1 Samoɛl 6 - mzwDBL

Korowii Ne Nɛwɛnyina Fɔo Daka ne Israel bala

¹ Korowii Ne Nɛwɛnyina Fɔo Daka la lɔ Filisti tena nɔn ta korobie anuanɛ,

² asɛ Filisti tena la yerɛ kerekpoŋra baa soɡe voɡa ta ne voɡra baa lɔ harɛ la ta bwa cheme dɛ bɔɔ ba ŋɔ, “Ɛrɛɛ yá ɛ Korowii Ne Nɛwɛnyina Fɔo Daka nɔɔ? Hé baɡle ɡɛ yaa ɛ dɛ́ berɛ kaa o ne o buɡ ta.”

³ Anee ba chaŋe ŋɔ, “Hé kpɔ Korowii Israel tena aa dɛ tomɔ, Ne Nɛwɛnyina Fɔo Daka la berɛ dɛɛ kaa o buɡ ta tenaa, he bɛ o ne kaa pɛɛpɛɛ. Hé kpɔ bolchɔɡe dii saraha kwaa ja ka tɛ Korowii. Anee dɛɛ ba ɡela he dɔ chaeh, ásɛ he jemɛ he deŋnetɛra mun.”

⁴ Filisti tena la bɔɔrɔ ja ŋɔ, “Bolchɔɡe dii saraha besoo yá kpɔ ka tɛo wɔ?” Ate, ba chaŋe ŋɔ, “Hé kpɔ suuɡaswɛm loɡɛ konɡuleɡule anue kɛŋɔ ɔɡra, dɛ́ kpɔ ane ɡe loɡɛ kwaane kɛŋɔ mari anue, ásɛ a che tɛ Filisti koranar banue la, dɛkalkɛ he ne ba bwaa weechɔɡa la lawɛ.

⁵ Hé kpɔ suuɡaswɛm konɡuleɡule anue la ne mari anue la aa dɛ chɔɡ he ne he harɛre ta nɛra bwa la, ásɛ dɛ kpɔ duure tɛ Korowii Israel tena aa dɛ tomɔ la. O ken ɛɛ laa deŋnetɛra laanee kpɔ he ne he harɛ dɛ he voɡa bwa nɛ.

⁶ Ɛrɛɛ he deŋne do kpeɡri kɛŋɔ Ijipt kooro ne o nɛra nɔɔ? Hé lii ɡɛ Korowii fa aa tɛr ba deŋne kohona, dɛ ka tel kɛŋɔ baa tɛ Israel tena ŋwɛnɛ ba le Ijipt harɛ ta kaa la.

⁷ Anomanta, hé kpɔ konfala aa do kɛŋɔ torɔɡo dɛ dɔ tɔre, dɛ́ lawɛ naneene anɛ a bii ta aa dɛ ɔra, baa wola ane parɛ bwa vɔwa, ásɛ dɛ pere a bii la le anɛ ka do leɡ bini.

⁸ Hé kpɔ Korowii Ne Nɛwɛnyina Fɔo Daka la ka chɔŋɛ torɔɡo la ta, dɛ́ kpɔ kwaa haa kpɔ suuɡaswɛm loɡa la bil o jwɛh. Hé kpɔ bolchɔɡe dii saraha kwaa la do dakajeɡa bɛl bini, ásɛ o che Daka la jwɛh a kpɔ dɛɛ kaa,

⁹ dɛɛ nyiŋi a kaala bini. Hé nao kɛŋɔ a kpɔ sie chaɡɛ bwɛɛ Bɛt Sɛmɛs pera dɛɛ kaa laa, amɔ dɛ Korowiirii kpɔ wahala kohona nɔ ba ta ya nɛ. A ta sie kpɔe chaɡɛ bela bɔr ɡe aa, yaa jemɔɔ kɛŋɔ Korowii be laa aa le, ya nyuchɔɡee ɡelaa a ba ɡɛ.”

¹⁰ Anomanta, ba ɛ ɡɛ. Ba lawɛ naneene anɛ la, dɛ vɔwa pɛl kwaa aa do kɛŋɔ torɔɡo dɛ dɔ tɔre la nɛ, dɛ pere a bii la le a nɛ ka do leɡ bini.

¹¹ Ba kpɔ Korowii Ne Nɛwɛnyina Fɔo Daka la ka chɔŋɛ o ta, dɛ kpɔ dakajeɡa baa kpɔ suuɡaswɛm kwaa la do o bini la ɡe ka cheɡ o jwɛh.

¹² Nae la aa lea la, a den kpɔ sie pa Bɛt Sɛmɛs ŋwɛnɛ ta dɛɛ kaa, a ta bɛɡɛ kpɔ diɡ kɛɛ ɡal, dɛ si dɛɛ kaa. Filisti tena koranar banue la teŋɛ a nɛɛ ka tel Bɛt Sɛmɛs jwɛh ta.

¹³ Dɛ Bɛt Sɛmɛs tena lɔ fɛlembɔjen bɛl bini dɛɛ komɛ mea. Baa ha sie nyiŋi dɛ na Korowii Ne Nɛwɛnyina Fɔo Daka la, ba sie lɛo kɛrɛdɛ.

¹⁴ Nae la ne torɔɡo la baa tel Josua waa le Bɛt Sɛmɛs la koo ta, dɛ che bwe bɛl jwɛh. Asɛ bela tena la paɡre daa baa kpɔa kwaa torɔɡo baa vɔwa pɛl nae la, dɛ kpoo nae la ɛ saraha baa fuah tɛ Korowii.

¹⁵ Lewi dea tena la kpɔ Korowii Ne Nɛwɛnyina Fɔo Daka la ne dakajeɡa baa kpɔ suuɡaswɛm kwaa do o bini la chɔŋɛ bwe la ta. Bɛt Sɛmɛs tena kpoo kwa, dɛ ɛ saraha baa dɛ fuah tɛ Korowii awola.

¹⁶ Filisti tena koranar banue la na a ɡɛ waa nɔ bwa, dɛ berɛ kaa bwɛjen Ekron ta awola tenten.

¹⁷ Gɛ kwaa aa do kɛŋɔ ɔɡra, ba kpɔ suuɡaswɛm ɛa Filisti tena la kpɔ ka ɛ bolchɔɡe dii saraha tɛ Korowii laanee la. Bɛlbwa cheɡɔ tɛ ba bwɛjena Asdɔd ne Gasa ne Askɛlɔn ne Gat dɛ Ekron.

¹⁸ Ba berɔ kpɔ mari anue baa kpɔ suuɡaswɛm ɛa la, a ɡe che tɛ Filisti koranar banue bwɛjena baa ma danjwɛjena bara ne a bwɛjeɡre. Bwe baa kpɔ Korowii Ne Nɛwɛnyina Fɔo Daka la chɔŋɛ o ta Josua waa le Bɛt Sɛmɛs koo ta la, o ta ɛ danseɛ kon ba le fini.

¹⁹ Korowii kpoo Bɛt Sɛmɛs baala fifraanuanɛ, nyiŋa baa kaa nyiŋi Korowii Ne Nɛwɛnyina Fɔo Daka la bini la wa. Bela tena la wii ba kohona, Korowii kpoe waa kpo ba la wa.

²⁰ Anee Bɛt Sɛmɛs baala ŋɔ, “Umee dɛ́ won che Korowii o wa aa do ɡoroŋ nɔ sie nɔ? Leperaa ya kaa Daka nɔ ne ó le ya nɛɔ?”

²¹ Ba kpɔ kala tɛ Kiriat Jearim tena ŋɔ, “Filisti tena la berɔ kpɔ Korowii Ne Nɛwɛnyina Fɔo Daka la ba, hé ba dɛ́ ba kpɔ kaa he be.”