1 Samoɛl 29 - mzwDBL

Devid berɔ kaa Siklaɡ

¹ Filisti tena boa ba laa tena bwa nyoa bwɛɛ bɛl baa dɛ yerɔ Afɛk, asɛ Israel tena ɡe baŋre ba tɛnte deene bule bɛl waa lɔ Jesreel Fɛlembɔjen la bini jwɛh.

² Filisti koranar banue aa bɔne ba laa tena bini lafare ne kaɡboŋa dɛɛ valɛ la, dɛ Devid ne o laa tena ne Kooro Akis ɡe ka mun ta, dɛ teŋɛ ba nɛ.

³ Filisti laa nomonome la na ba dɛ bɔɔ ŋɔ, “Bɔkwaa Hibru tena nɔ ɛɛ nyin bonɔ nɔɔ?” Anee Kooro Akis chaŋe ŋɔ, “Devid o fa aa ɛ Israel Kooro Sɔɔl nomonome la bini bɛlee. O soɡe n be dɛ ɡwaa benanyoa nɔ, dɛ le saŋ waa le Kooro Sɔɔl be dɛ ba n be, n ta o wechɔɡe bɛlbwa nae bwa.”

⁴ Kɛ Filisti tena laa nomonome la baah di Kooro Akis nɛ dɛ ŋɔ, “Gel o berɛ kaa ka so bwɛɛ haa kpɔa tɛo la ta. A ta chɛ kɛŋɔ yá ne o pɛ la laa, ɡɛ laa aa, o ken ɛɛ berɛ siee chaɡɛ ya nɛɛ dɛ́ kpoo yaa. Dɛ Devid wono kpoo ya laa tena dɛ dɔ ba nyuune ka tɛ Kooro Sɔɔl aa, o sie ɛɛ lɛ o nɛɛ ó berɛ lɛo.”

⁵ Devid nɔ laa haahna kpɔ ɡo yela dɛɛ sa ŋɔ, “Kooro Sɔɔl kpoo nɛra kaɡboŋa, asɛ Devid ɡe kpoo kaɡboŋa fi la aa?”

⁶ Belaa Kooro Akis yerɛ Devid dɛ ŋɔ, “N ŋwɛɛ Korowii Israel tena aa dɛ tomɔ o do le saŋ bɛlbwa kɛŋɔ, he waa dɔ kasinteŋ tɛ mɛ. N sie fe ɛɛ lɛo kɛ he ja n nɛɛ dɛ́ ka yo laa nɔ. Dɛ le awola haa ba n be ba le fini, n ta he wechɔɡe bɛlbwa nae, kɛ koranar la bane sie ta he nɛɛ lɛɛ.

⁷ Berɛ kaa deŋnesɔɔhna ne, bɛ wobɛlbwa ɛ ásɛ dɛ jo Filisti koranar la nɛ.”

⁸ Anee Devid chaŋe ŋɔ, “N dɔɔ, ɛrɛɛ n ɛɔ? Wechɔɡ besoo he na men maa ɛ he bonɔɔ nɛɛ dɛ le tɔpere maa ba he be dɛ ba le fini nɔɔ? Ɛrɛɛ maa wola won ka yo n dɔɔ kooro dɔma ɔ?”

⁹ Kooro Akis ŋɔ, “N jemɔ kɛ he waa wer, wechɔɡa bɛlbwa toole he nɛɛ kɛ nyundua torome ken. Kɛ ane a bwa, koranar la bane ŋɔ haa won ja ya nɛɛ dɛ́ la laa.

¹⁰ Anomanta, fel ir kere chɔɔ, he ne banɔ la haa le Kooro Sɔɔl be dɛ ba la bwa, ásɛ he le kaa bɔr chaahna saŋ.”

¹¹ Asɛ Devid ne o baala baa ja o nɛɛ la fel ir chɔmbibii dɛ berɛ kaa Filisti tena harɛ ta, asɛ Filisti tena la ɡe kaa Jesreel.