1 Webena 10 - mzwDBL

Kooro Sɔɔl seo wa

¹ A kaa ba kɛ Filisti tena ne Israel tena cheme Gelboa Bwejen ta dɛ́ yo laa. Ba kpoo Israel tena ɡalɡa Gelboa Bwejen ta.

² Filisti tena la chwao ti Kooro Sɔɔl ne o bibaala batoro, Jonatan ne Abinadab dɛ Malki Sua sibeɡra ne dɛ kpoo o bibaala la.

³ Laa la baa do kpeɡri tɛ Kooro Sɔɔl, asɛ o dɔma la bɛl ta hɛm yaɡɔ dɛ doo bol kohona.

⁴ Asɛ Kooro Sɔɔl ŋɔ o bonɔɔ waa dɛ che o dɔmkwaa la be ŋɔ, “Pamɛ he kere la dɛ́ ba tɔɡ mɛ kpo, ásɛ nɛra baa wola Korowii tomɛ nɔ, bɛ men ba kpo dɛ́ chɛɡ mɛ ja.” Kɛ dɛ bonɔɔ la dɛ ɔmɛ kɛ ó ɛ ɡɛ, anomanta, Kooro Sɔɔl pamɛ o ɡbaɡba kere dɛ chole o ta.

⁵ Bonɔɔ la aa naa kɛ Kooro Sɔɔl sewɔ la, o ɡe chole o kon ta dɛ sewɛ ja o nɛ.

⁶ Gɛɛ a do Kooro Sɔɔl ne o bibaala batoro ne o dem tena bwa serewe, nomɛlbwa ta o luɡe ta leɛ ba di kora kpa.

⁷ Israel tena baa soɡe Jesreel Fɛlembɔjen bini aa noa kɛŋɔ laa tena la bwa chwao, asɛ Kooro Sɔɔl ne o bibaala bwa ɡe serewe la, ba chwao ɡel ba bwɛɛre, asɛ Filisti tena la ba so a ta.

⁸ Tɔ aa pera la, Filisti tena la laŋɔ dɛ ka pa laa tena baa kpoo ba la laala, asɛ dɛ na Kooro Sɔɔl ne o bibaala batoro la kɛ baa serewa chɔ Gelboa Bwejen ta.

⁹ Ba teŋe Kooro Sɔɔl nyu, dɛ pa o dɔmkwaa ja, dɛ tomɛ toroma Filisti harɛ la ta bwa ŋɔ bá ka bol amanesoma nɔ ba voɡa deene ne nɛra bwa be.

¹⁰ Ba kpɔ Kooro Sɔɔl dɔmkwaa la ka bil ba voɡare deene bini, dɛ kpɔ o nyu saɡɛ ba voɡ Daɡɔn dea.

¹¹ Bwɛjen Jabes waa lɔ Gelead harɛ tena la aa noa ɡɛ Filisti tena la aa ɛ Kooro Sɔɔl la,

¹² ba bini banyoola laŋɔ ka kpɔ Kooro Sɔɔl ne o bibaala baa kpoo ba, dɛ ba ba ne Jabes. Ba huɡ ba dajen bɛl mun bela, dɛ vɔwɛ nyoa tɔpera anuanɛ.

¹³ Kooro Sɔɔl kasinteŋ bɛ dɔe dɛ tɛ Korowii waa o sewɛ. O ta Korowii waa ta teŋɛ, hale dɛ ka bɔɔ dɛɛ le nɛn waa dɛ yerɛ lala be, ó baɡlo waa waa ɛ,

¹⁴ dɛ vɛh Korowii nɛɛ teŋa. A waa Korowii kpoo, dɛ berɛ kora la tɛ Jese bibaa Devid.