1 Tesalonika 4 - mzwDBL

Sodɛɛɡa aa dɛ lɛ Korowii sie

¹ Anɔ la aa jaa la, yabala, waa la haa hwela ya be ɡɛ aa chɛ kɛ he so ásɛ Korowii sie lɛ he nɛɛ la, ɡɛɛ hɛɛ ɛ la. Ya cheɡɛ ya Dɔɔ Yeesu naa ta dɛɛ ja heyaa ŋɔ a chɛ kɛ he ɛ dɛ ɡwaa ɡɛ.

² He jemɛ waa yaa cheɡɛ ya Dɔɔ Yeesu nɛɛ dɛ bol baɡle heyaa la.

³ Korowii dɛ nyin kɛ he ɛ nɛndɛɛɡa dɛ laa he te kpɔ jwamane ta.

⁴ Báa bɛlbwa nyiŋi kɛrɛdɛ kɛ wɛɛ mo haahnee ŋwɛnɛdɛɛɡe ta.

⁵ He bɛ siyala ne sibeɡra ŋwɛnɛ ta kpɔ kɛ nɛra baa wola Juu tena ɛɛ baa wola Korowii tomɛ la.

⁶ Nomɛlbwa bɛ o dɔŋ nɛɛ jo a ɡɛ waa nɔ ta, dɛkalkɛ Korowii ɛɛ tɛr nɛra baa dɛ ɛ ɡɛ la deŋnee, ɡɛ yaa ja heyaa loɡla la ŋɔ hé nyiŋi a ta kɛrɛdɛ la.

⁷ Korowii aa le yaa ŋɔ ya ɛ o bii la, o ta ŋɔe ŋɔ yá ba ɛ wedoŋa. O ŋɔ yá ba ɛ wedɛɛɡa.

⁸ Nomɛlbwa waa wola a ɡɛ waa nɔ ta teŋɛ la, dɛ nɛwɛnyini waa laa o vɛh, dɛ Korowii waa tɛ heyaa o Domadɛɛɡe la waa o vɛh.

⁹ Too. Ane ɡee la. A ta hiaih kɛ ya berɛ baɡle heyaa dɔŋa nyina waa kpa, dɛkalkɛŋɔ Korowii baɡle heyaa ŋɔ hé nyin dɔŋa.

¹⁰ Kasinteŋ, he dɛ nyin he bala baa lɔ Makidoonia harɛ la bwa. Yabala, ya dɛ soŋe heyaa kɛ he bɛ waa nɔ ɡel, kɛ hé ɛ ɡwaa ɡɛ.

¹¹ Hé takapɔ dɛ́ ɛ he te nɛŋɡwɛɡra dɛ bɛ nɛra waa ta dɛɛ jo. Hé kpɔ he bokpeɡa ɛ toma, dɛ bɛ he te kpɔ dɛɛ dawɛ nɛra nɛ, ɡɛ yaa ŋɔ he be wubwa la.

¹² He dɛ ɛ ken aa, hɛɛ dɔ jirima nɛra baa wola asɔre tena ɛɛ la bee, haa he tenee kpɔ dawɛ nɛra nɛ.

Ya dɔɔ la bala

¹³ Yabala, ya dɛ nyin kɛ ya bol yabala baa serewa la wa, ásɛ he tea bini bɛ chɔɡ kohona kɛŋɔ nɛra baa kaa, baa wola hwɛɡa dɔe kɛŋɔ yaa ir seo taa la.

¹⁴ Ya yaradao kɛ Yeesu sewɔ dɛ ir. Gɛ tentenee yaa yarada kɛŋɔ Korowii dɛ ba banɔ la baa yarada Yeesu mɔɔ dɛ serewe la kpɔe dɛ́ ja Yeesu nɛɛ ba ne o ba ɡɛ saŋ waa ba la.

¹⁵ Ya Dɔɔ la waa waa bolaa nɔ. Ya banɔ la yaa so le dɛ ka tel ɡɛ saŋ ya Dɔɔ la aa ba la, yaa yabala baa serewa la siee tɔ kaa ya Dɔɔ be,

¹⁶ dɛkalkɛŋɔ ya Dɔɔ la ɡbabir ɛɛ le nyundua dɛ́ tu ba, dɛ́ ba yerɛ o nɛra takpeɡ ne, ásɛ o nyundua toroma nomoa ɡe yerɛ, Korowii bɛla si tɔ o sie, ásɛ banɔ la baa yarada Yeesu Kristo mɔɔ dɛ serewe la ir,

¹⁷ ásɛ Korowii kpɔ ba ne ya banɔ la ɡe ya ta aa soɡe le ɡɛ saŋ la bwa kaa nyundua baama bini, dɛ́ ka cheme ya Dɔɔ bela, ásɛ ya ne o so saŋ bɛlbwa.

¹⁸ Anomanta, hé kpɔ waa nɔ dɛɛ larawe dɔŋa bwara.