1 Samoɛl 23 - mzwDBL

Devid lɛ Keila tena

¹ Devid baa no kɛŋɔ Filisti tena dɛ yo bwɛɛ Keila dɛ ŋwɛ mefala le o ta dɛɛ kaa.

² Asɛ o bɔɔ Korowii ŋɔ, “Ń ka yo Filisti tena nɔ naa?” Anee Korowii chaŋo ŋɔ, “Kaa ka yoo ba, dɛ́ lɛ Keila tena ta.”

³ Kɛ baala baa ja Devid nɛɛ la ŋɔ o be ŋɔ, “Juda harɛ ta bonɔ kwaraa yaa ɔmɛ nɔ. Ɛrɛɛ yaa ba wona la Keila dɛ́ ka pu Filisti laa tena yoo?”

⁴ Devid berɔ bɔɔ waa le Korowii be asɛ o chaŋo ŋɔ, “Kaa Keila dɛ́ ka puu ba yo, mɛɛ ɡeloo he pɔ Filisti tena la nɛ.”

⁵ Anomanta, Devid ne o laa tena la Keila, dɛ ka yo Filisti tena dɛ larawe ba kondɛɛra bwa kaa. O kpo Filisti tena ɡalɡa dɛ lɛ Keila tena ta.

⁶ Dɛ Abiata waa ɛ sɔfo Ahemɛlɛk bibaala la kpɔ sɔfo batakaarebora efɔd la kpoŋe ɡɛ saŋ waa chwaa ba Devid be Keila la.

Kooro Sɔɔl ti Devid

⁷ Ba ŋɔ Kooro Sɔɔl be ŋɔ Devid kaa Keila asɛ o ŋɔ, “Korowiirii kpɔ Devid do n nɔn ta la. O ɡbabirii kaa tɔ o te dea, dɛ ka jo bwɛɛ baa ma danjwɛɛ baro, dɛ kpɔ bune kaɡre o doonyojena ta.”

⁸ Belaa Kooro Sɔɔl yerɛ o laa tena ŋɔ bá la Keila dɛ́ ka bar Devid ne o laa tena cheme dɛ́ yoo ba.

⁹ Devid aa naa kɛŋɔ Kooro Sɔɔl dɛ vɔrɔwe o kpoe waa la, o ŋɔ sɔfo Abiata be ŋɔ, “Kpɔ sɔfo batakaarebora efɔd la ba tɛ mɛ, ásɛ ya bɔɔ le Korowii be ɡɛ yaa ɛ.”

¹⁰ Asɛ Devid ŋɔ, “N Naa Korowii Israel tena aa dɛ tomɛ, he bonɔɔ noɔ kɛrɛdɛ kɛŋɔ Kooro Sɔɔl koh n waa dɛɛ ba ba yo Keila tena dɛ́ chɔɡ bwɛɛ la.

¹¹ Keila tena ɛɛ sɛoh dɛ́ kpɔ mɛ tɛo wa aa? Kooro Sɔɔl ɛɛ bao ɡɛ he bonɔɔ aa noa la aa? N Naa Korowii Israel tena aa dɛ tomɛ, ɡel he bonɔɔ jemɛ.” Anee Korowii chaŋe ŋɔ, “Kooro Sɔɔl ɛɛ bao.”

¹² Devid berɔ bɔɔ ja ŋɔ, “Keila tena ɛɛ le n ne n laa tenaa tɛ yá do Kooro Sɔɔl lɔɡa kɛɛ?” Anee Korowii ŋɔ, “Baa le heyaa tɛo.”

¹³ Anomanta, Devid ne o laa tena dɛ ɛ nɛra lafraanumɛl le Keila warane dɛ kaa. Kooro Sɔɔl aa noa kɛŋɔ Devid chwao le Keila la, o ta bela laŋɛ kpa.

Devid la deŋɡarere harɛ ta

¹⁴ Devid kaa sɔh Sif pua hɛŋle ɡbo harɛ ne o deŋɡarere ta. Tɔpere bɛlbwaa Kooro Sɔɔl ɛɛ ɡaaɡe o bɔr, kɛ Korowii ta ɡelɛ o dɔ Devid lawɛ.

¹⁵ Waa lɔ bwɛɛ Hɔrɛs waa bɛne Sif pua hɛŋle ɡbo harɛ ta la, o noɔ kɛŋɔ Kooro Sɔɔl dɛ́ nyinu dɛ́ kpo.

¹⁶ Asɛ Kooro Sɔɔl bibaa Jonatan la Devid be Hɔrɛs, dɛ ka doo ɡbemba kɛŋɔ Kórowii kpɔ nɔn tɔ o nɛ.

¹⁷ O ŋɔ o be ŋɔ, “Dɛɛ berɛ ɔma, n mɛɛ aa hen wobɛlbwa ɛɛ ba. Henee dɛɛ ba Israel kora dii, ásɛ he toole naa, menee dɛ́ teŋɛ. Hale n mɛɛ Kooro Sɔɔl ɡbabir jemɔ.”

¹⁸ Belaa ba nɛra banɛ la fɔwɛ fɔo Korowii sie, Jonatan berɛ kaa dem, asɛ Devid te so Hɔrɛs bela.

¹⁹ Sif tena la Kooro Sɔɔl be Gebea dɛ ka ŋɔ, “Devid sɔh ya baah nɔ ta, Hɔrɛs deŋɡarere ta Hakila Bwejen waa lɔ Jasimɔn weekaŋle harɛbɔr doa.

²⁰ N naa kooro, ya bwa nao ɡɛ haa dɛ nyinu dɛ́ lawɛ, ba ya be bonɔ ásɛ ŋwɛnɛ bɛlbwa ta la, yá ɡel he dɔɔ lawɛ.”

²¹ Kooro Sɔɔl chaŋ ba ŋɔ, “Kórowii swee heyaa andɛɛɡa kɛ haa dɛ dawɛ n waa nɔ.

²² Hé berɛ kaa dɛ́ ka nyiŋi a bini kɛrɛdɛ, dɛ́ na bela Devid aa lole, ne naate waa nao bela. Ba dɛ bol ŋɔ o keo taeh.

²³ Hé ka ɡaaɡe bɔra o yon kaa sɔh a ta la, dɛ́ berɛ ba bol kasinteŋ aa lɔ a ta n be. Ásɛ n ne he kaa, dɛ o lɔ bela ɡbosoroo tenaa, mɛɛ ɡaaɡe o bɔree, hale Juda harɛ bwa ta.”

²⁴ Anomanta, ba tɔ Kooro Sɔɔl sie dɛ kaa Sif. Dɛ Devid ne o laa tena lɔ Mayɔn pua hɛŋle ɡbo harɛ Jɔɔdan Fɛlembɔjen ta, Jesimɔn weekaŋle harɛbɔr.

²⁵ Kooro Sɔɔl ne o laa tena pa mun dɛɛ ɡaaɡe, asɛ Devid no kɛŋɔ ba dɛ ɡaaɡe o bɔr, asɛ o chwa ka so deŋɡare bɛl doa Mayɔn pua hɛŋle ɡbo harɛ ta. Kooro Sɔɔl ɡe aa noa kɛ o lɔ bela la, o tiu bela dɛ kaa ɡaaɡe o bɔr.

²⁶ Kooro Sɔɔl ne o laa tena kpɔ bwejen la baŋ bɛl dɛɛ kaa, asɛ Devid ɡe ne o nɛra do o baŋ bɛl dɛ ɛ warane dɛɛ nyin ba le Kooro Sɔɔl ne o laa tena be. O ne o nɛra aa dɛ tel Devid ne o nɛra be dɛ laɡ ba la,

²⁷ dɛ torome bɛl deno ba Kooro Sɔɔl be dɛ ŋɔ, “N naa kooro, berɛ ɛ warane ba taraken! Filisti tena baa su harɛ la bwa dɛɛ ba o chɔɡa.”

²⁸ Ate, Kooro Sɔɔl den ɡel Devid bɔr ɡaaɡa dɛ berɛ kaa dɛ ka yo Filisti tena la. A waa ba pa bela sɔn Sela Hamalekɔt la.

²⁹ Asɛ Devid le bela dɛ kaa Ɛn Gedi harɛ ta, bela waa chwaa ka sɔh la.