1 Webena 14 - mzwDBL

Waa Kooro Devid aa ɛa Jerusalam

¹ Bwɛjen Taaya Kooro Hiram tomɛ nɛra Kooro Devid be ba kpɔ peleme daa ne kapenta tena, dɛ nɛra baa dɔ bwea kpɔe dɛ́ ma dea wejema, bá ma koodem tɛ Kooro Devid.

² Kooro Devid jemɔ kɛŋɔ, Korowiirii cheɡo kora ta Israel harɛ bwa, dɛ ɡel o dɔ kpeɡri o harɛ do wer kohona, o nɛra Israel tena wa.

³ Kooro Devid mo haahna warɛ Jerusalam bela, dɛ lolɛ bibaala ne bihaahna kohona.

⁴ Bii baa lola tɛo bela laanee Samoa ne Sobab ne Netan dɛ Solomɔn,

⁵ ne Ibha ne Elisua dɛ Ɛlpɛlɛt,

⁶ ne Nɔɡa ne Nɛfɛɡ dɛ Jafia,

⁷ ne Elisama ne Beeliada dɛ Ɛlefɛlɛt.

Kooro Devid yo Filisti tena dɛ pɔ ba nɛ

⁸ Filisti tena aa noa kɛŋɔ ba fuɡe noo do Devid nyu ta, dɛ cheɡo kora ta Israel harɛ bwa ta la, ba laa tena bwa iro, dɛ kaa nyin o bɔr sibeɡra ne, asɛ Kooro Devid ɡe no ba wa, dɛ le ka chem ba.

⁹ Dɛ Filisti tena la balɔ ba lɔ tɔ Refaim Fɛlembɔjen bini dɛɛ kah kwa.

¹⁰ Belaa Kooro Devid ka bɔɔ le Korowii be ŋɔ, “N Naa Korowii, ń la ka yo Filisti tena nɔ naa? Hɛɛ kpɔ baa do n nɔn ta kɛɛ?” Asɛ Korowii chaŋo ŋɔ, “Ir kaa, mɛɛ kpɔ baa do he nɔn ta, ásɛ he pɔ ba nɛ.”

¹¹ Anomanta, Kooro Devid iro, dɛ ka yoo ba Baal Pɛrasem dɛ pɔ ba nɛ. Dɛ ŋɔ, “Gɛ nee yon su ba tɔ bobɛlbwa la, ɡɛɛ Korowii ba tɔ n dɔma nɛɛ n sie.” Anomanta, ba dɛ yerɛ bela Baal Pɛrasem.

¹² Filisti tena chwao ɡel ba voɡare bela, asɛ Kooro Devid tɛ o nɛra ŋwɛnɛ ŋɔ ba fuah.

¹³ Filisti tena la balɔ ba lɔ tɔ Refaim Fɛlembɔjen bini ja dɛɛ kah kwa,

¹⁴ asɛ Kooro Devid ka bɔɔ le Korowii be ja, asɛ o chaŋo ŋɔ, “Hɛɛ berɛ sie pae dɛ́ kaa ba be. Hé bar ba ka che ba habɔɔ, dɛ́ yoo ba daa ane baa dɛ yera balsam sie bela.

¹⁵ Hé ba dɛ no ba naɡime sii daa la dor aa, hé pa mun dɛɛ yo, a dɛ baɡle kɛŋɔ men Korowiirii baa tɔ he sie, dɛ́ ka yo Filisti tena la dɛ́ pɔ ba nɛ.”

¹⁶ Gɛɛ Kooro Devid ɛ ɡɛ Korowii aa doo bwa ta, dɛ won doŋi Filisti tena le Gebeɔn ba Gɛsa.

¹⁷ Kooro Devid sɔn le harɛre bwa ta, asɛ Korowii ɡel harɛre nɛra bwa ɛɛ ɔmɔ.