1 Samoɛl 5 - mzwDBL

Korowii Ne Nɛwɛnyina Fɔo Daka kpɔe dɛ́ kaa wa

¹ Filisti tena la aa kpɔ Korowii Ne Nɛwɛnyina Fɔo Daka la, ba le o ne bwɛɛ Ɛbɛneesa, dɛ kaa ba bwɛjen Asdɔd ta.

² Asɛ ba kpɔ ka cheɡ ba voɡ baa dɛ yerɔ Daɡɔn dea, o che voɡ la jwɛh.

³ Tɔ aa pera chɔmbibi la, Asdɔd tena nao kɛŋɔ ba voɡ Daɡɔn la cholo o sie pi harɛ Korowii Ne Nɛwɛnyina Fɔo Daka la sie, asɛ ba ka kwaaro pa o buɡ ta.

⁴ Tɔ aa pera ja la, ba iro dɛ na kɛŋɔ voɡ la berɔ chole o sie pi harɛ Korowii Ne Nɛwɛnyina Fɔo Daka la sie, asɛ o nyu ne nɔɔra kuuɡi o chɔ doonyoa, a ka o kpul chɔ.

⁵ A waa dɛ kpoŋe ba le fini, nɛra baa dɛ kpoŋe Daɡɔn kere kɛɛ bɛlbwa waa dɛ tomɔ dɛ ba dea la bini joe yaa, ba yon ɡale doonyoa bela mɔɔ dɛɛ jo la.

⁶ Korowii tɛr Asdɔd ne bwɛɛre aa baro cheme nɛra deŋne kɛrɛdɛ, dɛ kpɔ ɔmee kohona ta ba nɛ. O kpɔ ɔɡra ne ŋwɛra ta ba nɛ.

⁷ Asdɔd tena aa na waa aa dɛ chiɡ la, ba ŋɔ, “Korowii Israel tena aa dɛ tomɔ Ne Nɛwɛnyina Fɔo Daka la ta chɛ kɛ ó che ya be kpa, dɛkalkɛ o dɛ tɛr ya ne ya voɡ Daɡɔn deŋne.”

⁸ Anomanta, ba yerɛ Filisti koranar baa dɛ nyiŋi ba harɛre ta bwa cheme dɛ bɔɔ ba ŋɔ, “Ɛrɛɛ chɛ kɛ yá ɛ Korowii Israel tena aa dɛ tomɔ Ne Nɛwɛnyina Fɔo Daka nɔɔ?” Anee ba chaŋe ŋɔ, “Hé kpɔ kaa bwɛjen Gat ka cheɡ.” Gɛɛ a do ba kpɔ Korowii Israel tena aa dɛ tomɔ Fɔo Daka la le bela kaa.

⁹ Baa kpɔ Daka la kaa Gat kwaraa la, Korowii tɛr bwɛjen Gat tena deŋne ɔmee kohona chole ba nɛ. O kpɔ ɔɡra ba ta bechale ne nomonome bwa nɛ.

¹⁰ Ate, ba berɛ kpɔ Korowii Ne Nɛwɛnyina Fɔo Daka la kaa Ekron, dɛ o ɡe ɛ Filisti tena bwɛjena la bini bɛl. Bwɛjen la bini nɛra aa naa la, ba wio ŋɔ, “Ba kpɔ Israel tena Korowii baa dɛ tomɔ Ne Nɛwɛnyina Fɔo Daka la ba jo ya baah, dɛ́ ba kpoo yaa.”

¹¹ Anomanta, ba yerɛ Filisti koranar la bwa cheme dɛ ŋɔ, “Hé berɛ kpɔ Korowii Israel tena aa dɛ tomɔ Ne Nɛwɛnyina Fɔo Daka la ka cheɡ o buɡ ta, ásɛ o bɛ ya ne ya bii ba kpoo.” Dɛ deŋnetɛra Korowii aa kpɔa ba ta ba nɛɛ la ɡelɔ sibeɡra chole ba nɛɛ kɛrɛdɛ bwɛjen la ta.

¹² Banɔ la baa wola serewɛ la, ɔɡra ɔɡ ba ba wi dɛɛ yerɛ ba voɡa ŋɔ á ba lɛɛ ba.