1 Samoɛl 7 - mzwDBL

¹ Kiriat Jearim baala baa kpɔ Korowii Ne Nɛwɛnyina Fɔo Daka la, dɛ kaa o ne Abinadab dem deŋɡare bɛl doa. Ba sɔ o bibaa baa dɛ yerɔ Eliasa doŋa ta o do ɡoroŋ tɛ Korowii, dɛ ŋɔ wɛɛ nyiŋi Korowii Fɔo Daka la ta.

Samoɛl nyiŋi Israel tena nɛ

² Korowii Ne Nɛwɛnyina Fɔo Daka la cheɡɛ Kiriat Jearim biɡri taeh, dɛ ɛ bene fifraanɛ bwa. Gɛ saŋ la, dɛ Israel tena bwa wio dɛɛ no Korowii ŋɔ ó cha ba.

³ Asɛ Samoɛl ŋɔ Israel tena be ŋɔ, “Dɛ hɛɛ berɔɔ ba Korowii be dɛɛ nyinu he bambile bwa ne, dɛ́ laa he te kpɔ voɡa toma ne voɡhaahna Astɔrɛt nɛ, dɛ́ kpɔ he te tɛo dɛɛ tomɛ o ɡbo aa, wɛɛ lɛ heyaa le Filisti tena kpeɡri baa dɛ di he nɛɛ la taa.”

⁴ Anomanta, ba pa Baal ne voɡhaahna Astɔrɛt aa lɔ ba be ta, dɛɛ tomɛ Korowii ɡbo.

⁵ Asɛ Samoɛl berɛ ŋɔ, “Hé ŋɔ Israel tena be bá bwa cheme bwɛjen Mispa, ásɛ n soŋe andɛɛɡa le Korowii be tɛ heya.”

⁶ Ba bwa aa baa cheme Mispa la, ba dɔ nee dɛ fuɡe ta Korowii sie a baɡle wechɔɡa baa ɛa la saraha. Ba vɔwɛ nyoa tɔpebir la bwa, dɛ ŋɔ, “Ya ɛ wechɔɡa dɛ jo Korowii nɛ.” Mispa belaa Samoɛl do dɛ tɔ ba sie, dɛ bol bane ba bala waa dɛɛ tɛɛ ba.

⁷ Filisti tena la aa noa kɛŋɔ Israel tena cheme Mispa la, ba koranar banue la kpɔ ba laa tena dɛ́ ka yoo ba. Israel tena la no ba wa, asɛ ɔmee chole ba nɛ.

⁸ Israel tena la ŋɔ Samoɛl be ŋɔ, “Bɛ soŋa haa cheɡɛ ya naa ta soŋe le Korowii yaa dɛ tomɔ be la ɡel. Ó lɛ yaa le Filisti tena nɔn ta.”

⁹ Ate, Samoɛl lawɛ pebie o taa dɛ ɔr ba ɛ saraha, dɛ fuuh tɛ Korowii. O cheɡɛ Israel tena naa ta, dɛ wi yerɛ Korowii asɛ Korowii sɛh o nyoa.

¹⁰ Waa dɛ fuh saraha kon la, dɛ Filisti tena la kpɔ ba te dɛɛ ba ba puu ba yo. Asɛ Korowii ɡel bwaala kɔr kohona jo Filisti tena la bini, ɔmee chole ba nɛɛ ba wili, dɛ kpɔ bambiteŋa chwa le Israel tena sie.

¹¹ Israel laa tena le Mispa dɛ ti ba, ba kpoo ba le ŋwɛnɛ bɛl waa chɔa kaa bwɛɛ Bɛt Kaa harɛbɔr.

¹² Ate, Samoɛl kpɔ bwe bɛl pa Mispa ne Sɛn baah ta. Dɛ pa o sɔn Ɛbɛneesa dɛ ŋɔ, “Bonɔɔ Korowii cha yaa ya ba tel.”

¹³ Gɛɛ a do Israel tena yo Filisti tena dɛ pɔ ba nɛ. Samoɛl soɡa bini bwa, Korowii ta ɡelɛ Filisti tena won ba Israel harɛ jwɛh ta kpa.

¹⁴ Israel harɛ bwɛjena ane kɛŋɔ le Ekron ka tel Gat Filisti tena aa lɛa le ba be la, ba bera tɛɛ ba ba dɔ ba harɛ bwa. Asɛ deŋnesɔɔhna ba ba ne Amɔre tena baah.

¹⁵ Samoɛl soɡa bini bwa la, o lawɛ Israel tena dɛ kwaa ba ne ba bala waa dɛɛ pa bole.

¹⁶ Bena bɛlbwa, o dɛ ɡaaɡe ba nɛɛ le bwɛjena Bɛtel kaa Gelɡal ne Mispa bwa, dɛ bol nɛra waa dɛɛ pa bole.

¹⁷ O yon berɛ ba kaa Rama, bela waa soɡa. Bela ɡe, o bol Israel tena ne ba bala waa dɛɛ pa bole, asɛ o ma kon baa ɛ saraha o ta bela tɛ Korowii.