1 Webena 17 - mzwDBL

Korowii keame Netan kpɔ kala tɛ Kooro Devid

¹ Kooro Devid baa so o koodem, asɛ Korowii ɡel o dɔ bosɔɔhna dɛ le o dɔma bwa baa baro cheme be. Belaa o ŋɔ Korowii keame Netan be ŋɔ, “N soɡe koodem baa kpɔ peleme daa kwaaro bini, asɛ Korowii Ne Nɛwɛnyina Fɔo Daka la te ta che tɛnte dea bini.”

² Anee Netan chaŋe ŋɔ, “Ɛ wobɛlbwa aa lɔ he liire bini, dɛkalkɛ Korowii ja he nɛ.”

³ Kɛ awola jwaana la, Korowii bol waa Netan be ŋɔ ó ir la ka ŋɔ o bonɔɔ Devid be ŋɔ Korowii ŋɔ,

⁴ “He laa dɛ do dea tɛ mɛ ń ba so o bini.

⁵ Le awola tɔpere maa kpɔ Israel tena le Ijipt harɛ ta ba le fini, n ta dea bini soɡe bwa. Tɛnte dea binii mɛɛ so ba kpɔ mɛ dɛɛ ɡaaɡe.

⁶ Bobɛlbwa n ne n nɛra Israel tena aa kaala bwa, n ta ba sitɔɔla bɛlbwa maa do ba ŋɔ baa nyiŋi n nɛra nɛɛ kɛŋɔ peera be ŋɔe ŋɔ, ba ta peleme daa waa kpeɡa kpɔe kwaa dea tɛ mɛ.

⁷ Waa men Nemenɛ Korowii aa dɛ bol la ɡee nɔ, peeraa he teɡɛ dɛɛ la ane dibɔr n ka lawɛ, dɛ ba cheɡe kora ta n nɛra Israel tena nɛ.

⁸ N ja he nɛ bobɛlbwa haa laŋa, dɛ yo he dɔma baa lɔ he sie, dɛ pɔ ba nɛɛ tɛɛ. Mɛɛ ɡeloo he sɔn le kɛŋɔ harɛ nɔ ta nɛnjena ken.

⁹ Mɛɛ kpɔ harɛ waa ɛ n nɛra Israel tena ɡbaɡba konee tɛɛ ba, bá ka so o ta ba bwara sɔɔh ba. Nɛnchɔɡa aa ban fiiɡi kpa, ɡɛ a fa aa doa wubwa,

¹⁰ ne ɡɛ maa ɛa dɛ le saŋ maa le sitɔɔla tɛ n nɛra Israel tena la. Mɛɛ berɔ tɛ heyaa bosɔɔhna le he dɔma bwa nɔn ta. Men Korowii, n bol he be ŋɔ he ne he naanaree dɛɛ ba koranar ɛɛ.

¹¹ Haa ba sewɛ ka pu he naawa la, mɛɛ ɡeloo he ɡbabir bibaala la bini bɛl bá chiɡ he naa ta dɛ́ di kora, ásɛ o kora che kiŋkiŋ saŋ bɛlbwa dɛɛ la.

¹² Onee dɛ́ do n Dea tɛ mɛ n sɔn ta, ásɛ n ɡel o kora che kiŋkiŋ saŋ bɛlbwa dɛɛ la.

¹³ Mɛɛ kpɔɔ ɛ n bie, ásɛ n ɡe ɛ o mɛɛ. Mɛɛ che o mun taa, maa n nyinaa laa kpɔ o nɛ, kɛŋɔ maa le Kooro Sɔɔl ne, dɛ ɡel he ba chiɡ o naa ta di kora la.

¹⁴ Mɛɛ kpɔ n nɛra ne n harɛɛ do o nɔn ta, ásɛ n ɡel o kora che kiŋkiŋ saŋ bɛlbwa dɛɛ la.”

¹⁵ Ate, Netan bol waa Korowii aa kpɔa baɡlo la bwa baɡle Kooro Devid.

Kooro Devid Korowii wesoŋa

¹⁶ Belaa Kooro Devid ka jo Korowii Dea Cheremibɔr waa baŋro la bini, dɛ ka so Korowii sie dɛ ŋɔ, “N Naa Korowii, umee n ɡe ne n lolanar asɛ he ɛ ɡɛ waa nɔ dɔŋa bwa tɛ mɛ ken nɔɔ?

¹⁷ N Naa Korowii, he ta ɡelɛ a jaɡɛ bela dɛ ta teŋɛ ɛ ane dɛɛ ja, he berɔ bol he bonɔɔ naanar baa ka ba kerekere ɡe wa. He berɔ ɛɛ mɛ kɛŋɔ nɛnjen kohona.

¹⁸ Bɔkwaa men Devid dɔ dɛ́ bol he be jaɔ? He ɡbabir jemɛ men maa ɛ he bonɔɔ wa.

¹⁹ N Naa Korowii, he cheɡɛ waa haa bola ne waa haa dɛ nyin ɛɛ ta dɛ ɛ wejena nɔ bwa, asɛ men maa ɛ he bonɔɔ jemɛ a wa.

²⁰ N Naa Korowii, he kan kohona. Nomɛlbwa toole dɛ do kɛ hen, ya te jemɔ saŋ bɛlbwa kɛŋɔ he ɡboo Korowii.

²¹ Harɛ bɛlbwa nɛra toole dɛ do kɛŋɔ he nɛra Israel tena. Harɛ beŋkpoŋ nɛra hen Korowii aa lɛɛ ba le wenaale ta Ijipt harɛ, dɛ kpɔ ba ɛ he nɛra la. Wejena ne nyokpowe-ɛɛla haa ɛa tɛɛ ba la bwa ɡelɔ he dɔ sɔn harɛ nɔ ta bwa. He berɔ doŋi harɛre ane nɛra le ba sie.

²² He lɛ he nɛra Israel tena cheɡ saŋ bɛlbwa dɛɛ la, asɛ dɛ ɛ Korowii baa dɛ tomɛ.

²³ N Naa Korowii, ɡel he nyobaɡa haa baɡɛ he bonɔɔ, ne o naanar la do le saŋ bɛlbwa dɛɛ la. Ɛ ɡɛ haa ŋɔa la,

²⁴ á che a ta he dɔ sɔn kohona saŋ bɛlbwa dɛɛ la. Ásɛ nɛra na dɛ ŋɔ, ‘Nemenɛ Korowiirii dɛɛ nyiŋi Israel tena nɛ!’ Ásɛ men, he bonɔɔ Kooro Devid naanar che kiŋkiŋ, dɛ́ do he sie saŋ bɛlbwa.

²⁵ N Naa Korowii maa dɛ tomɛ, he pili waa nɔ bini baɡle men he bonɔɔ dɛ ŋɔ hɛɛ ɡeloo n naanar ɛ koranar.

²⁶ N Naa Korowii, henee Korowii yaa dɛ tomɛ! He waa ɛ kasinteŋ kɛ yaa teŋɛ a ta, asɛ he kpɔ wedɛɛɡa aa do ken baɡɛ men maa ɛ he bonɔɔ nyoa nɔ.

²⁷ N dɛ soŋe kɛ he swee n naanar andɛɛɡa, ásɛ baa di he laworomɛ saŋ bɛlbwa. Hen N Naa Korowiirii sweera tɛ n naanar a do le saŋ bɛlbwa dɛɛ la.”