1 Webena 16 - mzwDBL

¹ Israel tena la kpɔ Korowii Ne Nɛwɛnyina Fɔo Daka la ba cheɡ tɛnte dea Kooro Devid aa baŋro la bini, asɛ ba kpɔ saraha kwaa baa fuah ne deŋnesɔɔhna sarahare ba Korowii sie bela.

² Kooro Devid aa kpoo kwaa dɛ fuh ɛ sarahare, ne deŋnesɔɔhna sarahare tonɛ la, o soŋe andɛɛɡa Nemenɛ Korowii be tɛ nɛra la.

³ Belaa o kpɔ paanoo ne daa nɔna ane aa hola dɛ ɛ nɔndel, dɛ ɡrepo daa nɔna aa hola nɔndel tɛ Israel haah ne baa te bɛlbwa.

⁴ O berɔ le Lewi dea tena la bane ba baa ɛ toma Korowii Ne Nɛwɛnyina Fɔo Daka la sie, dɛ baa soŋe dɛɛ jam, dɛɛ kpɛɛ Korowii Israel tena aa dɛ tomɔ la.

⁵ Asaf ɛ ba nyu te, Sekaria teŋɛ, ne Jeyɛl ne Sɛmeramɔt ne Jehiel ne Matitia, ne Eliab ne Bɛnaya ne Ɔbɛd Edom, dɛ Jeyɛl ɡe ja. Banee dɛɛ lɔ janjela ne anɔ la baa kpɔa dɛɛ hɛlɛ bwa. Asaf ɡee dɛɛ lɔ kwaa anɛ ane baa kpɔ ayaawa ɛa dɛɛ hɛlɛ,

⁶ asɛ Bɛnaya ne Jahaseɛl baa ɛ sɔfore la, ɡe ɛɛ hoh bɛle la tɔpere bɛlbwa, Korowii Ne Nɛwɛnyina Fɔo Daka la sie.

Kooro Devid kpɛɛra yel

⁷ Le awola tɔpere laanee Kooro Devid kpɔ do Asaf ne o nɛra baa ja o nɛɛ nɔn ta ŋɔ, bá ɡo yela dɛɛ kpɛɛ Korowii.

⁸ Hé jam Korowii, dɛ́ yerɛ o sɔn, hé ɡel harɛre nɛra bwa jemɛ waa waa ɛa.

⁹ Hé ɡo yela kpɛɛro, dɛ́ bol o nyokpowe-ɛɛla wa.

¹⁰ Hé ɡel he sie lɛ o sɔn waa do ɡoroŋ la ta, nɛra haa dɛ tomɔ, hé ɡel he sie lɛ.

¹¹ Hɛ́ɛ soŋe Korowii dɛ́ na o kpeɡri, dɛ́ɛ tomɔ saŋ bɛlbwa.

¹² Hé lii o nyokpowaa waa ɛa, o wejena ne o waa aa dɔ kasinteŋ la wa,

¹³ O bonɔɔ Jekɔb naanar, Jekɔb bibaala waa lee ba cheɡ tɛ o te.

¹⁴ Onee Korowii yaa dɛ tomɛ, o bol harɛ nɔ ta nɛra waa dɛɛ pa bole.

¹⁵ Wɛɛ lii o fɔo la waa saŋ bɛlbwaa, o nyoa waa baɡɛ naanar kaɡboŋa baa ka ba la bwa.

¹⁶ Fɔo o ne ya naa Abraham aa fɔwa, ne nyoa waa baɡɛ Aesek la.

¹⁷ Korowii ne Jekɔb fɔwɛ fɔo, o do le saŋ bɛlbwa dɛɛ la.

¹⁸ O ŋɔ, “He ne he naanaree mɛɛ ba Keenan harɛ kpɔe tɛ, ó ɛ he kapɛrɛ kon.”

¹⁹ Gɛ saŋ dɛ Korowii nɛra aa kanɛ, dɛ ɛ hɔɔhra do Keenan harɛ ta,

²⁰ dɛ harɛre taa ba do dɛɛ ɡaaɡe, ba le harɛ bɛl ta naa, dɛ ba kaa bɛl ta.

²¹ Kɛ Korowii ta ɡelɛ nomɛlbwa fiɡ ba, ba lɛɛ nomanta, o kah koranar ŋɔ,

²² “Nomɛlbwa bɛ nɔn kpɔ leɡe n bonɔɔna maa lee ba cheɡ tɛ n te nɔ, he bɛ n keamere nɔ bini bɛlbwa ha.”

²³ Hé ɡo yela kpɛɛ Korowii! Harɛ nɔ ta nɛra bwa, hé ɡo yela kpɛɛro! Hé bol o lɛɛ waa dɛ lɛ nɛra tɔpere bɛlbwa wa.

²⁴ Hé bol o jirima waa baɡle harɛre nɛra, dɛ́ bol o nyokpowe-ɛɛla waa baɡle nɛra bwa.

²⁵ Korowii kan, a chɛ kɛ ya kpɛɛro kohona, onee chɛ kɛ ya kpɔ duure tɛ dɛ ɡwaa voɡa.

²⁶ Harɛre bwa voɡare ɛ konsale, kɛ Korowiirii ta nyundua.

²⁷ O kan dɛ dɔ jirima kohona, kpeɡri ne jirima su o Dea.

²⁸ Nɛra haa lɔ harɛ ta bwa, hé kpɛɛ Korowii. Hé kpɛɛro, o jirima ne kpeɡri waa dɔa wa.

²⁹ Hé kpɛɛ Korowii Waa Do Goroŋ, dɛ́ kpɔ jirima aa chɛ o sɔn la tɛo. Hé kpɔ saraha kwaa ba tɛo o Dea. Hé kpɔ jirima tɛ Korowii Waa Do Goroŋ la.

³⁰ Harɛ nɔ ta nɛra bwa ɛɛ chel o sie! O ta harɛ o che kiŋkiŋ, waa wola yiiɡi.

³¹ Kwaa aa lɔ nyundua ne harɛ bwa, hé ɡel he sie lɛ kɛŋɔ nɛra aa dɛ lɛ ba sie. Hé ɡel harɛre nɛra bwa no kɛŋɔ, “Korowii dɛ di kora.”

³² Mpo ne kwaa aa lɔ o bini bwa ɡe ɛɛ do lɔŋɔre ɡɛ. Kooni ne kwaa aa lɔ a bini bwa, hé ɡel he sie lɛ kɛŋɔ nɛra aa dɛ lɛ ba sie!

³³ Ásɛ kɔr bini daa ɡe ɛɛ hɛɡre ɡɛ, saŋ Korowii aa ba di kora harɛ nɔ ta la. Wɛɛ ba bol harɛ nɔ ta nɛra waa dɛ́ pa bole.

³⁴ Hé kpɛɛ Korowii! Hé kpɔ jam tɛ Korowii dɛkalkɛ o wer, o nyina waa dɛ nyin yaa ta jaɡa dɔe.

³⁵ Hé do lɔŋɔre ŋɔ, “N Naa Korowii yaa dɛ tomɛ, lɛ yaa, henee ya Lɛɛ, berɛ lawɛ yaa le harɛre ta ba. Ásɛ ya kpɔ jam tɛɛ dɛ́ kpɛɛ he sɔn waa do ɡoroŋ la.”

³⁶ Hé kpɛɛ Korowii Israel tena aa dɛ tomɔ, hé kpɛɛro saŋ bɛlbwa dɛɛ la. Nɛra la bwa ŋɔ, “Aamen” ne “Hé kpɛɛ Korowii!”

Korowii ka toma Jerusalam ne Gebeɔn

³⁷ Kooro Devid ɡelɔ Asaf ne nɛra baa ja o nɛɛ do Korowii Ne Nɛwɛnyina Fɔo Daka la sie bela, baa ɛ toma ɡɛ aa chɛa tɔpere bɛlbwa.

³⁸ O ɡelɔ Ɔbɛd Edom ne o bala fifraanumɛl dɛ banuatoro, ba ja ba nɛɛ baa ɛ toma bela. Dɛ Jedutun bibaa Ɔbɛd Edom ne Hosa ɡee dɛɛ daah doonyoa bela.

³⁹ Kooro Devid kpɔ sɔfo Sadɔk ne o bala sɔfore so Korowii Tɛnte Dea bela baa chema dɛɛ tomɛ Korowii o do Gebeɔn.

⁴⁰ Dɛ a chɛ kɛ ŋɔ bá kpɔ saraha kwaa baa dɛ fuah baa tɛ Korowii bela, kon baa dɛ fuh saraha o ta chɔɔ ne jɔmɔra, ɡɛ aa lɔ Korowii Mmarare bini o kpɔ tɛ Israel tena la.

⁴¹ Nɛra baa ja ba nɛɛ laanee, Heman ne Jedutun, dɛ banɔ la bwa baa lee ba cheɡ ŋɔ bá ɡo yela dɛɛ jam Korowii, dɛkalkɛ o nyina lole saŋ bɛlbwa dɛɛ la.

⁴² Heman ne Jedutun chɔ bɛle hoeh ne kwaa anɛ ane baa kpɔ ayaawa ɛa dɛɛ hɛlɛ, dɛ anɔ la aa jaa ba kpɔ ɡo yela dɛɛ kpɛɛ Korowii la nyoa. Jedutun bibaala la te, doonyoa belaa ba ɡel ba so dɛɛ daah bela.

⁴³ Belaa nɛra la bwa le bela kaa ba deremi, asɛ Kooro Devid ɡe kaa o dem, dɛ ka soŋe andɛɛɡa tɛ o dem tena.