1 Webena 13 - mzwDBL

Korowii Ne Nɛwɛnyina Fɔo Daka kpɔe le Kereat Jearim

¹ Kooro Devid ne o laa sitɔɔla baa chɔ laa tena kaɡboŋa ne lafare nyoo chemo dɛ kpɔ liire.

² Asɛ o ŋɔ Israel tena bwa be ŋɔ, “Dɛ a ɛ Korowii yaa dɛ tomɔ la nyina, ya sɛh ɡɛ waa dɛ nyin ta naa, yá tomɛ toroma ya bala baa kaa ne sɔfore dɛ Lewi dea tena baa lɔ harɛ nɔ ta bobɛlbwa be, ásɛ ya bwa cheme.

³ Ásɛ ya la ka kpɔ Korowii Ne Nɛwɛnyina Fɔo Daka la ba bonɔ, dɛkalkɛ Kooro Sɔɔl bere saŋee yaa wola o waa bɔɔrɛ.”

⁴ Israel tena baa cheme bela la bwa sɛh a ta, dɛkalkɛ dɛ a wer dɛ tɛ ba bwa.

⁵ Anomanta, Israel tena bwa baa cheme Kooro Devid sie, le Ijipt harɛ jwɛh ta Sehɔ Moo ta ba le Lebo Hamat, dɛ́ ka kpɔ Korowii Ne Nɛwɛnyina Fɔo Daka la le Kiriat Jearim ba Jerusalam.

⁶ O ne Israel tena la iro le bwɛjen Baala baa bera dɛɛ yerɔ Kiriat Jearim waa lɔ Juda harɛ ta, dɛ́ ka kpɔ Korowii Ne Nɛwɛnyina Fɔo Daka la le bela dɛ kaa Jerusalam. Nemenɛ Korowii sɔn dawɛ Daka la ta, asɛ o so o kookara ta, kena kwaa baa dɛ yera Kerobim la baah ta.

⁷ Ba kpɔ Korowii Ne Nɛwɛnyina Fɔo Daka la le Abinadab dem, dɛ kpɔ chɔŋɛ torɔɡofale bɛl ta nae ɛɛ tɛɡro. Asɛ Ussa ne Ahio ɛɛ baɡla bela aa kpɔ.

⁸ Dɛ Kooro Devid ne Israel tena la bwa dɛ lɛ ba sie. Ba ɡo yela silɛɛ ne kohona, dɛɛ lɔ janjela ne kalipere, ne kwaa anɛ ane baa kpɔ ayaawa ɛa dɛɛ hɛlɛ, dɛɛ yiiɡi loŋa ɡe Korowii sie.

⁹ Ba valɔ ba tel Kedɔn tena mea lɔ bɔr, asɛ nabala aa dɛ tɛɡre Korowii Ne Nɛwɛnyina Fɔo Daka la lɔ na, asɛ Ussa ta lawɛ Daka la kpoŋe.

¹⁰ Korowii baah di Ussa nɛɛ dɛ kpoo buɡ la ta, dɛkalkɛ o kpɔ nɔn lawɛ Daka la. Anomanta, Korowii sie belaa o sewɛ.

¹¹ Belaa Kooro Devid ɡe baah di, ɡɛ Korowii baah aa di Ussa nɛɛ dɛ tɛr o deŋne la wa. Anomanta, dɛ ba le fini, ba dɛ yerɛ bela Pɛrɛs Ussa.

¹² Kooro Devid ɔmɛ Korowii awola tɔpere dɛ ŋɔ, “Dɛ n kpɔ Korowii Ne Nɛwɛnyina Fɔo Daka nɔ ba n be bonɔ naa, ɛrɛɛ mɛɛ ba wona nyiŋi o ta nɔ?”

¹³ Dɛ waa berɛ dɛɛ nyin o ba Daka la ne o be Jerusalam kpa. O ɡelɔ ba kpɔ ba cheɡ Ɔbɛd Edom dem, o le bwɛjen Gat.

¹⁴ Korowii Ne Nɛwɛnyina Fɔo Daka la cheɡɛ Ɔbɛd Edom dem korobie atoro, asɛ Korowii swee o ne o dem tena ne komɛlbwa waa dɔa andɛɛɡa.