1 Timoti 3 - mzwDBL

Nomonome baa lɔ asɔre ta wa

¹ A ɛ kasinteŋ kɛŋɔ dɛ nɛn ŋɔ wɛɛ tɔ asɔre tena siee yaa, dɛ tondɛɛɡa tentenee naate ɛɛ nyin la.

² A ɡɛ nɛn la, a ta chɛ kɛŋɔ nɛra dɔ o wechɔɡe bol. A chɛ kɛ o haah ɛ beŋkpoŋ. A chɛ kɛ o won o te lawa, dɛ dɔ nfɛrɛ, o we-ɛɛla ɛɛ lɛ nɛra sie. A chɛ kɛ o ɛ nɛn waa won hɔɔhra kpoŋa, dɛ won Korowii Waa baɡla.

³ A ta chɛ kɛŋɔ ó ɛ sennyɔdɛɛ, ó bɛ naɡrenyini ɛ. Kɛ ó ɛ nɛn waa pwɛra, waa wola o bwara ne waa nyin. A ta chɛ kɛ o siwi beɡre suuɡa.

⁴ A chɛ kɛ ó won o haah ne bii nyiŋa, asɛ o bii ɛɛ no o deŋna waa dɛɛ tɛo duure.

⁵ Dɛ nɛn aa won o haah ne bii nyiŋi aa, ɛrɛɛ wɛɛ ba ɛɛ dɛ́ won nyiŋi asɔre tena nɛɔ?

⁶ A chɛ kɛ ó ɛ nɛn waa kpɔ o te tɛ Korowii dɛ yaradao biɡri, ɡɛ aa ɛ nɛra waa tɔ ba sie la nomanta, o nyu bini bɛ on som ba do ó maŋkura o te kohona, ásɛ o ba jo Korowii nɛɛ ɡɛ Bɔnsam aa ɛa la.

⁷ A chɛ kɛ ó ɛ nɛn nɛra baa wola asɔre tena ɛɛ kwara aa dɛ yerɛ o sɔndɛɛɡe, asɛ o bɛ sihiih waane ba ɛ dɛ́ le Bɔnsam bel ta.

⁸ Nɛra baa chɔ tomare nyoo asɔre la ta la ɡe, ɡɛ. A wer kɛŋɔ baa ɛ waa aa dɔ duure, dɛɛ di kasinteŋ. Ba ta chɛɛ kɛ bá ɛ sennyɔdɛɛra, ba ta chɛɛ kɛ bá kpɔ suuɡa sibeɡra dɛɛ bɔ nɛra apoo.

⁹ A chɛ kɛ bá kpoŋe Korowii wesɔɔhla waa waa ɡela ya jemɛ la bini kiŋkiŋ, dɛɛ ɛ waa baa naa kɛ a toɡrɔ.

¹⁰ A wer kɛŋɔ hé nyiŋi ba waa bini, dɛ́ na dɛ ba waa wer mɔɔ he tɛɛ ba ŋwɛnɛ bá ɛ ɡɛ toma la.

¹¹ Ba haahna chɛ kɛ baa ɛ waa aa dɔ duure, dɛ bɛ nɛra dɛɛ ŋwalɛ. A chɛ kɛ bá won ba te lawa, dɛ́ kpɔ kasinteŋ dɛɛ ɛ wobɛlbwa.

¹² A chɛ kɛ nomɛlbwa waa chɔ asɔre tomare nyoa la haah ɛ beŋkpoŋ, dɛ́ won o haah ne bii nyiŋa kɛrɛdɛ.

¹³ Banɔ la baa dɛ ɛ ba toma kɛrɛdɛ la dɛ dɔ sɔn, dɛɛ do kpeɡri yarada baa dɔa dɛɛ teŋɛ Yeesu Kristo nɛɛ la ta.

¹⁴ N dɛ nyin kɛ n wonaa, ń ba nae. Kɛ n tɔ sie chwerɛ waa nɔ dɛɛ tɛɛ,

¹⁵ ásɛ dɛ n baa biɡri aa, tɔ́n nɔ baɡle ɡɛ aa chɛ kɛ yá banɔ la Korowii aa kpɔ yaa ɛ o dem tena nɔ so dɛɛ ɛ ya wa. Yanee Korowii waa lole saŋ bɛlbwa la toroma, o kpɔ o kasinteŋ waa la tɛ ŋɔ yá lawɛ a bini kpoŋe kiŋkiŋ, kɛ pila yon lawɛ dea kpoŋe la.

¹⁶ Ŋwɛnɛ yaa kpɔ o ta dɛɛ tomɛ Korowii nɔ, tɔŋla toole kɛ wesɔɔhla aa lɔ o ta, asɛ Korowii ɡel ya jemɛ la ɛ wejena kohona. Waa yaa lawɛ a bini kpoŋe laanee, Korowii baa berɛ o te nɛwɛnyini. O Domadɛɛɡe la ɡelɔ nɛra bwa jemɛ kɛ o waa toɡrɔ. Nyundua toroma nao. Nɛra bol o waa baɡle harɛ nɔ ta nɛra baa lɔ bobɛlbwa. Ba no o waa harɛ nɔ ta dɛ yaradao, asɛ Korowii kpɔɔ kaa nyundua o ka dɔ jirima.