1 Samoɛl 14 - mzwDBL

¹ Awola bɛl, Jonatan waa ɛ Kooro Sɔɔl bibaa la ŋɔ o bechala waa dɛ che o dɔmkwaa be ŋɔ, “Ba yá kaa baŋ le bela Filisti tena aa soɡa la.” Kɛ o ta o mɛɛ te be bolɛ.

² Dɛ Kooro Sɔɔl baŋre o tɛnte dea daa bɛl o nɔna aa do ɡuleɡule baa yerɔ pɔmeɡranet mun, bobɛl baa dɛ yerɔ Meɡrɔn, o ne Gebea aa jaŋɛ. Dɛ laa tena dɛ ɛ lafraanumɛl ja o nɛ,

³ dɛ sɔfo Ahija do sɔfo batakaarebora efɔd dɛ ja ba nɛ. Baa bɛl waa ɛ Ikabod dɔɔ Ahitub biee on, Ahitub ɡe mɛɛ Fenehas. Ahitub nabaalee Sɔfo Eli, dɛ o lɔ Korowii sie dɛɛ tomɔ Silo. Dɛ nomɛlbwa aa jemɛ kɛŋɔ Jonatan le ba bini kaa.

⁴ Dɛ ŋwɛnɛ bɛl chɔɔ kaa Mikmas, asɛ Jonatan ɛɛ nyin kɛ ó kpɔ o ta kaa bela Filisti tena aa baŋre ba tɛnte deene dɛ so la. Dɛ bwea ane aa kana cheɡɛ ŋwɛnɛ la baŋ bɛlbwa ta. Bɛl sɔne Bɔsɛs asɛ nɛɛte la ɡe sɔne Sene.

⁵ Bwe la beŋkpoŋ cheɡɛ ŋwɛnɛ la weekaŋle nyunduabɔr o sie chaɡɛ Mikmas, asɛ nɛɛte la ɡe che weekaŋle harɛbɔr, o sie chaɡɛ Geba.

⁶ Jonatan ŋɔ o bonɔɔ waa cheɡɛ o dɔmkwa la be ŋɔ, “Ba yá ɡale kaa Filisti tena baa wola Korowii tomɛ nɔ be. Korowii ken ɛɛ cha yaa. Komɛlbwa aa won tɔ Korowii ŋwɛnɛ yaa wola won pɔ ba nɛ, ya warɔ kɛɛ ya ta warɛ kwara noo.”

⁷ O bonɔɔ la ŋɔ, “Ɛ ɡɛ bwa haa dɛ nyin he ɛ, n cheɡɛ he habɔɔ kiŋkiŋ ken.”

⁸ Anee Jonatan ŋɔ, “Ba yá ɡale ka kpɔ Filisti tena la sie ásɛ ba na yaa.

⁹ Dɛ ba ŋɔ ya be ŋɔ, ‘Hé che bela ya ba pu heya aa,’ yaa che ya buɡ ta belaa.

¹⁰ Kɛ dɛ ba ŋɔ, ‘Hé ba ya be bonɔ naa,’ yaa teehnoo kaa ba be, anee dɛ́ chaɡle kɛŋɔ Korowii kpɔ ba do ya nɔn ta.”

¹¹ Anomanta, Jonatan ne o bonɔɔ la ɡelɔ Filisti tena la na ba. Asɛ Filisti tena la ŋɔ, “Hé na, Hibru tena la bane huuhno le bɔɔne baa chwaa ka sɔh a bini la bini dɛɛ ba.”

¹² Ate, Filisti tena baa lɔ bela la nyɛɡ Jonatan ne o bonɔɔ la nɛɛ ŋɔ, “Hé ba ya be nyundua bonɔ, ásɛ ya baɡle heyaa waane.” Anee Jonatan ŋɔ o bonɔɔ la be ŋɔ, “Teŋɛ n nɛ dɛɛ ba, Korowii kpɔ ba do Israel tena nɔn ta.”

¹³ Jonatan kpɔ nakpale ne nɔɔra huuh dɛɛ kaa, asɛ o bonɔɔ la ɡe teŋɛ. Jonatan kaa yo Filisti tena la dɛ pɔ ba nɛ ba choɡli chɔ, asɛ o bonɔɔ la ɡe teŋɛ dɛɛ kpoo ba.

¹⁴ Laa la mumpar la, Jonatan ne o bonɔɔ la kpoo nɛra fifraanɛ, harɛ baa kpoo ba o ta la, wɛɛ ɛ dɛ ɛ kato delee.

Israel tena lɔɔ ka tɔ Filisti tena nɛ

¹⁵ Belaa ɔmee kohona chole laa tena la bwa nɛɛ baa chel, banɔ la baa lɔ bela baa baŋre ba tɛnte deene ne banɔ la baa lɔ kpɔɡ bini, dɛ nɛra baa laŋa dɛɛ la ka yo bwa. Korowii ɡelɔ harɛ jiɡri ɔmee kohona chole ba nɛ.

¹⁶ Kooro Sɔɔl laa tena baa dɛ daahno dɛ do Bɛnjamen harɛ ta Gebea la na Filisti tena kɛŋɔ baa wila, dɛ chwa sibeɡra ne bobɛlbwa dɛɛ kaa.

¹⁷ Anee o ŋɔ laa tena o ne baa lɔ bela la be ŋɔ, “Hé bwa ba boa nyoa dɛ́ na he bini banɔ la baa wola toole. Baa chema la, dɛ Jonatan ne o bonɔɔ waa dɛ che o dɔmkwaa laanee wola toole ba bini.”

¹⁸ Kooro Sɔɔl ŋɔ sɔfo Ahija be ŋɔ, “Ka kpɔ Korowii Ne Nɛwɛnyina Fɔo Daka la ba.” Gɛ saŋ dɛ Israel tena bee o do.

¹⁹ O taa dɛ bol waa sɔfo la be la, dɛ name te kwaraa a ɡɛ bambiteŋa la ɡwaa Filisti tena la nɛ bela baa soɡa la. Anomanta, Kooro Sɔɔl ŋɔ o be ŋɔ, “Gel wobɛlbwa ɛɛ.”

²⁰ Ate, Kooro Sɔɔl ne o laa tena la bwa cheme, dɛ kaa laa la ta. Ba kaa pu Filisti tena la kɛŋɔ ba wilo kohona, dɛ berɛ sie ta dɔŋa nɛɛ dɛɛ kpoo.

²¹ Hibru tena bane ba fa aa la Filisti tena be ba ne ba kaa ba soŋnibɔr la, berɔ kaa Israel tena baa ja Kooro Sɔɔl ne Jonatan nɛɛ la be.

²² Israel tena baa sɔh Efrem deŋɡarere ta aa noa kɛŋɔ Filisti tena la dɛ chwa la, ba kaa ja ba bala Israel tena la nɛɛ laa la ta, dɛ chwa ti ba dɛɛ yoo ba.

²³ Gɛɛ a do Korowii lɛ Israel tena awola, asɛ ba ka yo dɛ ɡale Bɛt Avɛn.

Waa aa chiɡa laa la habɔɔ

²⁴ Lɔr kpo Israel tena ba ɡwɛɡre awola, dɛkalkɛ dɛ Kooro Sɔɔl ŋwɛɛrɔ kɛŋɔ ba bini bɛlbwa waa di kondikwaa mɔɔ wee le la, nyotaahna lawɛ naate mɔɔ ó tɔ o dɔma wel. Anomanta, o laa tena la bɛlbwa ta kondikwaa dii.

²⁵ Ba bwa kaa jo kɔr bɛl bini, dɛ tooh lɔ daa ta bobɛlbwa tohnoo kor dɛɛ lee.

²⁶ Baa tel bela tohnoo la aa kora dɛɛ lee la, bɛlbwa ta ane kpɔe do nyoa, dɛkalkɛ ba ɔmɛ Kooro Sɔɔl nyotaahna la.

²⁷ Kɛ dɛ Jonatan te ta noɛ kɛ o mɛɛ ŋwɛɛrɔ ŋɔ bɛlbwa bɛ ɡel kondikwaa leɡe o nyoa. O tɛr daŋɡbala do tohvaahna la ta dɛ di ane, buɡ la ta, o sie deŋu o dɔ bokpeɡa.

²⁸ Belaa laa tena la bɛl ŋɔ o be ŋɔ, “He mɛɛ ŋwɛɛrɔ dawɛ ya nɛɛ kɛŋɔ bɛlbwa di kwaa fini naa, nyotaahna lawɔ. A waa lɔr ɛɛ kpo yaa ya bwa ɡwɛɡre la.”

²⁹ Anee Jonatan ŋɔ, “N mɛɛ kpɔ waa aa wola were ba ta ya harɛ nɔ nɛra nɛ. Na ɡɛ n bwara bini aa chaah mɛ, tooh tama maa dia nɔ nomanta.

³⁰ Dɛ laa tena nɔ fe dɔ kondikwa baa paa laa ta le ba dɔma be nɔ ane di aa, ba bwara fe kpeɡri. Filisti tena baa kpoora fe ta ken ɡwaalaa?”

³¹ Awola tɔpere la, Israel tena kpoo Filisti tena le Mikmas ka tel bwɛjen Aejalɔn, dɛ ba bwa koɔh, lɔr ɡe kpo ba ba ɡwɛɡre.

³² Buɡ la ta, ba den ka su kwaa baa paa laa ta le ba dɔma be la ta dɛɛ kama, peera ne nae ne a bii, ba kpoora dɛ chɛwa buɡ la ta bela, dɛ chwea ane chal ɡɛ.

³³ Anee nomɛl ka ŋɔ Kooro Sɔɔl be ŋɔ, “Na, laa tena la dɛ chwe ol lwɛɛ ne chal, dɛ jo Korowii nɛ.” Ate, Kooro Sɔɔl ŋɔ, “Hé ɛ nɛnchɔɡa kohona. Hé ɡbili bwejen ba tɛ mɛ bonɔ warane.”

³⁴ Asɛ o ŋɔ, “Hé jo ba bini dɛ́ ŋɔ ba be ŋɔ, ‘Bɛlbwa lawɛ o nao ne pee dɛ́ ba kpoa bwe nɔ ta. He bɛ ol ne o chal di dɛ́ ba ɛ wechɔɡa jo Korowii nɛ.’ ” Anomanta, jwaana la ne, bɛlbwa ba o kon ne dɛ ba kpo bela.

³⁵ Kooro Sɔɔl ma kon baa ɛ saraha o ta tɛ Korowii bela. Onee ɛ saraha kon waa tɔ sie ma tɛ Korowii.

³⁶ Anee Kooro Sɔɔl ŋɔ, “Hé ɡel ya ti Filisti tena la jwaana nɔ ne, dɛ́ ka tel bɔr chaahna saŋ, dɛ́ ka yoo ba dɛ́ pa ba laala. Ya kpoo ba bwa, dɛ bɛ ba bini beŋkpoŋ kwaraa ɡel.” Anee ba chaŋo ŋɔ, “Ɛ ɡɛ bɛlbwa aa too he tea.” Kɛ sɔfo Ahija ɡe ŋɔ, “Hé ɡel ya bɔɔ le Korowii be ó baɡle ɡɛ yaa ɛ mɔɔ.”

³⁷ Anomanta, Kooro Sɔɔl bɔɔ Korowii ŋɔ, “Mɛɛ won la ka yo Filisti tena la kɛɛ? Yaa won pɔ ba nɛ aa?” Kɛ Korowii ta on chaŋɛ awola tɔpere.

³⁸ Kooro Sɔɔl yerɛ nomonome baa chɔ laa tena nyoa la bwa dɛ ŋɔ, “Hé ba ya cheme dɛ́ na wechɔɡa yaa ɛa fini.

³⁹ N ŋwɛɛ Korowii waa ɛ Israel tena Lɛɛ la kɛŋɔ, hale dɛ n bibaa Jonatan ɛ wechɔɡa ane kwaraa naa, a chɛ kɛ ó sewɛ.” Kɛ ba bini bɛlbwa ta waane bolɛ.

⁴⁰ Anee Kooro Sɔɔl ŋɔ Israel tena la bwa be ŋɔ, “He bwa ka che le, ásɛ n ne n bibaa Jonatan ɡe che bonɔ.” Asɛ ba bwa ŋɔ, “Ɛ ɡɛ bwa aa too he tea.”

⁴¹ Kooro Sɔɔl soŋe Korowii Israel tena aa dɛ tomɔ la ŋɔ, “N Naa Korowii, ɡel n jemɛ waa nɔ kasinteŋ.” Asɛ ba bil daa a lawɛ o ne o bibaa Jonatan, asɛ nɛra la kar te, bie la ta ba tɔɔ.

⁴² Anee Kooro Sɔɔl ŋɔ sɔfo Ahija be ŋɔ, “Berɛ bil daa n ne n bibaa Jonatan nyu ta ja, dɛ́ na naate waa ɛ wechɔɡa la.” Asɛ a lawɛ Jonatan.

⁴³ Ate, Kooro Sɔɔl bɔɔ Jonatan ŋɔ, “Baɡ mɛ waa haa ɛa.” Asɛ o ŋɔ, “N daŋɡbala nyoa n kpɔ li tooh tama di, dɛɛ ba sewa taraken la.”

⁴⁴ Anee Kooro Sɔɔl ŋɔ, “Dɛ hen Jonatan ta sewaa, Korowii bɛ men ɡel.”

⁴⁵ Kɛ nɛra la ŋɔ o be ŋɔ, “Jonatan aa cheɡɛ o nɛɛ Israel tena bwa dɔ lɛɛ nɔ chɛ kɛŋɔ ó sewaa? Akai, ya ŋwɛɛ Korowii waa lole saŋ bɛlbwa kɛŋɔ, nomɛlbwa aa won ɛo wobɛlbwa, dɛkalkɛ Korowiirii chao o won ɛ waa waa ɛa fini nɔ.” Gɛɛ a do nɛra la lɛ Jonatan ba ta on kpoe.

⁴⁶ Belaa Kooro Sɔɔl ɡel Filisti tena la tii, ba bwa berɛ kaa ba harɛ ta.

⁴⁷ Kooro Sɔɔl aa baa di kora dɛɛ nyiŋi Israel tena nɛɛ la, o yo dɔma baa baro cheme la bwa. Moab ne Amɔn tena ne Edom ne Soba koranar, dɛ Filisti tena. Bobɛlbwa waa ka yo la, o dɛ pɔ ba nɛ.

⁴⁸ O yoo bambile bwa ne, dɛ pɔ Amalɛk tena nɛ, dɛ lɛ Israel tena, nomɛlbwa ta wone ba yoo ba kpa.

Kooro Sɔɔl haah ne o bii

⁴⁹ Kooro Sɔɔl bibaala waa lol ba laanee Jonatan ne Isvi dɛ Malki Sua. O bihanomoa sɔne Merab asɛ bechala la ɡe Mikal.

⁵⁰ Dɛ o haah sɔne Ahinoam, o nya ɛ Ahimas. Kooro Sɔɔl laa nomoa sɔne Abna, o mɛɛ sɔne Nɛr, asɛ Nɛr ɛ Sɔɔl naara.

⁵¹ Abiel bibaalaa Sɔɔl mɛɛ Kes ne Abna mɛɛ Nɛr.

⁵² Kooro Sɔɔl soɡa bini bwa, o ne Filisti tena yo laa taeh. Anomanta, o na banyoo bɛlbwa naa, ɡɛɛ o lawɔ ba ja o laa tena nɛ.