1 Samoɛl 16 - mzwDBL

Samoɛl fuɡe noo do Devid nyu ta o ɛ kooro

¹ Awola bɛl, Korowii ŋɔ Samoɛl be ŋɔ, “Saŋ besoo hɛɛ nyin he wi Sɔɔl ka tel, dɛ́ le vɛɛh maa vɛoh kɛ Israel kooro nɔɔ? Do noo pebal nyeɡle ta, ásɛ dɛ chiɡ ŋwɛnɛ ta ń tomɛ Jese be Bɛtlɛham. N le o bibaala la bini bɛl dɛ cheɡo kooro tɛ Israel tena.”

² Anee Samoɛl ŋɔ, “Dɛ n laŋɔ Kooro Sɔɔl noɔ kɛ n ba bela aa, wɛɛ kpo mɛɛ.” Anee Korowii ŋɔ, “Lawɛ nalor ásɛ he laŋaa, he ŋɔ he dɛ ba ba kpo ɛ saraha tɛ men Korowii.”

³ Yerɛ Jese ó ba saraha la bɔr. Mɛɛ baɡle ɡɛ haa ɛ. Bɛl la háa fuɡe noo do o nyu ta la, dɛ onee n le kooro.

⁴ Samoɛl ɛ ɡɛ Korowii aa baɡlo la bwa. Waa tel bwɛjen Bɛtlɛham la, bwɛɛ la nomonome ɔmɔ, dɛ kpɔ bochechela ka chemo dɛɛ bɔɔro ŋɔ, “Deŋnesɔɔhna nee he ba tenaa?”

⁵ Anee Samoɛl chaŋe ŋɔ, “Ɔɔh, deŋnesɔɔhna taa. N balɔ dɛ́ ba kpo kon ɛ saraha tɛ Korowii. Hé sɔ he doŋa bwa ta Korowii be pera, dɛ́ ba ja n nɛɛ saraha la mun.” Ate, o sɔ Jese ne o bibaala doŋa bwa ta dɛ ta nɔn yer ba saraha la mun.

⁶ Baa tel bela la, Samoɛl na Eliab dɛ lii ŋɔ, “N jemɔ kɛrɛdɛ kɛŋɔ nɛn Korowii aa fuɡe noo do o nyu ta laanee cheɡɛ o sie bela nɔ.”

⁷ Kɛ Korowii ŋɔ Samoɛl be ŋɔ, “Bɛ o jaŋne ne o wer nyiŋi, o laa mɛɛ nyin, n vɛoh. Kwaa nɛwɛnyini aa dɛ nyiŋi la korɛ anɔ la Korowii aa dɛ nyiŋi ta. Nɛwɛnyini dɛ nyiŋi siebɔr, kɛ Korowii te, nɛn bambile binii wɛɛ nyiŋi.”

⁸ Ate, Jese yerɛ Abinadab dɛ ɡel o valɛ kpɔ Samoɛl sie ba kaa. Asɛ Samoɛl ŋɔ, “Korowii ta onɔ ɡe leɛ.”

⁹ Jese berɔ ɡel Samaa ɡe valɛ Samoɛl sie ba kaa. Anee Samoɛl ŋɔ, “Korowii ta onɔ ɡe leɛ.”

¹⁰ Jese ɡelɔ o bibaala banuanɛ bwa kpɔ Samoɛl sie ba kaa. Anee Samoɛl ŋɔ o be ŋɔ, “Korowii ta ba bini bɛlbwa leɛ.”

¹¹ Samoɛl bɔɔ Jese ŋɔ, “He bibaala haa dɔa bwaa nɔ naa?” Anee o chaŋo ŋɔ, “Ba bini bechala ta lole, kɛ o dɛ teɡɛ peera.” Anee Samoɛl ŋɔ, “Tomɛ bá ka yerɔ ba. O ta balaa, ya ta saraha la ɛɛ.”

¹² Anomanta, o ɡelɔ ba ka yerɔ ba. O mao dɛ do wer bonɔɔ, o siwinyiŋi ɡe do wer kɛrɛdɛ. Anee Korowii ŋɔ, “Ir dɛ́ fuɡe noo do o nyu ta, onee ɛ nɛn maa leo.”

¹³ Samoɛl kpɔ pebal nyeɡle noo aa lɔ o bini la fuɡe do Devid nyu ta ba siwi ta. Dɛ onee Korowii le. Le awola dɛɛ kaa la, Korowii Doma baa so o nɛɛ kpeɡri nɛ, asɛ Samoɛl berɛ kaa Rama.

Devid lɔ Kooro Sɔɔl dem dɛɛ tomɔ

¹⁴ Dɛ Korowii Doma la le Kooro Sɔɔl nɛ, asɛ o ɡel kwaa ir o nɛɛ dɛ ɡel o bwara ɛɛ nyɛɡ.

¹⁵ Kooro Sɔɔl bonɔɔna la ŋɔ o be ŋɔ, “Na ɡɛ kwaa aa ir he nɛɛ dɛɛ doe bonyɛɡa ta ɡɛ.

¹⁶ Ya naa kooro, tomɛ bonɔɔna bá ka nyin nɛn waa jemɛ janjela lɔe. O baa lɔ, ásɛ dɛ kwaa ir he nɛɛ aa, he bwara ɛɛ sɔɔhnee.”

¹⁷ Anomanta, Kooro Sɔɔl tomɛ o bonɔɔna la ŋɔ, “Hé la ka nyin nɛn waa jemɛ janjela lɔe kɛrɛdɛ ba tɛ mɛ.”

¹⁸ Belaa bonɔɔna la bɛl chaŋe ŋɔ, “N na Jese bibaa bɛl, o lɔ Bɛtlɛham dɛ jemɛ janjela lɔe. O ɛ banyoo, o bambile ɡe do kpeɡri, o jemɛ wobol dɛ do wer bonɔɔ ɡe. Asɛ Korowii ja o nɛ.”

¹⁹ Kooro Sɔɔl tomɛ nɛra Jese be ŋɔ, “N dɛ soŋe, ɡel he bibaa Devid waa dɛ teɡɛ peera la ba n be.”

²⁰ Anomanta, Jese kpɔ keeɡo, dɛ kpɔ paanoo ne oltɔn pur sen aa suu, ne bombie ja ŋɔ Devid kpɔ ka tɛ Kooro Sɔɔl.

²¹ Devid la Kooro Sɔɔl be dɛ kaa tomɔ. Dɛ Kooro Sɔɔl sie dɛ lɛ o nɛɛ kɛrɛdɛ, dɛ ɡel wɛɛ che o dɔmkwa.

²² Ate, Kooro Sɔɔl ɡel ba ka ŋɔ Jese be ŋɔ, “Gel Devid so n be dɛɛ tom mɛ, n sie dɛ lɛ o nɛ.”

²³ Le bela dɛɛ kaa la, saŋ bɛlbwa kwa aa ba ir Sɔɔl nɛɛ la, ɡɛɛ Devid yon kpɔ o janjela lɔ, asɛ a le o nɛɛ o bwara sɔɔhno.