuore ta Damaskɔs harɛ ta, asɛ Siiria tena la do o lɔɡa, dɛ kpɔ harɛ la kwaa baa tɛo. Korowii ja Kooro Devid nɛɛ dɛ ɡel bobɛlbwa waa la ka yo la, o pɔ ba nɛ.

⁷ Kooro Devid kpɔ suuɡaswɛm kwaa Kooro Hadadesa nomonome aa kpɔa dɛɛ tɔ ba te ɡbemɡbe laa ta la, dɛ ba a ne Jerusalam.

⁸ O berɔ pa ayaawa aa wara le Kooro Hadadesa bwɛjena Teba ne Kun ta. A habɔɔ la, Kooro Solomɔn kpɔ ayaawa la ɛ loɡbajen ne pilare ne ayaawa loɡa, a do Korowii Dea bela.

⁹ Hamat Kooro Tou aa baa no kɛŋɔ Kooro Devid yo Soba Kooro Hadadesa, dɛ pɔ o ne o laa tena bwa nɛɛ la,

¹⁰ o tomɛ o bibaa Hadoram Kooro Devid be o ka jaamo yoi waa kaa yo Kooro Hadadesa, dɛ pɔ o nɛɛ la wa. Dɛ o ne Kooro Tou nɔ yo laa ka. Hadoram kpɔ suuɡaswɛm ne suuɡapoŋa dɛ ayaawa kwaa bwa soo siwi ba tɛ Kooro Devid.

¹¹ Kooro Devid kpɔ a ɡɛ kwaa nɔ dɛ lea cheɡ tɛ Korowii toma, ɡɛ o fa aa ɛ suuɡapoŋa ne suuɡaswɛm waa paa le harɛre waa kaa yo, dɛ pɔ a nɛra nɛɛ la. A ɡɛ harɛre laanee, Edom ne Moab, ne Amɔn ne Filisti, dɛ Amalɛk.

¹² Abisae nya Seruya kpoo Edom tena nɛra kaɡboŋa fi dɛ banuatoro, Yar Fɛlembɔjen bini.

¹³ O bɔne laa tena la bini kuore ta ba so bwɛɛre ta Edom harɛ bwa, asɛ harɛ la tena bwa do o lɔɡa dɛɛ tomɔ. Korowii ja o nɛ, dɛ ɡel o pɔ bobɛlbwa nɛra waa laŋa ka yo bwa nɛ.

Kooro Devid nomonome

¹⁴ Kooro Devid di kora Israel harɛ bwa, dɛ nyiŋi o nɛra waa aa toɡra ne kasinteŋ ne.

¹⁵ Dɛ Seruya bibaa Joab, onee chɔ laa tena la nyoa, asɛ Ahilud bibaa Jehosafat ɡe chwerɛ waa aa chiɡa bwa dɛɛ bil,

¹⁶ asɛ Ahitub bibaa Sadɔk, ne Abiata bibaa Ahemɛlɛk ɡe ɛ sɔfore, asɛ Seraya ɡe ɛ ba karake waa chwerɛ waa dɛɛ do tɔne bini,

¹⁷ Jehoiada bibaa Bɛnaya ɡe ɛ Kɛrɛt ne Pɛlet tena baa dɛ daah kooro la nomoa, asɛ Kooro Devid bibaala ɛɛ ja kooro o waa ta.