1 Samoɛl 27 - mzwDBL

Devid kaa so Filisti tena bini

¹ Devid baa lii o nyu bini ŋɔ, “Tɔpebɛl Kooro Sɔɔl ɛɛ ba kpo mɛɛ. Chwae chɛ kɛ ń chwa kaa Filisti tena harɛ ta ka so. Anee dɛ́ ɡel ó ɡel n bɔr ɡaaɡa Israel harɛ ta bobɛlbwa, dɛ bɛ men dɔ lawɛ.”

² Anomanta, Devid ne o laa tena lafraanumɛl leɔ warane, dɛ kaa Mayɔk bibaa Akis waa ɛ Gat kooro be.

³ Devid ne o laa tena soɡe Gat bela Kooro Akis be, bɛlbwa ne o haahna ne o bii. Devid ne o haahna banɛ, Ahinoam waa le Jesreel, ne Abiɡel o ɡe aa ɛ Nabal luhaah dɛ le Kaamɛl.

⁴ Baa bol Kooro Sɔɔl be kɛ Devid chwao ka so Gat la, o ta o bɔr ɡaaɡɛ kpa.

⁵ Devid ŋɔ Kooro Akis be ŋɔ, “Dɛ he sie lɛ n nɛ aa, ɡel ba tɛ mɛ he bwɛjeɡre nɔ bɛl ń ka so o ta. He ne he bonɔɔ aa won pɛ so bwɛjen beŋkpoŋ ta ɡɛ.”

⁶ Anomanta, awola tɔpere la, Kooro Akis kpɔ bwɛɛ Siklaɡ tɛo o ka so bela. Le ɡɛ saŋ dɛ kaa la, Siklaɡ ɛ Juda koranar bwɛɛre la bɛl.

⁷ Devid soɡe Filisti harɛ ta benanyoa beŋkpoŋ ne korobie anaarɛ.

⁸ Devid ta aa soɡe Siklaɡ la, o ne o laa tena la kaa lɔ tɔ Gesur ne Girsi dɛ Amalɛk tena nɛ. Saŋ la dɛ a ɡɛ nɛra nɔ soɡe Suur harɛ dɛ kpoŋe ka le Ijipt harɛ ta.

⁹ Saŋ bɛlbwa Devid aa ka yo bobɛl tena la, waa baa kɛɛ haah bɛlbwa ɡel. O dɛ kpɔ peera ne nae ne keeɡore ne nyoɡmare dɛ yale bwa kaa. A habɔɔ la, o yon berɛ ba Kooro Akis be.

¹⁰ Kooro Akis bɔɔro ŋɔ, “Leperaa he ka yo dɛ pa laala fini naa,” ɡɛɛ Devid yon ŋɔ o be ŋɔ, “N kaa yo Juda weekaŋle harɛbɔr tena” kɛɛ “Jeramiil dea harɛ tena,” kɛɛ “Ken harɛ tena.”

¹¹ O ta baa kɛɛ haah bɛlbwa ɡelɛ o ka Gat. O liiro ŋɔ, “Baa ka bol waa n ne n laa tena aa ɛa laanee.” Devid aa soɡe Filisti tena harɛ ta la, dɛ waa waa dɛ ɛ laanee la.

¹² Kooro Akis yarada Devid, asɛ dɛ lii o nyu bini ŋɔ, “O nɛra Israel tena haoh kohona nomanta, wɛɛ so n bee dɛ́ tom mɛ dɛɛ la.”