1 Samoɛl 28 - mzwDBL

Kooro Sɔɔl ne Ɛndɔr haah waa dɛ voɡɛ wa

¹ A habɔɔ la, Filisti tena boa ba laa tena nyoa dɛ́ ka yo Israel tena. Anee Kooro Akis waa ɛ Filisti tena koranar la bini bɛl ŋɔ Devid be ŋɔ, “A chɛ kɛ he jemɛ kɛŋɔ he ne he laa tena nɔ ɛɛ ja n ne n laa tena nɛɛ yá ka yo.”

² Ate Devid ŋɔ, “A wer. Men maa ɛ he bonɔɔ nɔ, hɛɛ kpɔ siwii na waa maa dɛ ba wona ɛ.” Asɛ Kooro Akis chaŋe ŋɔ, “A wer, henee mɛɛ ba ɡela hɛɛ daah mɛ he soɡa bini bwa.”

³ Samoɛl baa sewɛ, asɛ Israel tena bwa wiu, dɛ huɡo o ɡbaɡba bwɛ bwɛjen Rama. Dɛ Kooro Sɔɔl doŋi nɛra baa voɡa dɛɛ yerɛ lala ne voɡra bwa le harɛ la ta.

⁴ Filisti laa tena chemo dɛ ba baŋre ba tɛnte deene bwɛɛ Sunem, asɛ Kooro Sɔɔl ɡe boa Israel laa tena bwa nyoa ba baŋre ba tɛnte deene Gelboa Bwejen ta.

⁵ Kooro Sɔɔl aa na Filisti laa tena la, o ɔmɔ kohona.

⁶ O bɔɔrɔ le Korowii be dɛ na ɡɛ o fe aa ɛ, kɛ Korowii ta on chaŋɛ deera ta kɛɛ Urim ne Tumim waa ɛ komɛl baa cheɡɛ o ta dɛɛ jemɛ waa aa wera Korowii be, kɛɛ Korowii keamere be.

⁷ Kooro Sɔɔl ŋɔ o laa nomonome be ŋɔ, “Hé nyin haah waa voɡa dɛɛ yerɛ lala tɛ mɛ, ásɛ n la ka bɔɔ le o be.” Anee ba ŋɔ, “Bɛl lɔ bwɛɛ Ɛndɔr.”

⁸ Anomanta, Kooro Sɔɔl kpɔ laalafala do, ásɛ nomɛlbwa bɛ on jemɛ, asɛ dɛ kpɔ nɛra banɛ ja o nɛ, ba la haah la be jwaana la ne. Asɛ o ŋɔ haah la be ŋɔ, “Yerɛ lale maa yerɛ o sɔn tɛɛ nɔ tɛ mɛ.”

⁹ Asɛ haah la ŋɔ o be ŋɔ, “Kasinteŋ, he jemɛ waa Kooro Sɔɔl aa ɛa dɛ doŋi voɡra ne nɛra baa dɛ yerɛ lala le Israel harɛ nɔ ta. Ɛrɛɛ hɛɛ neɡ mɛ dɛ́ dɔɔ mɛ kpo nɔɔ?”

¹⁰ Ate, Kooro Sɔɔl ŋwɛɛ ŋɔ, “N ŋwɛɛ Korowii waa lole kɛŋɔ, haa deŋnetɛra bɛlbwa dɔe ba dɛ́ le ɡɛ waa nɔ ta.”

¹¹ Haah la bɔɔro ŋɔ, “Ume lalee hɛɛ nyin ń yerɛ tɛɛ nɔ?” Kooro Sɔɔl chaŋe ŋɔ, “Yerɛ Samoɛl lale tɛ mɛ.”

¹² Haah la aa na Samoɛl la, o do lɔŋɔ kohona dɛ ŋɔ Sɔɔl be ŋɔ, “Ɛrɛɛ he neɡ mɛ nɔɔ? Henee Sɔɔl.”

¹³ Anee Kooro Sɔɔl ŋɔ o be ŋɔ, “Bɔkwaa hɛɛ na nɔ, bɛ ɔmɛ?” Anee haah la ŋɔ, “N dɛ na komɛl waa do kɛŋɔ lale dɛ le lalabwɛɛ dɛɛ ba.”

¹⁴ Kooro Sɔɔl bɔɔro ŋɔ, “Bɔkwaa wɛɛ leɔ?” Haah la chaŋe ŋɔ, “O do kɛŋɔ banjena bɛl waa do batakaarejaŋ dɛɛ ba.” Ate, Kooro Sɔɔl jemɛ kɛŋɔ Samoɛlee, asɛ o kpɔ sie pi harɛ dɛ duuru.

¹⁵ Samoɛl ŋɔ Kooro Sɔɔl be ŋɔ, “Ɛrɛɛ he ta ɡelɛ n chɔ jeih asɛ he yer mɛ le baŋ nɔɔ?” Anee Kooro Sɔɔl ŋɔ, “N bambile chɔɡɔ kohona. Filisti tena dɛ yoo mɛ, asɛ Korowii berɛ habɔɔ kpo mɛ. Waa Korowii keamere kɛɛ deera ta cheɡɛ dɛɛ chaŋ mɛ kpa. A waa mɛɛ yerɛ he baɡ mɛ ɡɛ maa ɛ.”

¹⁶ Anee Samoɛl ŋɔ, “Dɛ Korowii berɛ habɔɔ kpoe dɛ ɛ he dɔm aa, ɛrɛɛ hɛɛ yer mɛ ŋɔ n ɛɔ?

¹⁷ Korowii cheɡɛ n nɛɛ dɛ ɛ waa waa ŋɔa wɛɛ ɛɔ la. O lɛ harɛ la kpeɡri he be dɛ kpɔ tɛ he dɔŋ Devid.

¹⁸ Haa wola waa Korowii aa doe a ta teŋɛ, he ta Amalɛk tena yoi dɛ kpoo ba kɛrɛdɛ la, a waa Korowii kpɔ waa nɔ ba ta he nɛɛ taraken la.

¹⁹ Korowii ɛɛ kpɔ he ne Israel tena bwaa do Filisti tena nɔn ta, ásɛ kere he ne he bibaala bwa sewɛ ba n be. Korowii ɛɛ berɔɔ kpɔ Israel laa tena bwa ɡe do Filisti tena nɔn ta.”

²⁰ Buɡ la ta, Kooro Sɔɔl den chole dɛ toɡre chɔ, ɔmee lawɔ kohona waa Samoɛl aa bola la wa. Dɛ o ɡwɛɡrɔ dɛkalkɛŋɔ o ta kondikwaa dii chɔɔ ne awola jwaana la bwa.

²¹ Haah la aa ba Kooro Sɔɔl be dɛ na o chɔ dɛɛ chel kohona la, o ŋɔ, “N naa, he toloo men, dɛ seo kwaraa yaa, n sɛoh dɛ ɛ wobɛlbwa haa ŋɔa n ɛ la.

²² Taraken, no he tolo wa ásɛ n tɛɛ kondikwa he di, dɛ́ dɔ bokpeɡfala dɛ́ won kaa bela haa dɛ kaa.”

²³ O vɛoh dɛ ŋɔ, “Máa di.” Kɛ o nomonome banɛ la ja haah la nɛ ba soŋo o no ba waa la. Ate, o ir harɛ dɛ so karajaŋ ta.

²⁴ Dɛ haah la dɔ nabale bɛl waa do noo dem bela, asɛ o den kpoo buɡ la ta. O kpɔ men aa kpera kɛrɛdɛ dɛ kpɔ ɛ paanoo iisi aa wola toole a ta.

²⁵ Asɛ dɛ kpɔ cheɡ Kooro Sɔɔl ne o nomonome la sie ba di. Awola jwaana la tentenee ba ir dɛ kaa.