1 Samoɛl 24 - mzwDBL

Devid sune Kooro Sɔɔl nɛ

¹ Kooro Sɔɔl aa kaa ti Filisti tena dɛ berɛ ba la, ba ŋɔ o be ŋɔ, “Devid lɔ Ɛn Gedi pua hɛŋle ɡbo harɛ ta bela.”

² Anomanta, Kooro Sɔɔl le laa tena kaɡboŋa batoro baa jemɛ yoi kɛrɛdɛ le Israel tena bwa bini ŋɔ bá ka ɡaaɡe Devid ne o nɛra bɔr deŋɡare bɛl baa dɛ yerɔ Kpɔɡ Bini Boohna Bwea ta.

³ Kooro Sɔɔl baa tel peera leɡa ane aa lɔ ŋwɛnɛ la nyoa bwebɔɔ bɛl bɔr, asɛ o jo o bini ka kwaa o te. Dɛ Devid ɡe ne o nɛra lɔ bwebɔɔ la jaɡa.

⁴ Asɛ Devid nɛra la ŋɔ o be ŋɔ, “Fini tɔpere nɔ, Korowii dɛ bol he be ŋɔ, ‘Mɛɛ kpɔ he dɔmee do he nɔn ta he ɛo ɡɛ bɛlbwa haa dɛ nyin.’ ” Ate, Devid huuh dɛ sɔh ka mɔn Kooro Sɔɔl batakaare nyoa, dɛ waa jemɛ.

⁵ A habɔɔ la, Devid liire chɔɡɔ kɛ waa kaa mɔn Kooro Sɔɔl batakaare nyoa la.

⁶ Asɛ o ŋɔ o laa tena la be ŋɔ, “Korowii ɛɛ la ane bojaŋ kɛŋɔ n ɛ nɛn n dɔɔ Korowii aa fuɡe noo do o nyu ta, dɛ cheɡo kora ta wechɔɡa ŋwɛnɛ bɛlbwa ta.”

⁷ Devid cheɡɛ waa nɔ ta dɛ kah o laa tena la, o ta ɡelɛ ba ka yo Kooro Sɔɔl. Ate, Kooro Sɔɔl le bwebɔɔ la bini dɛ kaa.

⁸ Belaa Devid ɡe le bwebɔɔ la bini dɛ yerɛ Kooro Sɔɔl ŋɔ, “N naa kooro.” Kooro Sɔɔl aa kea nyiŋu la, Devid ɡure nyu su, dɛ kpɔ sie pi harɛ.

⁹ O ŋɔ Kooro Sɔɔl be ŋɔ, “Ɛrɛɛ he cheɡ deŋne dɛɛ no nɛra nyoa wobol kɛŋɔ n dɛ nyin hen waane ɛɛ nɔɔ?

¹⁰ He ɡbabir nao fini ɡɛ Korowii aa kpɔe do n nɔn ta bwebɔɔ la bini. Bane ŋɔ ń kpoe, kɛ n ɡele dɛ ŋɔ maa nɛn n dɔɔ Korowii aa fuɡe noo do o nyu ta, dɛ cheɡo kora ta la wechɔɡa bɛlbwaa ɛ ŋwɛnɛ bɛlbwa ta.

¹¹ N naa, nyiŋi na, he batakaare peraa n kpoŋe la! Menee baa laa mɔn, kɛ n ta hen kpoe. Jemɛ name kɛŋɔ maa he ne wechɔɡa lii, kɛɛ dɛ́ ɛɛ wechɔɡa bɛlbwa. N ta hen wobɛlbwa ɛɛ, kɛ he teŋɛ n nɛɛ dɛɛ nyin mɛ dɛ́ kpo.

¹² Korowiirii dɛ́ bol n ne he baah waa dɛ́ pa bole. Onee dɛ́ bɔe kem waa haa liira n nɛɛ la wa, kɛ n te maa hen waanee ɛ bwa.

¹³ Saŋ la tena bolɔ ŋɔ, ‘Wechɔɡ-ɛɛra bee dichɔɡa le,’ anomanta, maa n nɔnee kpɔ leɡe.

¹⁴ Umee Israel kooro ɛɛ nyin o bɔr dɛ́ kpo nɔɔ? Men maa do kɛ nyoate lale maa wola toole wobɛlbwa bini, kɛɛ koŋɡaahle nɔ naa?

¹⁵ Korowiirii dɛ́ bol n ne he baah waa dɛ́ na naate waa di bolchɔɡe. Onee dɛ́ nyiŋi waa nɔ ta ásɛ dɛ cha mɛ, dɛ́ lɛɛ mɛ le he nɔn ta.”

¹⁶ Devid aa bol ɡɛ waa nɔ tonɛ la, Kooro Sɔɔl bɔɔro ŋɔ, “He taa nɔ naa, n bie Devid?” Asɛ Kooro Sɔɔl wi kohona.

¹⁷ O ŋɔ, “He waa toɡrɔ dɛ ɡwaa mɛ. He te nyiŋi n nɛɛ kɛrɛdɛ, kɛ menee wola hen nyiŋe.”

¹⁸ Kooro Sɔɔl ŋɔ, “Namee he baɡle wedɛɛɡa haa ɛɛ mɛ bwa, Korowii kpɔ mɛ do he nɔn ta, kɛ he ta men kpoe.

¹⁹ Dɛ nɛn dɔ o dɔm aa, o ɡelo wɛɛ kaa pɛɛpɛɛ aa? Korowiirii dɛ́ chae kohona wedɛɛɡa haa ɛa dɛ ɡel n kpoe nɔ wa.

²⁰ N jemɔ kɛrɛdɛ kɛŋɔ henee dɛ́ di kora Israel harɛ, dɛ harɛ la ɛɛ cheo kɛrɛdɛ naa, he bee aa ba lee.

²¹ Taraken nɔ, ŋwɛɛ Korowii kɛŋɔ haa n naanaree kpo kɛɛ haa n sɔnee fee le n mɛɛ lolanar bini.”

²² Anomanta, Devid ŋwɛɛrɔ baɡle Kooro Sɔɔl. Asɛ Kooro Sɔɔl berɛ kaa dem, kɛ Devid ne o laa tena la berɔ kaa bela ba fa aa kaa sɔh la.