1 Samoɛl 3 - mzwDBL

Korowii yerɛ Samoɛl

¹ Samoɛl lɔ sɔfo Eli sie dɛɛ ɛ Korowii toma. Gɛ saŋ dɛ Korowii waa waa cheɡɛ nɛra nɛɛ dɛɛ bol la ta warɛ. Dɛ waa nae chaahna ta ɡe aa kanɛ.

² Awola jwaana bɛl dɛ Eli chɔ dea, hwɛɛhra kohona nomanta, dɛ waa na kɛrɛdɛ kpa.

³ Dɛ kandea waa lɔ Korowii Dea Boɡoroŋ la ta dɛ chaah, asɛ Samoɛl chɔ bela Korowii Ne Nɛwɛnyina Fɔo Daka la aa cheɡa.

⁴ Asɛ Korowii yerɛ Samoɛl, o chaŋe ŋɔ, “N dɔɔ, menee la.”

⁵ Ate, o chwa la Eli be ka ŋɔ, “N dɔɔ he yer mɛ, menee la.” Eli chaŋo ŋɔ, “N ta hen yerɛ, berɛ kaa ka chɔ.” Asɛ o berɛ kaa.

⁶ A habɔɔ Korowii berɛ yerɔ ja, asɛ o ir dɛ la Eli be ka ŋɔ, “N dɔɔ, he yer mɛ, menee la.” Eli chaŋo ŋɔ, “N bie, n ta hen yerɛ, berɛ kaa ka chɔ.”

⁷ Dɛ Korowii ta waa Samoɛl be bolɛ bwa mɔɔ, anomanta, dɛ waa jemɛ kɛŋɔ onee dɛɛ yerɔ.

⁸ Korowii yerɔ toorotena, asɛ o berɛ ir la Eli be ŋɔ, “N dɔɔ, he yer mɛ, menee la.” Belaa Eli na kɛŋɔ Korowiirii dɛɛ yerɔ la.

⁹ Ate, Eli ŋɔ Samoɛl be ŋɔ, “Berɛ kaa ka chɔ, he baa no kɛ ba dɛ yerɛ jaa, he ŋɔ, ‘N Naa Korowii, bol waa he bonɔɔ be, n dɛ no.’ ” Asɛ Samoɛl berɛ kaa o chɔɔbɔr bela ka chɔ.

¹⁰ Korowii berɔ ba che o jwɛh dɛɛ yerɔ kɛ wubwa la ŋɔ, “Samoɛl! Samoɛl!” Asɛ o chaŋe ŋɔ, “N dɔɔ, bol waa he bonɔɔ be, n dɛ no.”

¹¹ Anee Korowii ŋɔ Samoɛl be ŋɔ, “Na, n dɛ ba waane ɛɛ Israel tena bini ásɛ bɛlbwa waa no la, o bwara yɔr kohona dɛɛ chel.

¹² Awola tɔpere la, mɛɛ tɛr Eli ne o dem tena deŋnee ɡɛ aa chɛa, maa wola beŋkpoŋ kwaraa ta.

¹³ N tɔ sie ɡel o jemɛ kɛŋɔ mɛɛ tɛr o ne o dem tena deŋnee o bibaala waa baa bola yaɡ mɛ la wa, dɛkalkɛ o ta ban kasinteŋ dii.

¹⁴ Gɛ waa nɔ nomanta, n ŋwɛɛrɔ kɛŋɔ Eli ne o dem tena wechɔɡa baa ɛa la, hale kwaa kpoora kɛɛ saraha bɛlbwa ɛɛ aa won larawe tɛɛ ba.”

¹⁵ Samoɛl chɔɔ asɛ tɔɔ per chɔmbibi o ir dɛ ka ya Korowii Dea ɡbeni la. Dɛ o dɛ ɔmɛ kɛ o bol waa waa noa le Korowii be la Eli be,

¹⁶ kɛ Eli yerɔ dɛ ŋɔ, “N bie Samoɛl.” Asɛ o chaŋo ŋɔ, “N dɔɔ, menee la.”

¹⁷ Eli bɔɔro ŋɔ, “Bɔkwa waa Korowii bol he be nɔ? Bɛ wobɛlbwa kpɔ sɔɔh mɛ. Dɛ he kpɔ wobɛlbwa Korowii aa bol he be sɔɔh mɛ naa, ó tɛr he deŋne kohona.”

¹⁸ Anomanta, Samoɛl bol waa la bwa baɡlo, o ta bɛlbwa kpɔe sɔɔh. Ate Eli ŋɔ, “Onee Korowii, ɡel o ɛ waa aa too o tea.”

¹⁹ Korowii ja Samoɛl nɛ o ba kpeɡ, dɛ ɡel o wobɛlbwa ɡe waa dɛ bol la ɛ kasinteŋ.

²⁰ Anomanta, Israel harɛ ta bwa, le Dan dea harɛ waa lɔ weekaŋle harɛbɔr, ka tel bwɛɛ Beɛseeba waa lɔ weekaŋle nyundua bwa jemɔ kɛŋɔ Samoɛl ɛ Korowii keame.

²¹ Korowii teŋɔ kpɔ o te baa baɡle Samoɛl Silo bela, dɛ baɡlo waa waa bol.