1 Webena 11 - mzwDBL

Devid di kora Israel ne Juda harɛ

¹ Israel tena bwa ba Devid be Hɛbrɔn dɛ ba ŋɔ, “Ya bwa ɛ he lolanar dɛ ɛ nɛmbeŋkpoŋ.

² Kooro Sɔɔl fa aa ɛ ya kooro la, dɛ henee tɔ ya Israel tena sie dɛɛ la ya ne laa. Asɛ Korowii he naawa aa tomɔ la ŋɔ he be ŋɔ, ‘Henee dɛ́ nyiŋi n nɛra Israel tena nɛɛ kɛŋɔ peteɡre ken, dɛ́ ɛ ba kooro.’ ”

³ Anomanta, Israel nomonome la bwa ba Devid be Hɛbrɔn, o ne ba fɔwɛ fɔo Korowii sie bela, asɛ ba fuɡe noo do Devid nyu ta dɛ cheɡo kora ta Israel harɛ ta, ɡɛ Korowii aa cheɡɛ Samoɛl nɛɛ dɛ bol la.

Kooro Devid yo Jerusalam tena dɛ pɔ ba nɛ

⁴ Kooro Devid ne Israel tena bwa kpɔ ba te kaa Jerusalam, dɛ ba fa dɛ yerɔ Jebus, dɛ ka yo Jebus tena baa soɡe bela,

⁵ Jebus tena la ŋɔ Kooro Devid be ŋɔ, “Haa won ba ya be bonɔ.” Kɛ ane a bwa, o yoo dɛ lɛ Jerusalam, asɛ baa yerɔ Kooro Devid Bwɛjen ne o danjwɛkpeɡ.

⁶ Dɛ Kooro Devid fa bolɔ ŋɔ, “Nomɛlbwa waa tɔ laa sie dɛ́ ka yo Jebus tena la, onee dɛ́ ɛ nomoa dɛɛ tɔ laa tena sie.” Joab o nya aa ɛ Seruya laanee wona ir dɛ tɔ ba sie la ba be, asɛ ba kpɔ laa sitɔɔ la tɛo.

⁷ Belaa Kooro Devid ka so Jerusalam baa ma danjwɛɛ baro la ta. Gɛɛ a do baa yerɔ Kooro Devid Bwɛjen.

⁸ O berɔ kwaa ma deene bar danjwɛɛ la. Deŋɡare la wee leebɔr pera harɛ waa baro la taa, ba che bwea su bɔɔ la mɔɔ, o le bela dɛ mao, asɛ Joab ba kwaa ma o kar.

⁹ Kooro Devid teŋɔ di kpeɡri kohona, dɛkalkɛ dɛ Nemenɛ Korowii ja o nɛ.

Kooro Devid banyoola baa dɔ sɔna

¹⁰ Kooro Devid banyoola ne Israel tena bwa baa chao o won di kora, ɡɛ Korowii aa baɡ ba nyoa, o kora che kiŋkiŋ laanee teŋa nɔ.

¹¹ Banyoo waa ɛ banyoola batoro la bwa nomoa laanee Hakmɔn te Jasobeam. Onee kpɔ o lampea yo baala lafraatoro, dɛ kpoo ba laa bɛl ta la.

¹² Nɛɛte waa ja banyoola batoro la nɛɛ ɡee Dodai bibaa Eliasa, o le Aho dea.

¹³ Dɛ o ja Kooro Devid nɛɛ o ka yo Filisti tena, Pas Damim. Dɛ mea koo bɛl chɔ bela, asɛ ba chwa le Filisti tena la be.

¹⁴ Kɛ o ne o laa tena lɔ bambile che koo la baah ta, dɛ yo Filisti tena la. Korowii ɡelɔ o kpoo ba kɛrɛdɛ awola.

¹⁵ Awola bɛl, laa nomonome la bini fifraatoro la bini batoro ba Kooro Devid be, Adulam bwebɔɔ la ta. Dɛ Filisti laa tena ɡe boa ba nyoa, dɛ cheme Refaim Fɛlembɔjen bini.

¹⁶ A ɡɛ saŋ dɛ Kooro Devid soɡe bela baa ma danjwɛkpeɡ baro deŋɡare bɛl doa, asɛ Filisti laa tena ɡe do Bɛtlɛham.

¹⁷ Nyɔɡre dɛ kpo Kooro Devid, asɛ o ŋɔ, “N dɛ nyin nomɛl fe aa kaa dɔ nee kɔlɔŋ waa chɔa bɛne Bɛtlɛham doonyojen la ta ba tɛ mɛ ń nyɔ!”

¹⁸ Anomanta, banyoola batoro la kpɔ bansua jo harɛ Filisti laa tena la aa soɡe o ta la ta, dɛ ka dɔ nee le kɔlɔŋ waa chɔa bɛne Bɛtlɛham doonyojen bini la ba tɛ Kooro Devid. Kɛ o vɛh nee la nyɔe, dɛ fuɡe ta harɛ tɛ Korowii.

¹⁹ Asɛ o ŋɔ, “Korowii ɛɛ la ane bojaŋ kɛŋɔ ń nyɔ nee nɔ. Aa ɛo kɛŋɔ maa dɛ nyɔ baala baa ta ba nyu, dɛ won la ka dɔ nee nɔ ba tɛ mɛ nɔ chal.” Anomanta, o vɛh nee la nyɔe. Waa banyoola batoro la aa ɛa laanee la.

²⁰ Ate, Joab nime Abisae, onee fa chɔ nomonome batoro, ba ɡe aa ɛ banyoola la nyoa. O kpɔ lampea ka yo baala lafraatoro dɛ kpoo ba. Gɛ taa a che o lɛ sɔn kɛŋɔ banyoola batoro la.

²¹ A lole kɛ dɛ baa on kure dɛɛ ja banyoola batoro la nɛ, kɛ onee bera ba chɔ ba bwa nyoa dɛ lɛ sɔn kohona.

²² Dɛ Jehoiada bibaa Bɛnaya ɛ nɛn waa won yoi kɛrɛdɛ dɛ le bwɛjen Kabseel ta, o ɡe ɛ wejena kɛrɛdɛ. Onee wona kpo Moab baala banɛ baa won yoi kɛrɛdɛ la. O berɔ jo bɔɔ bini, awola bɛl, dɛ dombwea leero dɛ ka kpo nyujente.

²³ O berɔ kpo Ijipt te bɛl ɡe, dɛ o kpeɡo kɛrɛdɛ, o jaŋne ɛɛ ɛ naɡale anuanɛ ne tamaa. A lole kɛŋɔ dɛ Ijipt te la kpoŋe lampeajen, kɛ Bɛnaya kpɔ o ɡuli la o be sibeɡra ne, dɛ ka to o lampea le o nɔn ta, dɛ kpɔ kpoo.

²⁴ Waa Bɛnaya aa ɛa laanee la. O ɡe lɛ sɔn kɛŋɔ banyoola batoro la ken.

²⁵ Ba tɛo duure kohona ɡwaa banyoola fifraatoro la bini bɛlbwa, kɛ ba ta on kpɔe ja banyoola batoro la nɛ. Asɛ Kooro Devid ɡel o chɔ nɛra baa dɛ daahno la nyoa.

²⁶ Banyoola bane ɡe ba jaa laanee, Joab nime Asahɛl, ne Dodo waa le Bɛtlɛham bibaa Ɛlhanan,

²⁷ ne Samɔt waa le Harɔd, ne Hɛlɛs waa le Pɛlɔn,

²⁸ ne Ikes waa le Tekoa bibaa Ira, ne Abeɛsa waa le Anatɔt,

²⁹ ne Sibekai waa le Husa, ne Ilai waa le Aho dea,

³⁰ ne Maharai waa le Nɛtɔfa, ne Hɛlɛd, o mɛɛ sɔne Baana dɛ le Nɛtɔfa,

³¹ ne Itai o mɛɛ aa ɛ Ribai waa le Gebea, dɛ do Bɛnjamen dea, ne Bɛnaya waa le Peratɔn,

³² ne Hurai waa le Gaas Fɛlembɔjena bɔr, ne Abiel waa le Aaba,

³³ ne Asmavɛt waa le Baharum, ne Eliaba waa le Saalbɔn,

³⁴ ne Hasem waa le Gesɔn bibaala, ne Jonatan, o mɛɛ sɔne Saɡee dɛ le Harar,

³⁵ ne Ahiam, o mɛɛ sɔne Saka dɛ le Harar, ne Ur bibaa Elifal,

³⁶ ne Hɛfa waa le Mɛkera, ne Ahija waa le Pɛlɔn,

³⁷ ne Hesro waa le Kaamɛl, ne Ɛsbae bibaa Naarai,

³⁸ ne Joel, o nime sɔne Netan, ne Haɡri bibaa Mibhar,

³⁹ ne Amɔn te baa dɛ yerɔ Sɛlɛk, ne Naharai waa le Bɛrɔt, onee dɛɛ che Seruya bibaa Joab dɔmkwa,

⁴⁰ ne Ira waa le Itri, ne Gareb o ɡe aa le Itri,

⁴¹ ne Uria waa ɛ Hiti te, ne Alae bibaa Sabad,

⁴² ne Sisa bibaa Adina waa le Rubin dea, dɛ o ɛ Rubin dea kooro asɛ nɛra fifraatoro bane ja o nɛ,

⁴³ ne Maaka bibaa Hanan, ne Josafat waa le Mitan,

⁴⁴ ne Usia waa le Astɛra, ne Jeyɛl ne Sama, ba mɛɛ sɔne Hotam dɛ le Arowa,

⁴⁵ ne Simri bibaa Jedial, dɛ o nime Joha waa le Tis

⁴⁶ ne Eliel waa le Mahava, ne Jɛrebai dɛ Josavia, baa ɛ Ɛlnaam bibaala, ne Itma waa le Moab,

⁴⁷ ne Eliel ne Ɔbɛd, dɛ Jaaseɛl waa le Mɛsoba.