1 Webena 12 - mzwDBL

Banyoola bane baa kaa teŋɛ Kooro Devid nɛ

¹ A balɔ kɛŋɔ Kooro Devid chwao le Kooro Sɔɔl be dɛ ka so Siklaɡ. Waa lɔ bela la, banyoola bane la o be bela, dɛ ba ja laa tena baa chao yo laa la nɛ.

² Ba kpoŋe tori, dɛ jemɛ ane yoi kɛrɛdɛ, kɛɛ dɛ won vamtor bwea tae diɡ ne ɡal bwa. Ba le Kooro Sɔɔl luɡe ta, dɛ le Bɛnjamen dea.

³ Ba sitɔɔla sɔne Ahiesa ne Joas, ba mɛɛ Sɛmaa, o le Gebea. Laa tena baa jaa la ɡee, Asmavɛt bibaala Jesial ne Pɛlɛt, ne Bɛraka dɛ Jehu waa le Anatɔt,

⁴ ne Ismaya waa le Gebeɔn. O ja banyoola fifraatoro la nɛɛ dɛ ɛ ba sitɔɔla la bini bɛl, ne Jeremia ne Jehaseɛl ne Johanan dɛ Josabad waa le Gɛdɛra,

⁵ ne Elusai ne Jerimot ne Bealia ne Sɛmaria dɛ Sɛfatea, waa le Haruf,

⁶ ne Ɛlkana ne Isihia ne Aasarɛl ne Joesa dɛ Jasobeam baa le Kora dea,

⁷ ne Joela ne Sebadia baa ɛ Jɛroham waa le Gedɔr bibaala.

⁸ Baala bane le Gad dea dɛ ba ja Kooro Devid laa tena la nɛɛ dekpeɡ la ta pua hɛŋle ɡbo harɛ ta bobɛl. Ba ɛ banyoola baa kpoŋe kwaa baa kpɔa tɔ ɡbemɡbe dɛɛ yo laa ne lampeare. Ba siebɔra do ɔma kɛŋɔ nyujentena ken, dɛ do ɡbaŋre kɛŋɔ kweɡli aa lɔ bwejena dor.

⁹ Ba sitɔɔ sɔne Esa, Obadia teŋɛ nɛɛ, Eliab teŋɛ tooro,

¹⁰ Mismana teŋɛ naarɛ, Jeremia teŋɛ nue.

¹¹ Atai teŋɛ numɛl, Eliel teŋɛ nuanɛ.

¹² Johanan teŋɛ nuatoro, Ɛlsabad teŋɛ nuanaarɛ.

¹³ Jeremia teŋɛ fi, Makbanai teŋɛ fi dɛ beŋkpoŋ.

¹⁴ Gɛ nɛra baa le Gad dea nɔ bwa ɛ laa sitɔɔla, bane chɔ laa tena lafa nyoa, bane ɡe chɔ laa tena kaɡboŋ nyoa.

¹⁵ Banee ɡale Jɔɔdan Moo, korobiloɡle ta ɡɛ saŋ waa sua kohona, dɛ doŋi nɛra baa soɡe fɛlembɔjena bini, wee leebɔr ne wee cholibɔr ba bwa peɡre la.

¹⁶ Awola bɛl, laa tena bane le Bɛnjamen ne Juda deene ta ɡe, dɛ la Kooro Devid be bela waa soɡa o dekpeɡ la bini.

¹⁷ Asɛ Kooro Devid ir ka chem ba dɛ ŋɔ, “Dɛ deŋnesɔɔhna nee hɛɛ ba n be dɛ́ ba cha mɛ naa, n sɛoh kɛŋɔ ya nyoa pɛ. Kɛ dɛ he balɔ, dɛ́ ba lee mɛ tɛ n dɔma maa wola wechɔɡe bɛlbwa lii nɔ tenaa, Korowii ya naawa aa tomɔ laanee dɛ́ tɛr he deŋne.”

¹⁸ Korowii Doma baa so Amasae waa baa ɛ banyoola fifraatoro sitɔɔ la nɛ, asɛ o ŋɔ, “N naa Kooro Devid, henee dɔ yaa! He ne nɛra baa dɛ chae bwa dɔ hɛɛra. Korowii ɛɛ ja he nɛɛ.” Anomanta, Kooro Devid lɛɛ ba dɛ ɡel ba ɛ o laa sitɔɔla.

¹⁹ Manasɛ dea laa tena bane pere ba te, dɛ ba ja Kooro Devid nɛɛ ɡɛ saŋ o ne Filisti tena aa dɛ la ka yo Kooro Sɔɔl la. Kɛ o ne o laa tena ta Filisti tena la chae. Dɛ Filisti koranar la dɛ ɔmɛ kɛŋɔ wɛɛ le ba habɔɔ dɛ́ berɛ kaa o nomoa Sɔɔl be. Anomanta, ba ɡelɔ o berɛ ba Siklaɡ.

²⁰ Devid aa dɛ ba Siklaɡ la, Manasɛ dea laa tena pere ba te, dɛ ba ja o nɛ. Banee, Adna ne Josabad ne Jedial ne Maekel ne Josabad ne Elihu dɛ Siletai. Dɛ banee Manasɛ dea laa sitɔɔla, dɛ chɔ laa tena kaɡboŋa nyoo.

²¹ Banee cha Kooro Devid wɛɛ yo nɛra laa, dɛ yon lɔ ka tɔ nɛra nɛɛ dɛɛ pa ba laala, dɛkalkɛ ba bwa ɛ banyoola, dɛ ɛ o laa sitɔɔla.

²² Tɔpere bɛlbwaa nɛra yon baa ja Kooro Devid laa tena nɛ, a ta biɡre o laa tena warɛ, dɛ do kpeɡri kohona.

Kooro Devid laa tena

²³ Laa tena baa kpɔ ba te dɛ ba Kooro Devid be Hɛbrɔn, dɛ́ ba yo Kooro Sɔɔl, dɛ́ lɛ o kora tɛo ɡɛ Korowii aa bola laanee teŋa nɔ.

²⁴ Juda dea laa tena baa kpoŋe kwaa baa kpɔ tɔ ba te ɡbemɡbe, ne lampeare lɔ kaɡboŋa banumɛl lafraanuatoro,

²⁵ Simeon dea banyoola baa kpɔ ba te, dɛ́ ba yo laa lɔ kaɡboŋa banuanɛ dɛ lafa,

²⁶ Lewi dea laa tena ɡe lɔ kaɡboŋa banaarɛ lafraanumɛl,

²⁷ ne Jehoiada waa ɛ Arɔn dem nomoa. O kpoŋe laa tena kaɡboŋa batoro lafraanuanɛ,

²⁸ ne Sadɔk waa ɛ banyoo waa kpeɡa kohona, nomonome fifraanɛ dɛ banɛ le o dem dɛ ja o nɛ,

²⁹ ne Bɛnjamen dea laa tena, ba ɛ Kooro Sɔɔl lolanar. Ba lɔ kaɡboŋa batoro, dɛ ba fa teŋɛ Kooro Sɔɔl nɛ, dɛ le o habɔɔ taraken,

³⁰ ne banyoola baa le Efrem dea, dɛ ba dɔ sɔna ba deene. Ba ɡe lɔ laa tena kaɡboŋa fifraanɛ lafraanuatoro,

³¹ ne Manasɛ dea pera tena baa lee ba cheɡ ŋɔ bá ba cheɡ Devid kora ta. Ba lɔ laa tena kaɡboŋa fi dɛ banuatoro,

³² ne Isaaka dea baala, banee dɛ wobɛlbwa ba Israel harɛ ta ɡɛ saŋ aa, ba yon tɔ a sie dɛ baɡle ŋwɛnɛ baa kpɔ a ta. Ba lɔ koranar lafraanɛ, ba lolanar bwa ja ba nɛ,

³³ ne Sebulon dea laa tena baa dɔ laa yoi wejema kpɔ ba te, dɛ kpoŋe dɔmkwaa bwa soo siwi. Ba balɔ dɛ ba cha Devid bambile bwa ne, dɛ yo tɛo. Ba lɔ kaɡboŋa fifraanue.

³⁴ Naftale dea ɡe laa nomonome lɔ nɛra kaɡboŋ, dɛ baala kaɡboŋa fifraatoro dɛ banuanɛ, baa cheɡɛ kwaa baa kpɔ tɔ ba te ɡbemɡbe laa ta ne lampeare,

³⁵ ne Dan dea laa tena baa kpɔ ba te, dɛ́ ba yo laa, ba lɔ kaɡboŋa fifraanɛ dɛ banuatoro lafraanumɛl,

³⁶ ne Aasa dea laa tena baa dɔ laa yoi wejema, dɛ kpɔ ba te dɛɛ ba bá yo laa. Ba lɔ baala kaɡboŋa fifraanaarɛ,

³⁷ ne Rubin ne Gad deene, dɛ Manasɛ dea pera laa tena baa le Jɔɔdan Moo wee leebɔr baa kpoŋe dɔmkwaa bwa soo siwi. Ba ɡe lɔ laa tena kaɡboŋa lafa fifraanɛ.

³⁸ Gɛ laa tena nɔ bwa kpɔ ba te, dɛ ba Hɛbrɔn sibeɡra ne kɛŋɔ, bá ba cheɡ Devid kora Israel harɛ ta. Dɛ Israel tena la kar bwa dɔ liire beŋkpoŋ kɛŋɔ, Devid ɛ kooro Israel harɛ.

³⁹ Laa tena la di Devid be bela tɔpera atoro, dɛ di kwaa dɛɛ nyɔ sen ba bala Israel tena aa ɛa ba tɛɛ ba la.

⁴⁰ Deene ane kɛŋɔ Isaaka ne Sebulon, dɛ Naftale deene tena ɡe le bojaŋa, dɛ kpɔ nyoɡmare ne keeɡore ne nabala aa cheɡɛ kondikwa ne men aa kpera kɛrɛdɛ, ne fiɡ daa nɔna aa hola nɔn del, ne daa nɔna ane ɡe aa hola nɔn del, ne sen dɛ ɔleve no. Ba kpɔ nae ne peera aa wara ba ba kpo di, dɛkalkɛ silɛɛ tentenee ba Israel harɛ ta bwa.