1 Samoɛl 4 - mzwDBL

¹ Belaa Samoɛl bol waa Korowii aa kpɔa baɡlo la tɛ Israel tena bwa. A balɔ kɛŋɔ Israel tena vɔrɔwɔ kɛŋɔ bá ka yo Filisti tena. Israel tena kaa baŋre ba tɛnte deene Ɛbɛneesa harɛ ta, asɛ Filisti tena ɡe do Afɛk.

Filisti tena kaa kpɔ Korowii Ne Nɛwɛnyina Fɔo Daka

² Filisti tena laa tena lɔɔ ka tɔ Israel tena la nɛ, dɛ yoo ba dɛ pɔ ba nɛ. Ba kpoo ba nɛra kaɡboŋa banaarɛ.

³ Israel laa tena baa kaa la aa bera ba bela baa baŋre ba tɛnte deene la, ba nomonome la bɔɔ ba ŋɔ, “Ɛrɛɛ Korowii ɡel Filisti tena pɔ ya nɛɛ fini ken? Hé ɡel yá ka kpɔ Korowii Ne Nɛwɛnyina Fɔo Daka la le Silo ba, ásɛ ya ne wɛɛ valɛ ó lɛ yaa dɛɛ le ya dɔma nɔn ta.”

⁴ Anomanta, ba tomɛ baala ba la Silo, dɛ ka kpɔ Nemenɛ Korowii Ne Nɛwɛnyina Fɔo Daka le bela Korowii Waa Ɛ Koranar Bwa Kooro aa soɡe Kerobim la doa o kookara ta la ba. Eli bibaala banɛ, Hofni ne Fenehas, teŋɛ Daka la nɛɛ dɛ ba.

⁵ Korowii Ne Nɛwɛnyina Fɔo Daka la aa ba bela baa baŋre ba tɛnte deene la, Israel tena la bwa moolo kohona silɛɛ ne, asɛ harɛ jiɡri.

⁶ Filisti tena la aa no Israel tena ɡbɔɡa la, ba ŋɔ, “Bɔkwa ɡe ɡbɔɡaa dɛɛ le Israel tena tɛnte deene bini ken?” Baa noa kɛŋɔ Korowii Ne Nɛwɛnyina Fɔo Daka la nee ba ba bela la,

⁷ ɔmee lawɛ Filisti tena la, asɛ ba ŋɔ, “Ba kpɔ voɡ ba cheɡ bela baa soɡa la. A dɔŋa ta chiɡe bwa, namete ya na wa!

⁸ Ya bwɛɛlɛ! Umee dɛ́ lɛ yaa le voɡkpeɡa nɔ nɔn ta nɔ? Anee fa kpɔ weechɔɡa bwa soo siwi ta Ijipt tena nɛɛ pua hɛŋle ɡbo harɛ ta la.

⁹ Filisti tena, hé dɔ bambile, dɛ́ che kiŋkiŋ kɛŋɔ baala, dɛ ɡɛ laa aa, hɛ́ɛ ka do Israel tena lɔɡaa ɡɛ ba fa aa lɔ ya lɔɡa la. Hé che kiŋkiŋ dɛ́ yo.”

¹⁰ Anomanta, Filisti tena la yo Israel tena dɛ pɔ ba nɛ, asɛ bɛlbwa chwa ka so ba deremi. Nɛra baa serewa warɔ taeh, Israel laa tena kaɡboŋa fifraatoroo ba kpoo.

¹¹ Filisti tena kpɔ Korowii Ne Nɛwɛnyina Fɔo Daka la, dɛ kpo sɔfo Eli bibaala Hofni ne Fenehas ɡe.

Sɔfo Eli seo wa

¹² Awola tenten, baa bɛl waa le Bɛnjamen dea chwao le laa la ta dɛ ba Silo, dɛ o laala kɛɛrɔ asɛ teera do o nyu ta a baɡle kɛ o bambile chɔɡɔ.

¹³ Waa bala la, dɛ Eli soɡe o kara ta ŋwɛnɛ nyoa dɛɛ nyiŋi, dɛkalkɛ ɔmee lawɔ Korowii Ne Nɛwɛnyina Fɔo Daka la wa. Baa la aa baa jo bwɛɛ la bini dɛ baɡle waa aa chiɡa la, ɔmee chole bɛlbwa nɛɛ baa wi bɔr bwa.

¹⁴ Eli no wii la dɛ bɔɔ ŋɔ, “Bɔkwa waa bala ɔ?” Ate, baa la ɛ warane dɛ la sɔfo Eli be,

¹⁵ ɡɛ saŋ dɛ Eli di bene fifraanuanaarɛ dɛ anuatoro. Hwɛɛhra kohona nomanta, dɛ waa na kɛrɛdɛ kpa.

¹⁶ Baa la ŋɔ Eli be ŋɔ, “Fini tɔpere tenten nɔɔ n chwa le laa ta dɛ ba la.” Asɛ Eli ŋɔ, “N bie, bɔkwa waa chiɡa ɔ?”

¹⁷ Ate, baa la ŋɔ, “Laa la ta la, Israel tena chwao, asɛ Filisti tena kpoo ba kohona. He bibaala Hofni ne Fenehas ɡe, ba kpoo ba, dɛ kpɔ Korowii Ne Nɛwɛnyina Fɔo Daka la ɡe kaa.”

¹⁸ Sɔfo Eli aa no Korowii Ne Nɛwɛnyina Fɔo Daka la waa la, o le o kara waa soɡe o ta la ta chole hanjala ɡbera jwɛh, asɛ o baŋa ku o sewɛ, dɛkalkɛ o hwɛɛhrɔ dɛ do tɔɡre. Bene fifraanaarɛ bwaa o tɔ Israel tena sie.

¹⁹ Gɛ saŋ dɛ o bibaa Fenehas haah kpoŋe tea a ka tama ó lolɛ. Waa no Korowii Ne Nɛwɛnyina Fɔo Daka la waa kɛŋɔ Filisti tena kpɔɔ kaa, asɛ o hela Eli ne o jaa sewɛ la, loltea piɡro lɔɔ o lolɛ, kɛ dɛ a ɡwaa o nɛ.

²⁰ Aa ba dɛ ɡwaa kohona wɛɛ ba sewa la, haahna baa dɛ lawɔ lol la ŋɔ o be ŋɔ, “Bɛ ɡel he bambile chɔɡ, he lolɛ bibaa.” Kɛ dɛ waa no, á ba ɛ kɛŋɔ wɛɛ chaŋoo.

²¹ O pa bie la sɔn Ikabod, dɛ baɡle kɛ Korowii jirima le Israel kaa, dɛkalkɛ ba kpɔ Korowii Ne Nɛwɛnyina Fɔo Daka la kaa, asɛ o helabaa ne o jaa bwa ɡe sewɛ.

²² O ŋɔ, “Korowii jirima toole Israel tena nɛɛ kpa, Daka la Filisti tena aa kpɔa kaa la wa.”