1 Samoɛl 31 - mzwDBL

Kooro Sɔɔl ne o bibaala seo

¹ A kaa ba kɛ Filisti tena ne Israel tena cheme Gelboa Bwejen ta dɛ yo laa. Ba kpoo Israel tena ɡalɡa bela, asɛ ba kar ne Kooro Sɔɔl ne o bibaala chwa.

² Filisti tena la chwao ti Kooro Sɔɔl ne o bibaala batoro, Jonatan ne Abinadab dɛ Malki Sua sibeɡra ne dɛ kpoo o bibaala la.

³ Laa la baa do kpeɡri tɛ Kooro Sɔɔl, asɛ o dɔma la bɛl ta hɛm yaɡɔ dɛ doo bol kohona.

⁴ Asɛ Kooro Sɔɔl ŋɔ o bonɔɔ waa dɛ che o dɔmkwaa la be ŋɔ, “Pamɛ he kere la, dɛ́ ba tɔɡ mɛ kpo, ásɛ nɛra baa wola Korowii tomɛ nɔ bɛ men ba kpo dɛ́ chɛɡ mɛ ja.” Kɛ dɛ bonɔɔ la dɛ ɔmɛ kɛ ó ɛ ɡɛ, anomanta, Kooro Sɔɔl pamɛ o ɡbaɡba kere dɛ chole o ta.

⁵ Bonɔɔ la aa naa kɛ Kooro Sɔɔl sewɔ la, o ɡe chole o kon ta dɛ sewɛ ja o nɛ.

⁶ Gɛɛ a do Kooro Sɔɔl ne o bibaala batoro ne o bonɔɔ dɛ o laa tena bwa sewɛ awola tenten.

⁷ Israel tena baa lɔ Jesreel Fɛlembɔjen la baŋ bɛl, ne Jɔɔdan Moo wee leebɔr aa noa kɛŋɔ Israel laa tena la chwao, asɛ ba kpo Kooro Sɔɔl ne o bibaala ɡe la, ba chwao ɡel ba bwɛɛre. Asɛ Filisti tena la ba kpɔ dɛ so a ta.

⁸ Tɔ aa pera la, Filisti tena la laŋɔ dɛ ka pa laa tena baa kpoo ba la laala, asɛ dɛ na Kooro Sɔɔl ne o bibaala batoro la kɛ baa serewa chɔ Gelboa Bwejen ta.

⁹ Ba teŋe Kooro Sɔɔl nyu dɛ pa o dɔmkwa, asɛ dɛ do toroma Filisti harɛ la ta bwa ŋɔ bá ka bol amanesoma nɔ ba voɡa deene ne nɛra bwa be.

¹⁰ Ba kpɔ Kooro Sɔɔl dɔmkwaa la ka bil ba voɡhaah Astɔrɛt dea, dɛ kpaa o lale pɛl Bwɛjen Bɛt San danjwɛɛ ta.

¹¹ Bwɛjen Jabes waa lɔ Gelead harɛ tena la aa noa ɡɛ Filisti tena aa ɛ Kooro Sɔɔl la,

¹² bansua tena baa lɔ bwɛɛ la ta kpɔ ba te, dɛ valɛ jwaana la bwa kaa bwɛjen Bɛt San. Ba laa Kooro Sɔɔl lale kpɔ danjwɛɛ la ta, dɛ kpɔ o bii la ja, dɛ ba ba ne Jabes dɛ ba fuuh ba.

¹³ Ba pa ba hoɡa ka huɡe dajen bɛl waa lɔ Jabes mun, asɛ dɛ vɔwɛ nyoa tɔpera anuanɛ.