1 Tesalonika 5 - mzwDBL

Hé so kpa he dɔɔ bala

¹ Yabala, a ta chɛ kɛŋɔ ń chwerɛ dɛ́ baɡle heyaa tɔpere la waa nɔ aa dɛ ba chiɡa,

² dɛkalkɛŋɔ he bwa jemɔ kpela kɛŋɔ tɔpere ya Dɔɔ la aa ba la ɛɛ piɡruu kɛŋɔ ŋwɛɛ aa dɛ piɡri nɛn jwaana la.

³ Gɛ saŋ nɛra aa ba ŋɔ, “Bobɛlbwa sɔɔhnɔ, ya dɔ deŋnesɔɔhna name te” la, belaa dɛ harɛchɔɡ la ɛɛ ba ba piɡra. Wɛɛ piɡruu kɛŋɔ haah naa kpoŋe tea asɛ lol tea lɔɔ la ken. Gɛ saŋ la, baa bɔree dɔ dɛ chwa ka sɔh.

⁴ Kɛ yabala, he te toole biro ta, he sie chaah waa nɔ ta. Anomanta, Yeesu bala la aa heyaa piɡri kɛŋɔ ŋwɛɛ.

⁵ He bwa sekwara ɛ nɛra he sie aa chaah Korowii waa ta. Biro bini nɛra laa yan, bochaah ta nɛraa yan.

⁶ Anomanta, ya bɛ bɔhwaah ɛ kɛŋɔ bane aa dɛ ɛ la, kɛ hé ɡel ya sie chɔ harɛ yaa nyiŋi kɛrɛdɛ.

⁷ Bɔhwaahra ne nɛra baa dɛ dɛɛ te bwa ɛ biro bini nɛra.

⁸ Ya te yaa ɛ bochaah ta nɛra nɔ, hé ɡel ya sie chɔ harɛ, ásɛ dɛ kpɔ yarada ne nɛnnyin ɛ ya laa batakaare kɛŋɔ baa do laa batakaare dɛɛ yo laa la, dɛ́ berɛ kpɔ hwɛɡa yaa dɔa ya Dɔɔ Yeesu be kɛŋɔ wɛɛ lɛ yaa la ɛ buni ɡbɛrɛ dɛ́ kpɔ pi.

⁹ Korowii ta yaa tae ŋɔ yá ba di bolchɔɡe o sie. O ta yaa ŋɔ yá che ya Dɔɔ Yeesu Kristo nɛɛ dɛ́ dɔ ya nyu.

¹⁰ Onee sewa tɛ yaa, ásɛ awola o balaa, dɛ ya soɡe mkpa ta noo, sewaa ya sewɛ oo, yá ne Korowii won pɛ.

¹¹ Anomanta, hɛ́ɛ do dɔŋa ɡbemba dɛɛ cha dɔŋa, ɡɛ haa dɛ ɛ nɔ.

Jae ne kala aa ka mun

¹² Yabala, ya dɛ soŋe heyaa kɛŋɔ hɛ́ɛ duu nɛra baa ɛ he nomonome dɛɛ ɛ Korowii toma nɔ dɛɛ ja heyaa la.

¹³ Ba toma la nomanta, hɛ́ɛ duu ba kɛrɛdɛ, dɛɛ nyin ba wa. Hé ɡel he bwa nyoa pɛ.

¹⁴ Yabala, ya dɛ soŋe heyaa kɛ hɛ́ɛ ja banɔ la baa ɛ bɔhwaahra la, dɛɛ do ɔmeera la ɡbemba, dɛ lawɛ banɔ la baa wola cheɡɛ kiŋkiŋ Korowii ŋwɛnɛ ta la kpoŋe, dɛ́ dɔ bambile tɛ nomɛlbwa.

¹⁵ Hé nyiŋi kɛrɛdɛ dɛ bɛ ɡel bɛlbwa kpɔ wechɔɡa dɛɛ bɔ wechɔɡa kem, kɛ hé ɛ wedɛɛɡa dɛɛ tɛ he dɔŋa ne nomɛlbwa.

¹⁶ Hé ɡel he sie ɛɛ lɛ tɔpere bɛlbwa, wobɛlbwa ta,

¹⁷ dɛɛ soŋe Korowii saŋ bɛlbwa.

¹⁸ Hɛ́ɛ jam Korowii wobɛlbwa ta, dɛkalkɛŋɔ ɡɛɛ Korowii che Yeesu Kristo nɛɛ dɛɛ baɡle o tetoowaa he be.

¹⁹ He bɛ ɡel Korowii Domadɛɛɡe waa soɡe he nɛɛ la nyoa sɔɔh.

²⁰ He bɛ he bala baa dɛ na chaahna la nyoa dɛɛ vɛh.

²¹ Kɛ hé nyiŋi ba webaɡla, ásɛ dɛ lawɛ anɔ la aa wera la bini.

²² Hé laa he te kpɔ wechɔɡa bɛlbwa ta.

²³ Korowii waa dɛ tɛ yaa bosɔɔhna la, ó ɡbabir laa doŋa bwa kpɔ he nɛ, dɛ ɛ heyaa nɛndɛɛɡa ŋwɛnɛ bɛlbwa ta ka tel kɛŋɔ ya Dɔɔ Yeesu Kristo aa ba.

²⁴ Korowii waa le heyaa he ba ɛ o bii la, o ɛ kasinteŋ te. Onee dɛɛ ba heyaa nɛndɛɛɡa ɛɛ.

²⁵ Yabala, hé soŋe Korowii dɛɛ tɛ yaa.

²⁶ Hɛ́ɛ lea dɔŋa kɛrɛdɛ kɛŋɔ nyabii.

²⁷ N kpɔ ya Dɔɔ dɛɛ do heyaa kɛ hé kure tɔn nɔ baɡle yabala la bwa sekwaraa.

²⁸ Ya Dɔɔ Yeesu Kristo waa dɛ na nɛra sum la cha he bwa sekwaraa.