1 Timoti 5 - mzwDBL

Waa aa chɛ kɛ asɔre tena ɛ

¹ Dɛ baa waa ɡwaale nomoa ɛ waane aa wola weraa, bɛ o nɛɛ nyɛɡ, kɛ bol waa baɡlo kɛŋɔ he ɡbaɡba mɛɛ, ásɛ dɛɛ ɛ bibaala haa ɛ nomoa ka tɛɛ ba la ɡe kɛŋɔ he ɡbaɡba nimanar,

² dɛ́ kpɔ haahna baa ɡwaale nomonome la ɛ he nyare. Ásɛ bihaahna haa ɡwaa ba la ɡe, hɛ́ɛ ɛɛ ba kɛ he nimambii, wedoŋa bɛlbwa bɛ he ne ba baah ta do.

³ Haahna ba jaranar aa serewa baa wola nomɛlbwa dɔe ó nyiŋi ba nɛɛ la, dɛɛ duu ba dɛɛ cha ba.

⁴ Kɛ dɛ luhaah bɛl lole dɛ dɔ bii kɛɛ naanar aa, a chɛ kɛ ba jemɛ ɡɛ ba ne waa so, ba nyiŋu, dɛkalkɛŋɔ a wer kɛŋɔ nɛra baa dɛ teŋɛ Korowii waa ta la ɛɛ ɛ wedɛɛɡa dɛɛ nyiŋi ba lolanar ɡɛ ba ɡe fa aa koh ba nɛɛ la. Gɛɛ dɛɛ su Korowii siwi.

⁵ Luhaah waa nyaa o ta nɛn dɔe ó nyiŋi o nɛɛ la te, Korowii nɛɛ o sie dawɛ wɛɛ soŋo chɔɔ ne jwaana bwa ó chao.

⁶ Kɛ luhaah bodia wa aa dɛ lɛ o sie la, o soɡe le te, kɛ o do kɛŋɔ nɛn waa sewa.

⁷ Ja ba ɡɛ waa nɔ ta, ásɛ nɛra bɛ ba bwara wechɔɡe dɔ bol.

⁸ Dɛ nomɛl lole, waa o nya ne o mɛɛ kɛɛ o dem tena nyiŋi aa, naate Korowii toma ɛ pɛɛ. Naate waa wola Korowii yarada ɡba bɔɔ.

⁹ Bɛ luhaah waa wola bene fifraanumɛl dɔe mɔɔ la kure ja luhaahna maa bol ba waa ŋɔ hɛ́ɛ cha ba dɛɛ nyiŋ ba la nɛ. Luhaah waa dɔ bene fifraanumɛl, waa wola baa bɛlbwa jemɛ ka ja o jaa nɛ,

¹⁰ nɛra bwa jemɛ o wedɛɛɡa waa ɛa wa, kɛŋɔ waa wona dɛɛ o bii ŋwɛnɛdɛɛɡe ta ba ɛ bechadɛɛɡa, dɛ won dɛɛ kpoŋe hɔɔhra kɛrɛdɛ, dɛ pwɛr o te ɛ toma tɛ asɔre tena, dɛ won cha nɛra wa aa puu ba, asɛ dɛ won kpɔ o te bwa tɛ wedɛɛɡa ɛɛ ɡbo la waa mɛɛ bol he be ŋɔ hɛ́ɛ nyiŋi ba nɛɛ la.

¹¹ Bɛ luhaahna ba taa ɛ toli kure ja luhaahna maa bol ba waa nɔ nɛ, dɛkalkɛ ba pɛla ɛɛ ba lawɛ yalee, ba ɡel Yeesu Kristo toma la dɛ́ ka yalɛ,

¹² ásɛ a ɛ wechɔɡa tɛɛ ba kɛŋɔ ba fa aa bola ŋɔ Yeesu Kristo toma ɡboo baa ba ɛɛ, dɛ berɛ vɛh la.

¹³ Luhaahna nɔ dɔŋa, baa wedɛɛɡa bɛlbwa dɔe dɛɛ ɛ ka ja kɛŋɔ baa dɛ ɡaaɡe dɛɛ valɛ deremi ta pɛɛpɛɛ. A ɡbo laa. Ba kpɔ nyoa dɛɛ do nɛra waa ta, dɛɛ ŋwalɛ nɛra, asɛ dɛɛ bol waa aa wola chɛɛ kɛŋɔ ba bol bwa.

¹⁴ Anomanta, dɛ luhaahna ba taa ɛ toli la yalɔ dɛ loɡle bii, dɛ won ba deremi ta nyiŋa, ɡɛ aa ɛ ásɛ ya dɔma bɛ wedoŋa bɛlbwa dɔ bol yaɡɛ yaa aa, ɡɛɛ n fe ɛɛ nyin.

¹⁵ Taraken ɡba, luhaahna bane dɔɔ le Yeesu Kristo habɔɔ dɛ ka teŋɛ Bɔnsam nɛɛ tonɛ.

¹⁶ Haah bɛlbwa waa ɛ asɔre te asɛ luhaahna do o dem la, ó takapɔ kɛ wɛɛ nyiŋi luhaahna laanee, ásɛ dɛ bɛ koeh la bwa kpɔ dawɛ asɔre tena nɛ, ɡɛ aa ɛ ásɛ asɔre ɡe won nyiŋi luhaahna la baa wola nɛra dɔe bá nyiŋi ba nɛɛ la.

¹⁷ Asɔre nomonome la baa dɛ tɔ asɔre tena sie kɛrɛdɛ la chɛ kembɔr bele anɛ. Banee kɛŋɔ banɔ la ba sie aa dɛ beɡre Korowii Waa la bola ne a chaɡla ta la,

¹⁸ dɛkalkɛ a lɔ Korowii Tɔn la bini kɛ, “He bɛ nao waa dɛ ɛ toma he koo ta la nyoa vɔwɛ dɛ́ ŋɔ o bɛ kwaa di.” Dɛ berɛ chwerɛ do o bini ja ŋɔ, “Tom-ɛɛ bɛlbwa kembɔr chɛo.”

¹⁹ Dɛ nomɛl ba he be dɛ ba kpɔ waa dɛ dawɛ asɔre nomoa bɛl aa, bɛ no nemenɛ nɛn nɛɛte ne toorote baa di danseɛ kɛ waa la ɛ kasinteŋ mɔɔ he no dɛ́ kpɔ ɛ wa.

²⁰ Dɛ bɛl ɛ wechɔɡa aa, yerɔ cheme asɔre tena la bwa sie dɛ́ kaoh. He ɛ ɡɛ naa, nɛra baa lɔ bela dɛ na la ɛɛ ɔmɔɔ dɛ laa ba te dɛɛ kpɔ wechɔɡa ta.

²¹ N cheɡɛ Korowii ne Yeesu Kristo ne nyundua toroma la bwa sie dɛ kpɔ waa nɔ dɛɛ tɛɛ, ásɛ he we-ɛɛla bwa ta la, he bɛ ɡel nɛra bane waa su he siwi dɛ ɡwaa bane, kɛ dɛɛ ɛ ba bwa kɛrɛdɛ.

²² Bɛ totoo kpɔ nɔɔra dawɛ nomɛlbwa nɛɛ dɛ leo ŋɔ ó ɛ Korowii toma, ásɛ dɛ naate ta ba wone kpoŋe tom la bini dɛ ka ɛ wechɔɡa aa, a ba maali. Nyiŋi he te kɛrɛdɛ dɛ bɛ ɡel wedoŋa bɛlbwa maali.

²³ He tea la ne ɡɛ he bwara yon dɛɛ wee warawara la nomanta, bɛ nee ɡbo dɛɛ nyɔ kpa. He ɛo waa, hɛ́ɛ nyɔ sen ɡe tama.

²⁴ Nɛra bane lole, ba te ne wechɔɡa ɛɛ dɛ nɛra bwa nao, a yon che a ta ba la ba ne kɔɔto ka pa ba bolchɔɡe. Kɛ nɛra bane ɡe ɛ wechɔɡa aa, waa la peu dɛ kaa kwaraa mɔɔ nɛra jemɛ.

²⁵ Gɛ tentenee wedɛɛɡa ɛɛ ɡe aa wola won sɔh. Dɛ nɛn ɛ wedɛɛɡa sɔh ɡba aa, aa le baŋee.