1 Samoɛl 20 - mzwDBL

Devid ne Jonatan

¹ Anee Devid chwa le Nayɔt waa lɔ Rama dɛ la Jonatan be ka bɔɔro ŋɔ, “Bɔkwa waa n ɛɔ? N wechɔɡaa ame o? Bɔkwaa n ɛ he mɛɛ wɛɛ nyin mɛ dɛ́ kpo nɔɔ?”

² Jonatan chaŋo ŋɔ, “Akai, Korowii ɛɛ la ane bojaŋ kɛ he sewɛ! Dɛ n mɛɛ ɛɛ ɛ wejena kɛɛ wejeɡa bɛlbwa kwaraa yaa, o ɡelɔ mɛɛ jemɛ a bini. Waa kpɔ sɔɔh mɛ. A ta kasinteŋ ɛɛ.”

³ Anee Devid ŋwɛɛ ŋɔ, “He mɛɛ jemɔ kɛŋɔ n dɛ nyin he wa, asɛ o lii o nyu bini ŋɔ, ‘Jonatan ta chɛ kɛ ó jemɛ ɡɛ waa nɔ, ɡɛ laa aa, o bambile ɛɛ chɔɡoo.’ N ŋwɛɛ Korowii waa lole saŋ bɛlbwa nɔ kɛŋɔ, n ne seo baah aa jaŋɛ kpa.”

⁴ Jonatan ŋɔ Devid be ŋɔ, “Komɛlbwa haa dɛ nyin kɛ ń ɛ la, mɛɛ ɛo tɛɛ.”

⁵ Ate Devid ŋɔ, “Keree Korobifale Tɔpejen, a chɛ kɛ n ne kooro di kwa. Kɛ ɡel ń chwa ka sɔh kpɔɡ bini ka tel kerele jɔmɔra.

⁶ Dɛ he mɛɛ ta men ba nae yaa, he ŋɔ, ‘Devid soŋ mɛ, n tɛo ŋwɛnɛ o ɛ warane kaa o bwɛɛ Bɛtlɛham, dɛkalkɛ o lolanar bwa dɛ ba kwaa kpoora ɛ benanyoa saraha.’

⁷ Dɛ o sɛoh waa, ate mɛɛ dɔ n nyuu. Kɛ dɛ o baah diu waa, dɛ he jemɔ kɛŋɔ o dɛ nyin mɛ dɛ́ kpo.

⁸ He te sune men maa ɛ he bonɔɔ nɔ nɛ, ásɛ dɛ teŋɛ fɔo n ne haa fɔwa Korowii sie la ta. Dɛ n di bolchɔɡe aa, he ɡbabir den kpo mɛ. Ɛrɛɛ chɛ kɛŋɔ he kpɔ mɛ tɛ he mɛɛ ɔ?”

⁹ Jonatan ŋɔ, “Akai, dɛ n noɔ tamaa bɛlbwa kɛŋɔ n mɛɛ siwi beɡrɔ wɛɛ nyini dɛ́ kpo aa, n fe ta he be bolaa?”

¹⁰ Anee Devid bɔɔro ŋɔ, “Dɛ he mɛɛ baah diu o ta sɛɛh yaa, umee dɛ́ bol n be nɔ?”

¹¹ Jonatan ŋɔ, “Ba ya kaa kpɔɡ bini.” Asɛ ba bwa teŋɛ dɔŋa nɛɛ kaa.

¹² Ate, Jonatan ŋɔ Devid be ŋɔ, “Korowii Israel tena aa dɛ tomɔ la ɛ ya bwa danseɛ. Kerele saŋ nɔ bɔr, mɛɛ bɔɔ n mɛɛ waa nɔɔ, dɛ o ta liichɔɡa bɛlbwa dɔe he nɛ aa, mɛɛ ɡeloo he no.

¹³ Dɛ n mɛɛ dɛ nyini dɛ́ kpoe naa, n ŋwɛɛrɔ kɛ dɛ n ta he be bolɛ dɛ ɡel he dɔ bɔr chwa aa, Kórowii tɛr n deŋne kohona. Korowiirii dɛ́ ja he nɛɛ ɡɛ waa ja he mɛɛ nɛɛ la.

¹⁴ Kɛ dɛɛ nyin mɛ kohona n soɡa bini bwa ɡɛ Korowii aa nyini la, ásɛ ba bɛ men kpo.

¹⁵ Baɡle ɡɛ nyina la n lolanar nɛ, ásɛ dɛ Korowii chɔɡ n dɔma bwa le harɛ nɔ ta kwaraa naa.

¹⁶ Bɛ ɡel fɔo n ne haa fɔwa la chɔɡ. A ba ɡɛ naa Korowii ɛɛ tɛr he deŋnee.”

¹⁷ Jonatan ɡelɔ Devid berɛ kwaa baɡɛ nyoa kɛ wɛɛ dɛɛ nyin o waa kohonaa, dɛkalkɛŋɔ o dɛ nyin Devid waa kɛŋɔ o ɡbaɡba ken.

¹⁸ Ate, Jonatan ŋɔ Devid be ŋɔ, “Korobifale Tɔpejen dii kere, baa hen na, he kara ɛɛ che pɛɛ.

¹⁹ Le kere jɔmɔra bɔr la, berɛ kaa bela haa kaa sɔh ɡɛ saŋ waa nɔ aa pa mun la, dɛ́ sɔh Esel bwetal la jwɛh.

²⁰ Mɛɛ ta hɛma atoroo yaɡɛ o keŋkeŋ kɛŋɔ maa dɛ nyin komɛl dɛ́ yaɡɛ ken.

²¹ Mɛɛ tomɛ n bonɔɔnee dɛ́ ŋɔ, ‘La ka ɡaaɡe hɛma la bɔr.’ Dɛ n ŋɔ o be ŋɔ, ‘Na, hɛma la lɔ he baŋ bonɔ, kpɔa ba bonɔ naa,’ a dɛ baɡle kɛ he dɔ he nyu name, ásɛ he le ba. N ŋwɛɛ Korowii kɛŋɔ dɛ ɔmee bɛlbwa toole kpa.

²² Kɛ dɛ n ŋɔ o be ŋɔ, ‘Hɛma la lɔ he sideŋ bela aa,’ amɔ le kaa, dɛkalkɛŋɔ Korowii ŋɔa ŋɔ he kaa,

²³ ásɛ he lii waa n ne haa bola la, Korowii ɛ ya bwa danseɛ, á do ya baah saŋ bɛlbwa dɛɛ la.”

²⁴ Devid sɔh kpɔɡ bini bela asɛ Korobifale Tɔpejen la dii aa tela la, Kooro Sɔɔl ka so dɛɛ ba kwaa dii.

²⁵ Kooro soɡo pɛl danjwɛ bela waa ɛ o soŋnibɔr, asɛ Jonatan so o sie chaɡɔ, Abna ɡe so teŋɛ Kooro Sɔɔl nɛ, kɛ dɛ Devid sobɔr la te chɔ pɛɛ.

²⁶ Awola tɔpere la, Kooro Sɔɔl ta wobɛlbwa bolɛ, dɛ o dɛ lii ŋɔ, “Waane ken ka chiɡ Devid nɛɛ dɛ ɡel o kah doŋa waa wola won ba Tɔpejen nɔ dii ta.”

²⁷ Tɔ aa pera Korobifale Tɔpejen tɔpenɛɛte ta la, dɛ Devid sobɔr la chɔ pɛɛ ja. Anee Kooro Sɔɔl bɔɔ o bibaa Jonatan ŋɔ, “Bɔkwa waa bala Jese bibaa la aa wola kondikwaa nɔ bɔr balɛ dɛ ne fini bwa nɔɔ?”

²⁸ Asɛ Jonatan chaŋe ŋɔ, “Devid soŋ mɛ ŋwɛnɛ ŋɔ o dɛ la Bɛtlɛham.

²⁹ O ŋɔ ń tɛo ŋwɛnɛ ó kaa, dɛkalkɛ o lolanar kpo kwaa dɛɛ ba saraha ɛɛ ba bwɛ, asɛ o dɔɔ wa ta nɔn yerɔ ŋɔ ó ba. Dɛ n nao kɛŋɔ n dɛ nyin o wa aa, n tɛo ŋwɛnɛ ó la ka na o lolanar. A waa haa wola on o sobɔr nae la.”

³⁰ Ate, Kooro Sɔɔl baah di Jonatan nɛ dɛ ŋɔ o be ŋɔ, “Bie o nya deŋne aa kpeɡa o waa aa wola kasinteŋ dɔe kohona! N nao kɛŋɔ he ne Jese bibaa bwa nyoa pɛo dɛ́ kpɔ sihiih kpo he ɡbaɡba ne he nya.

³¹ Haa jemɛ kɛŋɔ Devid taa soɡe le nɔ, haa won ɛ kooro ya harɛ nɔ ta naa? Kaa taraken dɛ́ ka kpɔɔ ba bonɔ, a chɛ kɛ ó sewɛ.”

³² Asɛ Jonatan bɔɔ o mɛɛ ŋɔ, “Ɛrɛɛ chɛ kɛŋɔ bá kpoo wɔ? Bɔkwa waa o ɛɔ?”

³³ Ate, Kooro Sɔɔl ta o lampea ŋɔ, ó kpo Jonatan. A ɡelɔ o jemɛ kɛŋɔ o mɛɛ siwi beɡrɔ kɛ ó kpo Devid kpela.

³⁴ Jonatan iro o baah di kohona o le teebur ta, a ɡɛ Korobifale Tɔpejen la tɔpenɛɛte la ta. O ta kwaa dii, dɛkalkɛ a dɛ we o nɛ, sihihwaa o mɛɛ aa ɛa dɛ chɛɡre Devid la.

³⁵ Tɔ aa pera chɔmbibi la, Jonatan kaa kpɔɡ bini dɛ ka cheme Devid, dɛ bechala bɛl ja o nɛ.

³⁶ Asɛ o ŋɔ bie la be ŋɔ, “Chwa dɛ́ ka ɡaaɡe hɛma maa taa la bɔr.” Bie la aa chwaa dɛɛ kaa la, dɛ Jonatan tao dɛɛ ta o sie.

³⁷ Bie la aa tel bela hɛm la aa kaa le la, Jonatan nyɛɡ o nɛɛ ŋɔ, “Hɛm la chɔ he sideŋ.”

³⁸ Anee o kɔr bie la ŋɔ, “Ɛ warane kaa. Bɛ che!” Bie la kaa kpɔ hɛm la dɛ berɛ ba o nomoa be.

³⁹ Dɛ bechala la aa waa nɔ bɛlbwa bini jemɛ, Jonatan ne Devid ɡboo jema.

⁴⁰ Jonatan kpɔ o dɔmkwaa la choɡ bie la ŋɔ ó kpɔ kaa dem.

⁴¹ Bie la aa kaala la, Devid iro le Esal bwetal o fa aa kaa sɔh o ta la ta, dɛ ba ɡuŋi Jonatan sie, dɛ kpɔ sie pi harɛ kera atoro. Asɛ ba ɡbaa dɔŋa pɛl ba te, dɛ bwa ɛɛ wi, kɛ Devid wii laanee ɡwaala.

⁴² Jonatan ŋɔ Devid be ŋɔ, “Kaa deŋnesɔɔhna ne, ya bwa ŋwɛɛrɔ Korowii sɔn ta ŋɔ, ‘Korowii ɛ ya danseɛ dɛ́ chɔ le tɛ n ne hen, he naanar ne n ɡe naanar baah saŋ bɛlbwa dɛɛ la.’ ” Belaa Devid kaa asɛ Jonatan ɡe berɛ kaa bwɛɛ la ta.