1 Samoɛl 2 - mzwDBL

Hana Korowii jaama

¹ Anee Hana jam Korowii ŋɔ, “N Naa Korowii, he ɡelɔ n sie lɛ kohona, n sie lɛ waa haa ɛa wa! He ɡelɔ n sie lɛ mɛɛ mamɛ n dɔma, lɛɛ haa lɛɛ mɛ la wa.

² Nomɛlbwa toole dɛ do ɡoroŋ kɛ hen Korowii, he habɔɔ nɛn toole, Lɛɛ bɛlbwa toole kɛ hen Korowii haa ɛ Bwetal yaa tomɛ nɔ.

³ Gel mbarafo wobol bola, bɛ wobosale dɛɛ bol. Hen Korowii te, he jemɛ wobɛlbwa, he jemɛ wobɛlbwa nɛn aa dɛ ɛ, dɛɛ pa a bole.

⁴ He kuuɡi banyoola tori, dɛ ɡel nɛra baa ɡwɛɡra dɔ bokpeɡa.

⁵ Nɛra ba fa aa dɔ kondikwaa kohona la, ba ɛ toma tɛ ba bala mɔɔ dɛɛ di kwa, banɔ la ba fa aa dɛ chɔ lɔr ɡe dɔ dɛɛ di name. Hambara wono lolɛ bii banuanɛ, onɔ la waa dɔ bibaala kohona ɡe ta dɔe kpa.

⁶ Hen Korowiirii dɛɛ kpo, dɛ́ berɛ tɛ mkpa, henee ɡela nɛra sewɛ baa huɡ ba, dɛ́ berɛ ir dɛ́ dɔ mkpa.

⁷ Henee ɡela nɛra ɛɛ nya, dɛ́ berɛ ɛ bane kondɔɔhna, dɛ́ lɔ nɛra harɛ dɛ́ berɛ ɡɔɔ bane ɡe.

⁸ He lawɛ nɛra baa nyaa le ba nyaa bini, dɛ lɛɛ ba dɛɛ le ba sum ta. He ɡelɔ nɛŋɡwɛɡra ne koranar pɛ dɛɛ so, dɛ ɡel baa dɔ jirima. Hen Korowii dɔ kwaa aa lawɛ harɛ nɔ kpoŋe kpeɡri, a taa he ma harɛ nɔ chɔŋɛ.

⁹ He dɛ tɔ he nɛra ba wa aa toɡra ɡbemɡbe, kɛ nyubinikpeɡ tena te, he dɛ kpoo ba. Nɛn aa won che o bokpeɡa ta ɛ wobɛlbwa.

¹⁰ Nɛra baa ɛ hen Korowii dɔm bwa ɛɛ serewoo, hɛɛ kɔro kɛŋɔ bwaala le nyundua, dɛ́ ba chɔɡ ba. Hen Korowiirii dɛ́ ba bol harɛ nɔ nɛra bwa waa dɛ́ pa bole. Hɛɛ tɛ he kooro haa leo cheɡ kpeɡrii ó pɔ o dɔma nɛ.”

¹¹ Belaa Ɛlkana ne Hana berɛ kaa Rama bela baa soɡa. Kɛ Samoɛl te soɡe Silo bela sɔfo Eli be, dɛɛ ɛ Korowii toma.

Sɔfo Eli bibaala wa

¹² Dɛ sɔfo Eli bibaala nyu bini kpeɡri, baa Korowii ɔmɛ.

¹³ Waa aa chɔ le tɛ nɛra baa ba kpo kwaa ɛ saraha a do bane sɔfore baah laanee kɛŋɔ, ol la taa chɔŋɛ nii ta la, sɔfo bonɔɔ waa lɔ o sie la yon kpɔ buni o nyoo aa ɛ atoro kpoŋe.

¹⁴ Wɛɛ taɡɔɔ su ola la bini, asɛ bɛlbwa waa le o ne la ɛ sɔfo la kon. Dɛ ɡɛɛ ba kpɔ dɛɛ ɛ Israel tena baa ba Silo bela baa ɛ saraha bwa.

¹⁵ Mɔɔ baa fuh ol la noo la, sɔfo la bonɔɔ yon ba naate waa ba dɛ ɛ saraha la be ŋɔ, “Tɛ mɛ ol n ka wɔɔ tɛ sɔfo, waa ondaale nyin, atane onlwɛɛ.”

¹⁶ Dɛ nɛn waa baa ɛ saraha la ŋɔ o be ŋɔ, “Fuh ol la noo tonɛ mɔɔ, dɛ́ kpɔ onɔ la haa dɛ nyin” aa, bonɔɔ la ɛɛ chaŋoo ŋɔ, “Akai, kpɔ tɛ mɛ taraken, dɛ ɡɛ laa aa, amɔ te kpeɡri nee mɛɛ ba kpɔe.”

¹⁷ Sɔfo Eli bibaala wechɔɡa baa do kan Korowii sie. Dɛ ba ta ɡelɛ duure do kwaa baa kpɔa ba ɛ saraha dɛɛ tɛ Korowii la ta.

¹⁸ Gɛ saŋ dɛ Samoɛl ta ɛ bechala dɛ do sɔfo batakaarebora efɔd baa kpɔ yapondɛɛɡe nyarɔ dɛɛ ɛ Korowii toma.

¹⁹ Bena bɛlbwa, o nya ne o mɛɛ dɛ́ la ka ɛ saraha tɛ Korowii Silo aa, o nya yon nyarɛ batakaarebora ka tɛo.

²⁰ Sɔfo Eli yon swee andɛɛɡa tɛ Ɛlkana ne o haah ŋɔ, “Korowii ɡel he ne haah nɔ dɔ bii, bá ba chiɡ onɔ haa soŋo o waa dɛ kpɔ ba tɛo nɔ naa ta.” Ásɛ o ne haah la bwa yon berɛ kaa ba bwɛ.

²¹ Korowii na Hana sum dɛ tɛo bibaala batoro dɛ bihaahna banɛ. Samoɛl lɔ Silo bela Korowii sie dɛɛ tomɔ, dɛ ba kpeɡ.

²² Sɔfo Eli baa hwɛɛh name, dɛ no waa o bibaala la aa kpɔa dɛɛ ɛ Israel tena bwa, ne ɡɛ baa lawɛ haahna baa dɛ ɛ toma Korowii Dea Cheremibɔr doonyoa bela dɛɛ chɔ.

²³ Anee Eli bɔɔ ba ŋɔ, “Ɛrɛɛ hɛɛ ɛ ɡɛ nɔɔ? N no dichɔɡa haa dɛ di, dɛ le nɛra la bwa be.

²⁴ Akai, n bii, he bwara wechɔɡa maa dɛ no Korowii nɛra nyoo la perɛ harɛ nɔ ta bwa.

²⁵ Nɛn ɛ o dɔŋ wechɔɡa aa, Korowiirii dɛ́ won kwaa ba baah. Kɛ dɛ nɛn ɛ Korowii wechɔɡa aa, nɛn toole dɛ́ cha naate kpa.” Bii la ta ba mɛɛ kaeh waa kah ba la noɛ, dɛ Korowiirii ɛa ɡɛ dɛ́ kpoo ba.

²⁶ Samoɛl nao dɛ ɡee kpeɡ, o waa do wer Korowii ne nɛwɛnyini bwa be.

Waa Korowii aa bola dɛ chɔɡ Eli ne o dem tena

²⁷ Awola Korowii keame bɛl Korowii aa pili waane bini baɡlo ba sɔfo Eli be dɛ ba ŋɔ, “Waa Korowii aa dɛ bol laanee nɔ, ‘N fa ta n te kpɔe baɡle he naawa kɛrɛdɛ Ijipt harɛ ta ɡɛ saŋ baa lɔ Ijipt kooro lɔɡa la aa?

²⁸ Israel deene fi dɛ anɛ bwa binii n le he naa Arɔn ne o bibaala cheɡ ŋɔ, bá ɛ n sɔfore, dɛ́ɛ la bela baa ɛ saraha dɛɛ tɛ men Korowii, dɛ́ ka fuh daawiile a sɔɔh aa soma dɛ́ɛ tom mɛ, dɛ́ do sɔfo batakaarebora efɔd ba n sie. N berɔ tɛ he naawa dea tena ŋwɛnɛ Israel tena kwaa baa kpɔa ba ɛ saraha dɛ fuh dɛɛ tɛ mɛ la, baa kpɔ a bini ane.

²⁹ Ɛrɛɛ n saraha kwaa ne kwaa baa dɛ kpoora, n lea cheɡ ŋɔ bá kpɔ baa tɛ mɛ bela maa lole la, he nyiŋa dɛɛ vah nɔɔ? He duu he bibaala dɛɛ ɡwaa mɛ, saraha kwaa n nɛra Israel tena aa kpɔa baa tɛ mɛ la, he kpɔ a bodɛɛɡa bɔra la di dɛ je faɡra.’

³⁰ Anomanta, men Korowii Israel tena aa dɛ tom mɛ fa baɡɛ heyaa nyoa kɛŋɔ, he dem nɛra ne he mɛɛ dem nɛraa dɛ́ do n sie, dɛ́ɛ tom mɛ kɛ sɔfore saŋ bɛlbwa dɛɛ la. Taraken te maa an ɡɛɛ ɛ kpa. Nɛra baa dɛ duu mɛ la, mɛɛ ɡeloo bá dɔ duure, nɛra baa nyiŋ mɛ dɛɛ vah la, n ɡee nyiŋ baa vah.

³¹ Dɛɛ no, saŋ bɛl dɛ́ ba bala ásɛ n kpoo bonɔɔna baa le dea haa le o ta ne he lolanar bini, ásɛ bɛlbwa aa hwɛɛh he bini kpa.

³² Hɛɛ di suna bela maa lole laanee, ásɛ n swee andɛɛɡa tɛ Israel tena baa kaa la. Kɛ he lolanar bini te, bɛlbwa aa kpeɡ dɛ́ ba hwɛɛh bwa.

³³ He naanar bini beŋkpoŋii mɛɛ ba ɡela o ɛ n sɔfo. Kɛ mɛɛ ɡeloo ó nyoŋe, o bambile chɔɡ, ásɛ he naanar baa kaa bwa piɡri serewe laa ta ba bonɔɔne saŋ.

³⁴ Waa aa pu he bibaala banɛ Hofni ne Fenehas laanee kɛ, ba bwa ɛɛ pɛo sewɛ tɔpebeŋkpoŋ, ásɛ he jemɛ kɛŋɔ waa maa bola la ɛ kasinteŋ.

³⁵ N ɡbaɡba ɛɛ le sɔfo o waa aa dɔ kasinteŋ dɛɛ ɛ n bambile bini waa tɛ n te, dɛ́ ɡel o dɔ naanar kohona, ásɛ baa tomɛ kooro maa leo cheɡ tɛ n te la.

³⁶ Ásɛ nomɛlbwa waa kaa he lolanar bini la ba ɡuŋi sɔfo la sie, dɛ́ soŋo suuɡa ne kondikwa. Dɛ berɛ soŋo ŋɔ ó kpɔɔ sɔfore toma ta, ásɛ o won dɔ kondikwaa dɛɛ di.”