1 Samoɛl 21 - mzwDBL

Devid chwao le Kooro Sɔɔl be

¹ Devid la sɔfo Ahemɛlɛk be Nɔb. Sɔfo Ahemɛlɛk aa nao la, o leɔ ba chemo, dɛ o bwara dɛ sa, asɛ Ahemɛlɛk bɔɔro ŋɔ, “Ɛrɛɛ he ɡbo ɛɛ valɛ nɔɔ? Bɔkwa waa nomɛlbwa ta he nɛɛ jae yɔ?”

² Devid chaŋe sɔfo Ahemɛlɛk ŋɔ, “Kooro Sɔɔl tom mɛ waane ta dɛ ŋɔ n be ŋɔ, ‘Nomɛlbwa ta chɛ kɛ ó jemɛ waa haa koh a waa dɛɛ valɛ, ne anɔ la maa ŋɔa he ɛ.’ Kɛ laa tena baa ja n nɛɛ la te, n ŋɔ ba be ŋɔ bá chem mɛ bobɛl.

³ Taraken, kondikwaa besoo lɔ he be nɔ? Tɛ mɛ paanoo anue kɛɛ kon te bɛlbwa haa dɔa.”

⁴ Anee sɔfo la chaŋe Devid ŋɔ, “N ta paanoo pɛɛ bɛlbwa dɔe, atane onɔ la baa lea cheɡ tɛ Korowii la ɡbo. Dɛ he laa tena nɔ ta haahna chɔe baah nɔ ta tenaa, he lɛ tɛɛ ba.”

⁵ Devid ŋɔ, “Kasinteŋ, n ne laa tena nɔ dɛ kaa wepɛɛ ta kwaraa naa, ba laa ba te dɛɛ kpɔ haahna chɔe ta, doŋa bɛlbwa le ba nɛ, ń baa bol waa aa hiah dɛ do ken nɔ.”

⁶ Anomanta, sɔfo la kpɔ paanoo baa lea cheɡ tɛ Korowii o do ɡoroŋ la tɛo, dɛkalkɛ dɛ paanoo bɛlbwa toole ka ja anɔ la baa kpɔa dɛɛ bil Korowii sie. O laa kpɔ teebur waa do ɡoroŋ la ta, dɛ kpɔ anɔ la aa wɔba ba chiɡ a naa ta.

⁷ Dɛ Doeɡ waa le Edom, dɛ ɛ Kooro Sɔɔl peteɡre nomoa lɔ bela awola tɔpere la dɛɛ tomɛ Korowii.

⁸ Devid bɔɔ sɔfo Ahemɛlɛk ŋɔ, “He dɔ lampea kɛɛ kere he be bonɔ naa? N ta kere kɛɛ dɔmkon bɛlbwa ne bonɔ balɛ, dɛ kooro toma la waa hiaoh kohona, asɛ mɛɛ too nomanta, n ta wone kpɔ komɛlbwa.”

⁹ Sɔfo la chaŋo ŋɔ, “Goliat waa ɛ Filisti te he kpoo Ɛla Fɛlembɔjen bini la kere lɔ n be bonɔ. Ba kpɔ yal fɔrɔwo o tel sɔfo batakaarebora efɔd la habɔɔ. He dɛ nyin aa, he ka kpɔ. Kere bɛlbwa toole bonɔ ka ja o nɛɛ kpa.” Ate Devid ŋɔ, “Keredɛɛɡe toole bobɛlbwa, kpɔ tɛ mɛ.”

Devid la bwɛjen Gat

¹⁰ Awola tɔpere la, Devid chwao le Kooro Sɔɔl be dɛ kaa bwɛjen Gat Kooro Akis be.

¹¹ Anee Kooro Akis nomonome bɔɔ Devid ŋɔ, “Hen Devid nɔ laa ɛ kooro he harɛ ta la aa? He laa ba kpɔ ɡo yela dɛɛ sa ŋɔ, ‘Kooro Sɔɔl kpo nɛra kaɡboŋa, asɛ Devid ɡe kpo nɛra kaɡboŋa fi la aa?’ ”

¹² Devid kpɔ ɡɛ waa nɔ do o nyu bini, dɛ koh a waa dɛɛ ɔmɛ bwɛjen Gat Kooro Akis kɛrɛdɛ.

¹³ Anomanta, o saahnɔ dɛɛ ɛ kɛŋɔ waa dɛ we choɡla ken ba sie, o taa lɔ ba nɔn ta la, dɛ o we-ɛɛla bwa ɛ choɡla wa, dɛ kpɔ kon dɛɛ peeɡe ba doonyojen ɡbeni ta, asɛ dɛ ɡel nentane ɛɛ yɔɔ o tampona.

¹⁴ Kooro Akis ŋɔ o nomonome be ŋɔ, “Hé na baa la! O dɛ we choɡla! Bɔkwaa dɔ o ne n be bonɔ bala ɔ?

¹⁵ N nya choɡla tena asɛ he berɛ lawɛ onɔ ɡe ba n sie o baa ɛ anɔ bwa nɔ naa? Nɛn waa do ken chɛ kɛ ó ba dem bonɔ naa?”