1 Samoɛl 30 - mzwDBL

Devid yo Amalɛk tena

¹ Tɔpetooro wee la, Devid ne o laa tena valɔ dɛ berɛ ba bwɛjen Siklaɡ. Dɛ Amalɛk tena baa yo Juda weekaŋle harɛbɔr bwɛɛre, dɛ ba pa ba laala dɛ fuh Siklaɡ,

² dɛ lawɛ haahna ne bechale, dɛ nomonome baa kaa dɛ do bwɛɛ la bini la bwa laa la ta kaa. Ba ta ba bini bɛlbwa kpoe, dɛ laɡ ba kaa.

³ Devid ne o laa tena aa tel Siklaɡ la, ba nao kɛŋɔ Amalɛk tenaa fuh bwɛɛ la, dɛ lawɛ ba haahna ne bii bwa kaa.

⁴ Devid ne o laa tena la wio kohona ka tel kɛŋɔ baa koah baa wola won wi kpa.

⁵ Ba lawɛ Devid haahna banɛ, Ahinoam waa le Jesreel, ne Abiɡel waa ɛ Nabal luhaah dɛ le Kaamɛl la kaa.

⁶ Devid bambile chɔɡɔ kɛrɛdɛ, dɛkalkɛ dɛ a dɛ we o laa tena la nɛɛ kɛŋɔ baa lawɛ ba bii kaa la, asɛ dɛɛ nyin ba foɡre Devid bwea kpo. Kɛ Korowii waa dɛ tomɔ la doo ɡbemba.

⁷ Ate, Devid ŋɔ Ahemɛlɛk bibaa Abiata waa ɛ sɔfo la be ŋɔ, “Kpɔ sɔfore batakaarebora efɔd la ba tɛ mɛ, ásɛ n bɔɔ le Korowii be.” Asɛ o kpɔ ba tɛo.

⁸ Asɛ Devid bɔɔ le Korowii be ŋɔ, “Ń ti laa tena la kɛɛ? Mɛɛ puu baa yaa?” Korowii chaŋe ŋɔ, “Ti ba, hɛɛ ka puu baa dɛ́ lɛ nɛra baa laɡ ba dɛɛ kaa la ta.”

⁹ Devid ne o laa tena lafraanumɛl la iro dɛ ba Beso Fɛlembɔjen bini, asɛ ba bini bane so bela.

¹⁰ Dɛ ba bini lafraanɛ te koɔh kɛrɛdɛ, baa wola won ɡale Beso Fɛlembɔjen la. Kɛ Devid ne laa tena lafraanaarɛ wono ɡale, dɛ ti ba kaa.

¹¹ Ba na Ijipt te bɛl kpɔɡ bini bela dɛ lawɔ ba tɛ Devid. Ba tɛo nee ne kondikwaa o di,

¹² ne fiɡ nɔna nɔndel tama, dɛ daa nɔna aa hola nɔndela anɛ. Waa dia tonɛ la, o berɔ dɔ bokpeɡa dɛkalkɛ dɛ o ta kondikwaa dii, o ta nee ɡe nyɔe tɔpera atoro la bwa.

¹³ Devid bɔɔro ŋɔ, “He dɔɔree ume ɔ? Leperaa he leɔ?” O chaŋe ŋɔ, “Ijipt tee men, n ɛ Amalɛk te bɛl yom. Tɔpera atoroo nɔ weela aa lɔ mɛ bil, asɛ n dɔɔ chwa kaa ɡel mɛ.

¹⁴ Ya kaa yo Nɛɡɛv pua hɛŋle ɡbo harɛ bela nɛra bane baa dɛ yer ba Kɛrɛt tena baa lɔ Juda harɛ ta, dɛ pa ba laala, ne Kaleb dea lolanar ba ɡe aa soɡe bela, dɛ fuh bwɛjen Siklaɡ ɡe.”

¹⁵ Devid bɔɔ Ijipt te la ŋɔ, “Hɛɛ won tɔ n sie dɛ́ la n ne n laa tena nɔ be naa?” O chaŋe ŋɔ, “Ŋwɛɛ Korowii kɛŋɔ haa men kpo kɛɛ haa men le tɛ n dɔɔ, ásɛ n tɔ he sie la he ne ba be.”

¹⁶ O tɔ Devid ne o laa tena la sie ba la Amalɛk tena la be, dɛ ba lɔɔ peɡre harɛ la ta bobɛlbwa, dɛ di kwaa dɛ nyɔ sen dɛɛ lɛ ba sie, dɛkalkɛ dɛ ba pa laala aa wara laa la ta le Filisti ne Juda harɛ ta.

¹⁷ Devid yoo ba le chɔmbibii ka tel tɔ aa pera jɔmɔra. Ba bini bɛlbwa ta wone dɔ bɔr chwa, nemenɛ bonɔɔna lafraanaarɛ baa soɡe nyoɡmare taa wona dɔ bɔr chwa kaa.

¹⁸ Devid berɔ lɛ kwaa Amalɛk tena aa paa la bwa, dɛ kpɔ o haahna banɛ la bwa ja.

¹⁹ Komɛlbwa ta nyoɡrɛ, bechale kɛɛ nomonome, bibaala ne bihaahna, komɛlbwa baa paa laa ta kaa la, Devid berɔ ba a bwa ne.

²⁰ O lɛ peera ne nae Amalɛk tena aa paa kaa la, asɛ o bonɔɔna la teɡa tɔ ba sie dɛ ŋɔ, “Devid laa ta kwaa waa kaa pa laanee la.”

²¹ Asɛ Devid berɛ ba o laa tena lafraanɛ ba fa aa ɡwɛɡra ba ta wone teŋɛ ba nɛɛ dɛ so Beso Fɛlembɔjen bɔr la be. Ba leɔ ba cheme Devid ne laa tena baa ja o nɛɛ la, asɛ Devid ka jam ba.

²² Kɛ ba bini nyubinikpeɡ tena ne nɛnchɔɡa bwa baa ja Devid ne o laa tena nɛɛ la ŋɔ, “Baa wola ya nɛɛ jae ya ne ba ka yo nɔ, ya ne baa won bɔne kwaa yaa kaa paa laa ta nɔ. Kɛ bɛlbwa ɛɛ won kpɔ o haah ne bii te kaa.”

²³ Devid chaŋe ŋɔ, “Akai, he bɛ laala Korowii aa kpɔa tɛ yaa la ɡɛ ɛ! O kpɔ nɔn tɔ ya nɛ dɛ ɡel ya yo, dɛ pɔ ba laa tena la nɛ.

²⁴ Nomɛlbwa toole dɛ́ no he waa nɔ mun. Bɛl la waa soɡa dɛɛ daah laala, ne bɛl la waa la laa bwa chɛ kɛ he bwa bɔna kɛrɛdɛ.”

²⁵ Devid ɛ ɡɛ waa nɔ mmara dɛ tɛ Israel tena, a ta do le ba le fini.

²⁶ Devid aa tel Siklaɡ la, o kpɔ laala la ane ka tɛ Juda nomonome baa ɛ o daamanar la dɛ ŋɔ, “Kwaa maa paa laa ta dɛ le Korowii dɔma be, dɛ kpɔ a bini ane dɛɛ ba ba tɛ heyaa laanee la.”

²⁷ O kpɔ kwaa la ane ka tɛ banɔ la baa lɔ bwɛjena Bɛtel ne Ramɔt ne Jatir aa lɔ Juda weekaŋle harɛbɔr,

²⁸ ne banɔ la baa lɔ Arowa ne Sefmɔt dɛ Ɛstemoa,

²⁹ ne Rakal, ne Jeramiil tena bwɛɛre, dɛ Ken tena,

³⁰ ne banɔ la baa lɔ Hɔrma, ne Bor Asan dɛ Atak,

³¹ ne Hɛbrɔn dɛ nɛra baa lɔ harɛre Devid ne o laa tena aa ɡaaɡe a ta bwa.