1 Samoɛl 8 - mzwDBL

Israel tena kooro nyina

¹ Samoɛl baa hwɛɛh, asɛ o le o bibaala banɛ ŋɔ bá chiɡ o naa ta, dɛ́ ɛ Israel tena sitɔɔla, dɛɛ bol ba ne ba bala waa dɛɛ pa bole.

² O bibaa waa tɔ sie sɔne Joel, nɛɛte la ɡe sɔne Abija. Dɛ ba ɛ sitɔɔla dɛ so Beɛseeba dɛɛ nyiŋi nɛra la nɛ.

³ Kɛ dɛ ba te ta doe kɛŋɔ ba mɛɛ. Dɛ ba sie beɡre suuɡa, anomanta, ba ɡelɔ nɛra ɛɛ yaɡ ba sen, baa waa aŋwɛnɛ ta bol.

⁴ Anomanta, Israel nomonome la bwa chemo dɛ la Samoɛl be Rama,

⁵ dɛ ka ŋɔ, “Taraken he hwɛɛhrɔ, asɛ he bii la ɡe ta do kɛ hen, ba we-ɛɛla aa were. Nyin kooro tɛ yaa wɛɛ tɔ ya sie ɡɛ harɛre nɛra bwa aa dɔa la.”

⁶ Baa ŋɔ o be ŋɔ ó tɛɛ ba kooro wɛɛ tɔ ba sie la, a ta o som doe asɛ o soŋe Korowii a wa.

⁷ Asɛ Korowii ŋɔ Samoɛl be ŋɔ, “No waa bwa nɛra la aa dɛ bol he be la, he laa ba vɛh kɛ ba kooro, men Korowiirii ba vɛh.

⁸ Gɛɛ ba ɛɛ mɛ dɛ le ɡɛ saŋ maa le ba ne Ijipt harɛ ta. Ba vɛɛh baa vɛɛh mɛ dɛ kaa tomɛ harɛre ane voɡa la taa ba ta do ba le fini, dɛ kpɔ dɛɛ ɛ he ɡe la.

⁹ Name cheɡ deŋne no waa baa bol, kɛ kah ba kɛrɛdɛ dɛ́ ɡel ba jemɛ ɡɛ ba koranar aa dɛ ba kpɔe dɛɛ ɛɛ ba.”

¹⁰ Samoɛl bol waa Korowii aa bol o be la bwa baɡle nɛra baa dɛ bɔɔ kooro dɔe waa la.

¹¹ O ŋɔ, “He baa dɔ kooro aa, waa waa dɛ ba ɛɛ laanee nɔ. Wɛɛ kpɔ he bibaalaa ɛ o laa tena, bane so kwaa aa do kɛŋɔ torɔɡo ba vɔwɛ pɛl jaɡre la ta, ásɛ bane ɡe so jaɡre ta, bane ɡe chwa tɔ kwaa aa do kɛŋɔ torɔɡore ba kpɔ dɛɛ la laa la sie.

¹² Wɛɛ ɡeloo ba bini bane ɛ laa nomonome dɛ́ chɔ laa tena kaɡboŋa nyoa, bane ɡe chɔ laa tena fifraanue nyoa, ásɛ bane ɡe ɛɛ parɛ o koo dɛɛ komɛ o koo kondikwa. Wɛɛ ɡeloo bane ɡe ɛɛ kwaa dɔmkwa baa kpɔ dɛɛ la laa, ne bune baa kpɔ dɛɛ kwaa laa torɔɡore la.

¹³ Wɛɛ ɡeloo he bihaahna ɛɛ ɛ konsɔɔhsoma, bane ɛɛ daa kondikwa ásɛ bane ɡe ɛɛ wɔɔ paanoo.

¹⁴ Wɛɛ lɛ he harɛdɛɛɡa ne he daa koonii tɛ o nomonome.

¹⁵ Wɛɛ bɔne he mea ne he daa kooni bini bɔre fii, dɛ́ kpɔ bɔrbeŋkpoŋ tɛ o nomonome ne bonɔɔna.

¹⁶ Dɛ́ kpɔ he bonɔɔna ne toli bwa, ne he nae aa wera ne keeɡore ɛ o kwa áa ɛ o toma.

¹⁷ He peera ɡe la, wɛɛ bɔne a bini bɔre fii, dɛ́ kpɔ bɔrbeŋkpoŋ, ásɛ dɛ kpɔ heyaa berɛ o yoma.

¹⁸ Awola tɔpere la, hɛ́ɛ dɛɛ wiu, dɛɛ nyin kɛŋɔ he fe aa le kooro he ɡbabir aa leo la nɔn ta, kɛ Korowii aa heyaa chaŋe.”

¹⁹ Kɛ ane a bwa, nɛra la vɛoh ba ta Samoɛl waa la noɛ. Ba ŋɔ, “Ya dɛ nyin kooro ó baa nyiŋi ya nɛ.

²⁰ Ásɛ ya dɔ kooro kɛŋɔ harɛre nɛra aa dɔa la, ó tɔ ya sie dɛɛ la ya ne laa.”

²¹ Samoɛl aa no waa bwa baa bola la, o berɔ kpɔ bil Korowii sie ja.

²² Anee Korowii chaŋo ŋɔ, “No ba wesoŋa la tɛɛ ba, dɛ́ tɛɛ ba kooro.” Ate, Samoɛl ŋɔ Israel tena la be ŋɔ nomɛlbwa berɛ kaa o bwɛ.