1 Timoti 2 - mzwDBL

Korowii toma Mmarare dɛ asɔre tena wa

¹ Anɔ la aa tɔ sie mɛɛ ja asɔre tena kɛŋɔ báa teŋɛ a ta laanee kɛ hɛ́ɛ soŋe Korowii dɛɛ tɛ nomɛlbwa. Hɛ́ɛ soŋo dɛɛ jaamo wobɛlbwa ta.

² Hé soŋo dɛɛ tɛ koranar ne nɛra baa dɛ di nomonome bwa, ásɛ ya bwa so bosɔɔhna ta jeih ken, dɛɛ tomɛ Korowii ɡɛ aa chɛa, dɛɛ ɛ waa aa wera o be.

³ Gɛɛ wera, dɛɛ lɛ ya Lɛɛ Korowii sie.

⁴ O te dɛ nyin kɛŋɔ nomɛlbwa dɔ o nyu, ásɛ dɛ ba jemɛ kasinteŋ waa la.

⁵ Anee kɛ Korowii beŋkpoŋii lole, dɛ dɔ nachiɡe beŋkpoŋ do o ne nɛwɛnyini baah ta, o ɡe ɛ nɛn. Onee Yeesu Kristo

⁶ waa kpɔ o te tɛ kɛŋɔ ba kpɔɔ charɛ nɛra bwa nyu la. Gɛ saŋ aa chɛ kɛŋɔ waa nɔ maɡre la taa a den chiɡ la. O ɛ ɡɛ a ɛ danseɛ dɛ chɔ le saŋ bɛlbwa.

⁷ Anɔ waa Korowii lee mɛ ŋɔ ń lɔ a dawuro baɡle nɛra, dɛ́ berɛ ɛ Yeesu torome ɡe la. Kasinteŋii mɛɛ bol la, maa nyosone teŋe. Onee ɡela mɛɛ baɡle nɛra baa wola Juu tena ɛɛ la, ásɛ ba yarada Yeesu dɛ́ jemɛ kasinteŋ la.

⁸ N dɛ nyin kɛ bobɛlbwa baala baa ɛ asɔre tena la laa ba te kpɔ bandisale ne wetɔŋla ta, ásɛ dɛ won ɛ nɛndɛɛɡa dɛ́ ir nɔɔra soŋe Korowii.

⁹ Gɛ tentenee mɛɛ nyin kɛ dɛ haahna dɛ ba laala doe yaa, ba bɛ jwamanlaala ne laala a waa aa do bola dɛɛ do. Bá kpɔ laala aa maɡre ba ne, dɛ bɛ ba te kpɔ do nyuune ɛɛ aa dɛ ba kem ne, ne suuɡaswɛm koŋkwaare doe, ne yale a yoɡ aa kpeɡa liɡa ta.

¹⁰ Kɛ báa ɛ wedɛɛɡa kɛ haahna baa dɛ tomɛ Korowii. Ba wedɛɛɡa ɛɛ laanee dɛ́ ɡel ba do wer toli.

¹¹ A wer kɛŋɔ haahna ɛɛ pwɛr ba te, dɛ cheɡ deŋne dɛɛ no Korowii Waa baa dɛ baɡ ba la.

¹² N ta ŋwɛnɛ tɛɛ kɛŋɔ haahna di nomonome baala nɛɛ dɛɛ baɡle wa. A chɛ kɛŋɔ bá tɔ ba nyoa dɛɛ no,

¹³ dɛkalkɛ Adamee Korowii tɔ sie ta mɔɔ dɛ ta o haah Hawa.

¹⁴ Adam ɡe kwaraa laa Bɔnsam neɡre la. Hawaa o neɡre dɛ ɡel o ɛ wechɔɡa la.

¹⁵ Kɛ dɛ haahna kpoŋe Korowii yarada bini kiŋkiŋ, dɛɛ nyin nɛn, dɛ laa ba te dɛɛ kpɔ wedoŋa ta, baa wesale ɛ aa, Korowii ɛɛ ɡeloo ba dɔ ba nyu ba lola ta.