1 Tesalonika 3 - mzwDBL

¹ Ya haŋrɔ kahonɛ, yaa wola he waa no la, ya liiro kɛŋɔ aa do werii kɛ ya tomɛ Timoti he be ásɛ a ka ya nɛra banɛ ɡbo Atens.

² Timoti ɛ ya dɔŋ dɛ ɛ Korowii torome dɛɛ bol Yeesu Kristo Amanesoma la wa. Ya tomɔ ó ba do heyaa ɡbemba dɛ́ ja heyaa he yarada haa dɛ yarada Korowii la bɔr,

³ he bini bɛlbwa bɛ wahala nɔ waa koh dɛ́ chwa. He bwa jemɔ kɛ ɡɛɛ chɛ kɛ ya na.

⁴ Ya ne haa lole la, ya bol wahala nɔ waa dɛ ba bala nɔ waa he be he jemɛ wubwa. Asɛ ɡɛ yaa ŋɔa laanee bala la.

⁵ A waa ɡela n haŋre kahonɛ dɛ tomɛ Timoti, ásɛ dɛ jemɛ he yarada bini kɛŋɔ Bɔnsam ken baa neɡre heyaa dɛ ɡel ya toma yaa baa ɛ la ken ɛ pɛɛpɛɛ.

Gbemba wobol aa le Timoti be

⁶ Kɛ taraken Timoti aa le he be ba la, o ba amanesoma ne kɛŋɔ he dɛ yarada Korowii dɛɛ nyin nɛra ɡe. O ŋɔ ya be ŋɔ he dɛ lii ya waa kɛrɛdɛ tɔpere bɛlbwa, dɛɛ nyin kɛ he na yaa ɡɛ yaa dɛ nyin heyaa dɛ na la.

⁷ Yabala, ya wahala ne ya wenaale yaa dɛ na nɔ, ya ɡel a bwa. He yarada ɡelɔ ya baah sɔɔh yaa he wa.

⁸ Dɛ he lawɛ Korowii waa la kpoŋe kiŋkiŋ naa, dɛ ya dɔ bokpeɡa.

⁹ Bɔkwa jaamee yaa ba wona kpɔ tɛ Korowii he waɔ? Silɛɛ yaa dɔa le Korowii be nɔ kan. He waa ɡela ya sie lɛ la.

¹⁰ Ya dɛ soŋe Korowii chɔɔ ne jwaana bwa, ásɛ dɛ na he siebɔr ja, dɛ́ bol waa aa dɛ ba wona cha heyaa he yarada bini, ásɛ he do kpeɡri ja.

¹¹ N Naa Korowii ɡbabir waa bera ɛ ya Mɛɛ la ne ya Dɔɔ Yeesu ɛɛ chaɡle yaa ŋwɛnɛɛ ya ba he be.

¹² Yá Dɔɔ Yeesu ja heyaa dɔŋa nyina kɛrɛdɛ, ásɛ hɛɛ nyin nomɛlbwa ɡɛ yaa dɛ nyin heyaa la.

¹³ Wɛɛ ɡeloo he do kpeɡri, dɛ bɛ wechɔɡa dɔ, dɛ́ ɛ nɛndɛɛɡa N Naa Korowii waa ɛ ya Mɛɛ la be, awola o ne o toromedɛɛɡa la bwa aa ba la.