1 Samoɛl 9 - mzwDBL

Korowii le Sɔɔl asɛ Samoɛl fuɡe noo do o nyu ta

¹ Baa bɛlee fa lole dɛ le Bɛnjamen dea baa yerɔ Kes. O mɛɛ sɔne Abiel, o nabaa sɔne Sɛrɔ. Sɛrɔ mɛɛ sɔne Bɛkɔrat, o ɡe mɛɛ Afiaa. Dɛ a ɡɛ Kes nɔ ɛ nɛnjen dɛ ɛ kondɔɔh.

² Dɛ o dɔ bibaa bɛl baa yerɔ Sɔɔl. O wer bonɔɔ, dɛ kpeɡ kɛrɛdɛ o dɔŋ aa wola toole Israel harɛ ta.

³ Awola bɛl, Sɔɔl mɛɛ Kes keeɡo neenanar baa nyoɡre, asɛ Kes ŋɔ o be ŋɔ, “Kpɔ n bonɔɔna la bini bɛl ja he nɛ ásɛ he la ka ɡaaɡe a bɔr.”

⁴ Baa lea la, ba kpɔ Efrem deŋɡarere harɛ ta, dɛ ka le Salisa harɛ ta, kɛ ba ta an nae. Ba ɡaaɡɔ ka le Saalim harɛ ta ɡe, ba ta an nae, dɛ berɛ le bela ka kpɔ Bɛnjamen dea harɛ ta, kɛ ba ta keeɡo beŋkpoŋ kwaraa nae.

⁵ Ba ɡaaɡɔ dɛ ba tel Suf harɛ ta, asɛ Sɔɔl ŋɔ bonɔɔ waa ja o nɛɛ la be ŋɔ, “Yá berɛ kaa dem, ɡɛ laa aa, n mɛɛ sie ɛɛ berɔ beɡre ya wa, dɛ́ ɡwaa kɛ keeɡore nɔ aa nyoɡra nɔ.”

⁶ Anee bonɔɔ la chaŋe ŋɔ, “Na, Korowii nɛn bɛl lɔ bwɛɛ nɔ ta. O wobɛlbwa waa bol dɛ ɛ kasinteŋ, baa duuru kohona ɡe. Gel ya la o be, o ken ɛɛ won baɡle yaa bela yaa kpɔ dɛ́ na keeɡore nɔ.”

⁷ Ate, Sɔɔl bɔɔro ŋɔ, “Ya la baa la be naa, bɔkwaa yaa ba dɔe tɛo wɔ? Kondikwaa aa lɔ ya pure bini bwa tonɔ. Komɛlbwa toole yá dɔ ka tɛo.”

⁸ Bonɔɔ la berɛ chaŋe ŋɔ, “N dɔ suuɡapoŋ jeɡaa bɛl n be, yá kpɔ ka tɛ Korowii nɛn waa dɛ na chaahna la, ásɛ o baɡle yaa bela yaa kpɔ dɛ́ naa.”

⁹ Saŋ la dɛ Israel te dɛ nyin o bɔɔ waane le Korowii be naa, o yon ŋɔ, “Ba ya la ka na nɛn waa dɛ na chaahna. A ɡɛ nɛn nɔɔ baa yerɛ Korowii keame fini la.”

¹⁰ Anee Sɔɔl chaŋe ŋɔ, “A wer, ya kaa.” Asɛ ba chiɡ ŋwɛnɛ ta dɛ kaa bwɛɛ Korowii nɛn la aa lole la ta.

¹¹ Baa teeh deŋɡare bɛl dɛɛ kaa bwɛɛ la ta la, ba cheme bitoli bane baa dɛ ba bá dɔ ne. Asɛ ba bɔɔ ba ŋɔ, “Korowii nɛn bɛl waa dɛ na chaahna lɔ bonɔ naa?”

¹² Ba chaŋe ŋɔ, “Ɔɔh, bɛl lole. O tɔ he sie, hé ɛ warane, finii o den ba ya bwɛɛ nɔ ta. Bwɛɛ la tena dɛ la ka kpoo kwaa bela baa dɛ ɛ saraha la.

¹³ Hé deno jo bwɛɛ la bini naa, hɛɛ nao mɔɔ dɛ́ kaa saraha la bɔr ka di kwa. Onee dɛ́ swee saraha kwaa ta tɛ nɛra la mɔɔ bá di, ásɛ mɔɔ nɛra baa ta nɔn yer ba la ɡe di. Hé kaa taraken, hɛ́ɛ ka nao.”

¹⁴ Sɔɔl ne bonɔɔ la aa kaa jo bwɛɛ la ta ba den na Samoɛl o valɛ dɛɛ chem ba dɛ baa kaa saraha la bɔr.

¹⁵ Tɔ aa per mɔɔ Sɔɔl ba la, dɛ Korowii pili waa la bini baɡle Samoɛl ŋɔ,

¹⁶ “Kere saŋ nɔ bɔr, mɛɛ tomɛ baa bɛlee le Bɛnjamen dea harɛ taa he be. O balaa, fuɡe noo do o nyu ta, dɛ́ ɛo n nɛra Israel tena sitɔɔ. Onee dɛ́ ba lɛɛ baa le Filisti tena nɔn ta. N na wenaale baa lɔ a ta, ba wii ɡe tel n be.”

¹⁷ Samoɛl siwi aa dena dawɛ Sɔɔl nɛɛ la, Korowii ŋɔ o be ŋɔ, “Baa la maa bol o waa he be laanee la, onee dɛ́ ba nyiŋi n nɛra nɛ.”

¹⁸ Sɔɔl kaa cheme Samoɛl doonyoa dɛ bɔɔro ŋɔ, “Leperaa Korowii nɛn waa dɛ na chaahna la dem doɔ?”

¹⁹ Anee Samoɛl chaŋ ba ŋɔ, “Menee a ɡɛ nɛn la, hé tɔ n sie kaa saraha bɔr bela. Fini n ne heyaa dɛɛ ba kwaa dii, ásɛ tɔɔ perɔ chɔɔ aa, waa aa lɔ he be bwa la, ń bol baɡle heya, dɛ́ ta heyaa ŋwɛnɛ hé kaa.

²⁰ Keeɡore aa nyoɡra tɔpera atoro bwaa nɔ la te, he bɛ ɡel a waa hiah heya, ba naa. Hen Sɔɔl nɛɛ Israel tena bwa sie dawɛ. Nomɛlbwa toole ka ja he ne he mɛɛ dem tena nɛ.”

²¹ Ate, Sɔɔl chaŋe ŋɔ, “Bɛnjamen dea o nɛra aa wola kanɛ Israel deene bwa binii n le. N lolanar ɡe toole wobɛlbwa bini. Ɛrɛɛ hɛɛ bol ɡɛ waa nɔ n be nɔɔ?”

²² Belaa Samoɛl tɔ Sɔɔl ne bonɔɔ la sie, dɛ kpɔ ba ba so nomombɔr dejen bɛl bini kondikwaa la mun. Dɛ nɛra fifraatoro baa ta nɔn yer ba la soɡo bar teebur la.

²³ Samoɛl ŋɔ nɛn waa dɛ daa kondikwa la be ŋɔ, “Kpɔ oldɛɛɡe maa ŋɔa he kwaa cheɡ mɛ la ba.”

²⁴ Asɛ o kpɔ ol la hwii ne o nakpala bwa ba cheɡ Sɔɔl sie. Ate, Samoɛl ŋɔ o be ŋɔ, “Ol maa kpɔa cheɡe laanee la. Chwe, dɛkalkɛ anee n kpɔ cheɡe, he ne nɛra maa ta nɔn yer ba nɔ pɛ di.” Sɔɔl ne Samoɛl pɛo di kondikwaa awola.

²⁵ Baa le saraha bɔr bela dɛ ba bwɛɛ la ta la, Samoɛl ɡelɔ ba pa kalaŋ tɛ Sɔɔl o chɔ o saldoa, asɛ o la o ne o ka bol wa.

²⁶ Ba iro bɔr chaahna saŋ, asɛ Samoɛl la Sɔɔl be saldoa bela dɛ ŋɔ, “Ir dɛ́ kpɔ he te, ásɛ n ka doe ŋwɛnɛ.” Asɛ o kpɔ o te ba bwa le kaa.

²⁷ Baa dɛ tel bwɛɛ la dahare la, Samoɛl ŋɔ Sɔɔl be ŋɔ ó ŋɔ bonɔɔ la be ásɛ wɛɛ tɔ sie, asɛ o ba tɔ ba sie dɛɛ kaa. O ŋɔ Sɔɔl be ŋɔ, “He te so bonɔ tama, ásɛ n bol waa aa le Korowii be baɡle.”