1 Samoɛl 17 - mzwDBL

Devid ne Goliat

¹ A balɔ kɛŋɔ Filisti tena lawɛ ba laa tena cheme Soko waa lɔ Juda harɛ ta. Ba kaa baŋre ba tɛnte deene bobɛl baa dɛ yerɔ Efes Damim, o lɔ Soko ne Aseka baah ta.

² Kooro Sɔɔl ne Israel tena la chemo, dɛ baŋre ba tɛnte deene Ɛla Fɛlembɔjen bini, ásɛ ba ne Filisti tena ka yo.

³ Filisti tena la cheɡɛ deŋɡare bɛl ta baŋ bɛl, asɛ Israel tena ɡe che bɛl ta, fɛlembɔjen la chɔ ba baah ta.

⁴ Dɛ Filisti tena banyoo bɛl sɔne Goliat, o le Gat. O jaŋne ɡwaa naɡale anuanaarɛ, o le bela Filisti tena aa baŋre ba tɛnte deene la bini ba che.

⁵ Ayaawaa ba kpɔ ɛ o ɡbɛrɛ, o laa batakaare ɡe ɛ ayaawa, a tɔɡre lɔ suuɡapoŋa kaɡboŋa anue.

⁶ Ayaawaa ba kpɔ ɛ kwaa bɔle o nakpale, asɛ ayaawa lampea saɡɛ o vam ta.

⁷ O lampea daa bare do kɛŋɔ yasɔɔh kokorowa ken, o nyoa buni tɔɡre ɡe lɔ suuɡapoŋa lafraanumɛl. Nɛn waa kpoŋe kon waa kpɔa dɛɛ tɔ o te ɡbemɡbe tɔ o sie.

⁸ Goliat iro che, dɛ nyɛɡ Israel laa tena nɛɛ ŋɔ, “Ɛrɛɛ hé ba che bonɔ dɛɛ nyin kɛ hé ba yo yaa nɔɔ? Filisti te laa men asɛ he ɡe ɛ Kooro Sɔɔl bonɔɔna aa? Hé le nɛmbeŋkpoŋ, ásɛ o ba puu mɛ yo.

⁹ Dɛ o wono yoo mɛ dɛ kpo mɛ naa, yaa ba do he lɔɡaa dɛɛ tomɛ heya. Kɛ dɛ menee pɔ o nɛɛ dɛ kpoo ɡe aa, hɛɛ ba do ya lɔɡaa dɛɛ tomɛ yaa.

¹⁰ Fini tɔpere nɔ, he jeɡa n siwi ta kwaraa! Hé nyiŋi he Israel tena bini bwa, dɛ́ le baa waa won ba che ásɛ n ne ó yo.”

¹¹ Baa no waa Filisti te la aa bola la, Kooro Sɔɔl ne Israel tena la bambile teŋo kɛrɛdɛ.

¹² Devid mɛɛ sɔne Jese. O le Efrat waa lɔ Bɛtlɛham, Juda harɛ ta. Jese bibaala lɔ banuatoro. Gɛ saŋ Kooro Sɔɔl aa di kora Israel la, dɛ o hwɛɛhrɔ kɛrɛdɛ.

¹³ Dɛ Jese bibanomonome batoro teŋɛ Kooro Sɔɔl nɛɛ kaa laa la ta. Biloɡle la sɔne Eliab, nɛɛte la Abinadab, toorote ɡe Samaa.

¹⁴ Ba bwa kaloɡee Devid. Nomonome batoro la ɡe teŋɛ Kooro Sɔɔl nɛ,

¹⁵ kɛ Devid yon le Kooro Sɔɔl be kaa Bɛtlɛham dɛ́ ka teɡɛ o mɛɛ peera tama, dɛ́ yon berɛ ba.

¹⁶ Tɔpera fifraanaarɛ, chɔɔ ne jɔmɔra bwaa Goliat waa ɛ Filisti te la yon le ba che, dɛɛ muɡli Israel tena la baah.

¹⁷ Awola bɛl, Jese ŋɔ Devid be ŋɔ, “Kpɔ boyuhala kuruware fi ne paanoo fi nɔ chwa warane ka tɛ he dɔɔranar bela baa baŋre ba tɛnte deene dɛ so la.

¹⁸ Kpɔ waɡasi fi nɔ ka tɛ ba laa nomoa la ɡe, ásɛ dɛ dɔ waane ba bol n be á baɡle kɛ he dɔɔranar ta waane doe.

¹⁹ Ba ne Kooro Sɔɔl ne laa tena la bwa lɔ Ɛla Fɛlembɔjen la bini, ba ne Filisti tena ɛɛ yo.”

²⁰ Tɔ aa pera chɔmbibi la, Devid ɡel peera la tɛ peteɡre bɛl, dɛ kpɔ o bone chiɡ ŋwɛnɛ ta kaa, ɡɛ o mɛɛ aa ŋɔa la. Waa tel bela baa soɡa la, dɛ laa tena la ɡe deno le dɛɛ kaa bela baa dɛ la ka yo laa la, dɛɛ dooɡe laa lɔŋɔre.

²¹ Israel laa tena la kaa che, asɛ Filisti laa tena ɡe ka che ba bɔr, ba bwa sie chaɡɛ dɔŋa.

²² Devid kpɔ o kondikwaa ja nɛn waa dɛ nyiŋi ba laala ta la, dɛ chwa kaa o dɔɔranar be laa la ta, dɛ ka na ɡɛ baa doa.

²³ Waa la ba be o ne baa bol waa la, Filisti tena kpeɡnɛn waa le Gat baa yerɔ Goliat la suuhno ba sie, dɛ kpɔ nyɛɡa dɛɛ muɡli ba baah, asɛ Devid no.

²⁴ Israel tena la aa na Goliat la, ba jum jaoh dɛ bwa chwa le o sie.

²⁵ Name dɛ Israel tena la dɛ bol ŋɔ, “Hé na ɡɛ baa nɔ aa naa dɛɛ ba ya be nɔ kenɛ? O balɔ dɛ baa muɡli ya Israel tena baah. Nomɛlbwa waa won kpo baa nɔ la, kooro ɛɛ tɛo kondɔɔh kohonaa. Wɛɛ berɔ lawɛ o bihaah tɛo ó mo, ásɛ dɛ ɡel naate mɛɛ nɛra ɡel toɔ bɔe Israel harɛ ta.”

²⁶ Anee Devid bɔɔ nɛra baa cheɡɛ o jwɛɛh la ŋɔ, “Dɛ nomɛl wono kpo Filisti baa nɔ dɛ le Israel tena sihiih nɔ ta naa, bɔkwaa wɛɛ ba dɔe yɔ? Umee Filisti te nɔ waa wola Korowii tomɛ, dɛ ɡe won dɛɛ muɡli Korowii waa lole saŋ bɛlbwa laa tena baah nɔɔ?”

²⁷ Ba berɔ bol waa ba fa aa dɛ bol o be ŋɔ, “Gɛɛ baa ba ɛɛ tɛ nomɛlbwa waa dɛ ba wona kpo Goliat.”

²⁸ Devid dɔɔ nomoa Eliab aa noa kɛŋɔ Devid ne baala la dɛ bol waa la, o baah di o nɛ, dɛ bɔɔro ŋɔ, “Bɔkwaa hɛɛ nyin bonɔ nɔ? Umee he kpɔ peera la kabora ja pua hɛŋle ɡbo harɛ ta bela wɛɛ nyiŋi a ta nɔ? N jemɛ ɡɛ haa dɛ ɡɔɔ he te, ne ɡɛ he bambile aa kpeɡa, he balɔ dɛ́ ba nyiŋi laa nɔ.”

²⁹ Devid ŋɔ, “Bɔkwa waa n ɛɔ? N bɛ waa ɡe bolaa?”

³⁰ O berɔ bɔɔ nɛnfala waa o fa aa bɔɔ baala la, asɛ ba chaŋo ɡɛ baa chaŋo wubwa la.

³¹ Baala bane no waa Devid aa bola la, dɛ la ka bol Kooro Sɔɔl be, asɛ o ɡel ba yerɛ Devid tɛo.

³² Asɛ Devid ŋɔ Kooro Sɔɔl be ŋɔ, “Bɛlbwa bɛ ɡel o bambile chɔɡ Filisti te nɔ wa, men maa ɛ he bonɔɔ nɔ ɛɛ lao dɛ́ ka yoo.”

³³ Kooro Sɔɔl chaŋo ŋɔ, “Bechalaa hen, haa won ka puu yo. O bonɔɔne saŋ bwaa o le dɛɛ yo.”

³⁴ Kɛ Devid ŋɔ Kooro Sɔɔl be ŋɔ, “Dɛ he bonɔɔ dɛ teɡɛ o mɛɛ peera, dɛ nyujente kɛɛ sisire baa lawɛ bɛl dɛɛ kaa laa,

³⁵ n dɛ teŋɛ o nɛɛ dɛ́ yo, dɛ́ lɛo le o be. O berɛ sie dɛɛ ba n be naa, n dɛ hamɛ o baŋa dɛ́ lɔɔro kpo.

³⁶ Gɛ Korowii aa ɡela he bonɔɔ won kpo nyujente ne sisire kwaraa la, ɡɛɛ mɛɛ ba Filisti te waa wola Korowii tomɛ nɔ ɡe ɛɛ, dɛkalkɛŋɔ o ɛ Korowii waa lole saŋ bɛlbwa la sisawa.

³⁷ Korowii waa lɛɛ mɛ le nyujente ne sisire nɔn ta la, wɛɛ lɛɛ mɛ le Filisti te nɔ nɔn ta.” Ate, Kooro Sɔɔl ŋɔ Devid be ŋɔ, “Kaa, Korowii ja he nɛ.”

³⁸ Asɛ Sɔɔl kpɔ o ɡbaɡba laa batakaare ne kwaa waa kpɔa dɛɛ yo do Devid, dɛ kpɔ o ayaawa ɡbɛrɛ piu.

³⁹ Devid kpɔ o laa kere sɛɡle laa batakaare la ta, dɛ kpɔ valɛ bar tama, dɛkalkɛŋɔ dɛ ɡɛ laala ta on manɛ. O ŋɔ Kooro Sɔɔl be ŋɔ, “Maa won valɛ ane, n ta ane doe bwa,” anomanta, o foo laala la bil.

⁴⁰ O kpɔ o daŋɡbala kpoŋe, dɛ tɔɔ bwea a bwara aa loɡa anue le fɛlembɔjen bɛl bini, dɛ kpɔa do o pur bini, dɛ kpoŋe o vamtor, asɛ dɛ suuh dɛɛ tel Filisti te la.

⁴¹ Dɛ Goliat ne o bonɔɔ waa tɔ o sie dɛ kpoŋe kon waa kpɔa dɛɛ tɔ o te ɡbemɡbe la, ɡe pa mun valɛ dɛɛ ba Devid be.

⁴² Waa na Devid la, o nyiŋu vah, dɛ na kɛ o jeɡa o siwi ta dɛ do wer bonɔɔ.

⁴³ O bɔɔ Devid ŋɔ, “Nyoatee men he kpoŋe daa dɛɛ ba n be naa?” Asɛ o ŋwɛɛ voɡa ta Devid nɛɛ dɛ taahno.

⁴⁴ “Ba bonɔ, mɛɛ kpoe ásɛ jumbii ne kpɔɡ bini ola di he ola!”

⁴⁵ Anee Devid ŋɔ Goliat be ŋɔ, “Kere ne lampeaa he kpoŋe dɛɛ ba ba yoo mɛ, kɛ n te Korowii Waa Ɛ Koranar Bwa Kooro wɛɛ teŋɛ Israel laa tena nɛɛ he nyiŋu dɛɛ vah la sɔn nee mɛɛ ba dɛ́ ba yoi.

⁴⁶ Fini tɔpere nɔ, Korowii ɛɛ kpɔe do n nɔn taa, ásɛ n kpoe dɛ́ teŋe he nyu. Ásɛ jumbii ne kpɔɡ bini ola ba di he ne Filisti laa tena bwa ola, ásɛ harɛre nɛra bwa jemɛ kɛŋɔ Korowii Israel tena aa dɛ tomɔ la lole.

⁴⁷ Nɛra baa cheme bonɔ bwa ɛɛ jemɔɔ kɛŋɔ kere kɛɛ lampea ne laa Korowii ɛɛ lɛ nɛn, yoi la ɛ Korowii kon, wɛɛ kpɔ he bwaa do ya nɔn ta.”

⁴⁸ Goliat aa suuhna dɛɛ tel dɛ́ ba yoo la, Devid chwao ka puu bela baa dɛ ba yoi la warane.

⁴⁹ Devid do nɔn pur bini dɛ kpɔ bwe do vamtor la ta, dɛ kile o ka forɛ Goliat tile. Bwe la joɔ kaa bini, asɛ o chole kpɔ sie pi harɛ.

⁵⁰ Gɛɛ a do, Devid kpo Goliat vamtor bwe ne, dɛ kere ne laa.

⁵¹ Ate, Devid chwa kaa Goliat be, dɛ ka laa o kere pamɛ le o tɔɔ ta, dɛ teŋe o nyu. Filisti laa tena aa naa kɛŋɔ ba banyoo sewɔ la, ba berɔ, dɛ chwa kaa.

⁵² Name, Israel ne Juda tena laa tena moo teŋɛ Filisti tena nɛ ka tel Gat ne Ekron doonyoo. Filisti tena la sewɔ chɔ perɛ le bwɛjen Saaraim ŋwɛnɛ ta dɛ kaa Gat ne Ekron.

⁵³ Israel tena la aa ti Filisti tena la dɛ berɛ ba la, ba la bela baa baŋre ba tɛnte deene dɛ so la, dɛ ka pa ba laala.

⁵⁴ Devid kpɔ Goliat nyu ba Jerusalam, dɛ kpɔ o dɔmkwaa la ba bil o tɛnte dea bini.

⁵⁵ Gɛ saŋ Kooro Sɔɔl aa nyiŋi Devid o le dɛɛ la ka yo Goliat la, o bɔɔ Abna waa ɛ laa sitɔɔ la ŋɔ, “Ume bie bonɔɔ nɔɔ?” Ate, Abna chaŋe ŋɔ, “N dɔɔ, maa o wobɛlbwa jemɛ.”

⁵⁶ Asɛ Kooro la ŋɔ, “Ka bɔɔ dɛ́ jemɛ naate o bie aa ɛo.”

⁵⁷ Devid aa kpo Goliat dɛ den baa jo la, Abna lawɔ dɛ ba o ne Kooro Sɔɔl sie dɛ o ta kpoŋe o nyu la.

⁵⁸ Kooro Sɔɔl bɔɔro ŋɔ, “Bonɔɔ, ume bie hen nɔ?” Anee Devid chaŋe ŋɔ, “N dɔɔ, he bonɔɔ Jese waa le Bɛtlɛham la biee men.”