1 Samoɛl 19 - mzwDBL

Kooro Sɔɔl dɛ nyin Devid kpoe

¹ Awola bɛl, Kooro Sɔɔl ŋɔ o bibaa Jonatan ne o nomonome be ŋɔ bá kpo Devid. Kɛ dɛ Jonatan dɛ nyin Devid waa taeh,

² asɛ Jonatan kah Devid ŋɔ, “N mɛɛ dɛ nyin ŋwɛnɛ dɛ́ kpoe. Dɛɛ nyiŋi he te kɛrɛdɛ, kere chɔɔ nyin bobɛl waa sɔah dɛ́ chwa ka so bela.

³ N ne n mɛɛ ɛɛ ka che bela haa ka sɔh laanee, ásɛ n bol he waa baɡlo, ásɛ dɛ o bol waane aa, ń ba bol he be.”

⁴ Jonatan bol Devid bwara wedɛɛɡe baɡle o mɛɛ Kooro Sɔɔl dɛ ŋɔ, “Bɛ he bonɔɔ Devid wechɔɡa ɛ, o ta hen wechɔɡa bɛlbwa ɛɛ, waa waa ɛa la ɡe chae kohona.

⁵ O sɛh seo dɛ ka pu Goliat yo dɛ kpoo. Korowiirii ɡela o yo tɛ he ne Israel tena bwa, asɛ he bwa sie lɛ. Ɛrɛɛ hɛɛ ba wona kpo nɛndɛɛɡe waa do ken pɛɛpɛɛ ɔ?”

⁶ Kooro Sɔɔl no o bibaa Jonatan waa la dɛ ŋwɛɛ Korowii ŋɔ, “Kasinteŋ, maa Devidii kpo.”

⁷ Anomanta, Jonatan yerɛ Devid dɛ bol waa la bwa o be. O lawɔ ba Kooro Sɔɔl be asɛ o ne o so kɛ wubwa la.

⁸ Laa berɔ ba chole ja, asɛ Devid la dɛ ka yo Filisti tena la. O kpoo ba kɛrɛdɛ, ba kar bwa ɡe chwa kaa.

⁹ Kɛ Korowii ɡelɔ kwaa ir Kooro Sɔɔl nɛɛ kpeɡri nɛ, dɛ o soɡe o dem dɛ kpoŋe lampea. Dɛ Devid ɡe dɛ lɔ o janjela,

¹⁰ asɛ Kooro Sɔɔl fe ɛɛ nyin o yaɡɔ marɛ danjwɛɛ ta, asɛ o ke o te lampea la ka yaɡɛ danjwɛɛ la ta. Awola jwaana la, Devid chwao le dem bela.

¹¹ Kooro Sɔɔl tomɛ bonɔɔna ŋɔ bá la Devid dem jwaana ka kpaahno, ásɛ bɔr ne chaahna la dɛ ba kpoo. Kɛ Devid haah Mikal kaoh ŋɔ, “Dɛ he ta bɔr nyine dɛ chwa jwaana nɔ ne naa, tɔɔ ne pera dɛ ba kpoe.”

¹² Anomanta, Mikal cha Devid o kpɔ tokoro ta, dɛ tu bwɛɛ la dahara chwa kaa.

¹³ Mikal kpɔ yal fɔrɔwe ba buse bela voɡ dɛ kpɔ bil mpa ta, dɛ kpɔ booh pona bil o nyu bɔr.

¹⁴ Kooro Sɔɔl aa tomɛ o bonɔɔna ŋɔ bá ka lawɛ Devid ba la, Mikal ŋɔ ba be ŋɔ, “O bwara dɛ weo.”

¹⁵ Anee Kooro Sɔɔl berɛ tom ba Devid be ja ŋɔ, “Hé la ka kpɔɔ le o mpa ta ba tɛ mɛ, ásɛ n kpoo.”

¹⁶ Kɛ bonɔɔna la aa laŋa dɛ ka jo dea la, dɛ voɡ bɛl chɔ mpa la ta asɛ boohpona ane chɔ o nyu bɔr.

¹⁷ Anee Kooro Sɔɔl ŋɔ o bie Mikal be ŋɔ, “Ɛrɛɛ he neɡ mɛ dɛ ɡel n dɔm dɔ bɔr chwa kaa ken?” Mikal chaŋe ŋɔ, “O ŋɔ n be ŋɔ n ta on chae o dɔ bɔr kaa laa, wɛɛ kpo mɛɛ.”

¹⁸ Devid aa chwaa kaa la, o kaa Samoɛl be Rama dɛ ka bol ɡɛ Kooro Sɔɔl aa kpɔa ɛo bwa. Ate, o ne Samoɛl kaa Nayɔt, dɛ ka so bela.

¹⁹ Belaa Kooro Sɔɔl aa noa kɛŋɔ, Devid lɔ Nayɔt waa lɔ Rama la,

²⁰ o tomɛ o bonɔɔna ŋɔ bá la ka lawɔ. Baa laŋa la, ba nao kɛŋɔ Korowii keamere aa wara dɛɛ bol Korowii wa, asɛ Samoɛl tɔ ba sie. Belaa Korowii Doma ba so Sɔɔl bonɔɔna la nɛɛ kpeɡri nɛ, asɛ ba ɡe ɛɛ bol waa la ane dɛɛ sa.

²¹ Ba kaa bol Kooro Sɔɔl be a wa, asɛ o berɛ tomɛ bonɔɔna la bane ja, ba ɡe ba bol Korowii waa la ane dɛɛ sa. Kooro Sɔɔl tomɛ bonɔɔna toorotena, ba ɡe ka bol Korowii waa dɛɛ sa.

²² Anee Kooro Sɔɔl ɡbaɡba chiɡ ŋwɛnɛ ta kaa Rama, dɛ ka tel kɔlɔŋ bɛl waa lɔ bwɛɛ Seku. Asɛ o bɔɔ ŋɔ, “Leperaa Samoɛl ne Devid dɔɔ?” Ba chaŋe ŋɔ, “Ba lɔ Nayɔt waa lɔ Rama la.”

²³ Anomanta, Kooro Sɔɔl la Nayɔt waa lɔ Rama asɛ Korowii Doma ba so o ɡe nɛɛ kpeɡri nɛ, o valɛ bol Korowii waa la dɛɛ sa ka tel kɛŋɔ waa tel Nayɔt.

²⁴ O foo o laala dɛ ka che Samoɛl sie, dɛɛ bol Korowii waa la dɛɛ sa. O chɔ mumɡbal ɡɛ tɔpebir la bwa, webaŋa ne jwaana. A waa nɛra yon dɛɛ bɔɔ ŋɔ, “Kooro Sɔɔl ɡe ja Korowii keamere la nɛɛ kɛɛ?”