1 Samoɛl 13 - mzwDBL

Filisti tena ka yoi

¹ Sɔɔl bonɔɔne saŋee o di kora Israel harɛ ta. Bene anɛɛ o di kora.

² Kooro Sɔɔl le baala kaɡboŋa batoro le Israel harɛ, ba bini kaɡboŋa banɛ do o be Mikmas ne Bɛtel waa chɔ deŋɡarere doa, asɛ kaɡboŋ ɡe do Jonatan be Gebea waa lɔ Bɛnjamen dea harɛ ta. Dɛ ɡel ba kabora kaa ba deremi.

³ Jonatan kaa kpo Filisti tena laa nomoa bwɛɛ baa dɛ yerɔ Geba la ta, asɛ Filisti tena la bwa no. Kooro Sɔɔl ɡelɔ ba hoh bɛla harɛ la bwa ta ŋɔ, “Hibru tena, hé ir dɛ́ kpɔ he te yá kaa laa.”

⁴ Anomanta, Israel tena la bwa aa noa kɛŋɔ Sɔɔl kpo Filisti tena laa nomoa bela o ne o laa tena aa soɡa la, Filisti tena hah Israel tena kohona. Israel laa tena la bwa baa cheme, dɛ ka ja Sɔɔl nɛɛ Gelɡal.

⁵ Filisti tena la chemo kɛ bá ka yo Israel tena. Ba dɔ kwaa aa do kɛ torɔɡo baa vɔwa pɛl jaɡre kaɡboŋa atoro, asɛ laa tena kaɡboŋa banumɛl so jaɡre ta, dɛ laa tena baa wara kohona kɛŋɔ mpo nyoa hɛŋle ken. Ba kaa cheme Mikmas, waa lɔ bwɛɛ Bɛt Avɛn wee leebɔr.

⁶ Israel laa tena la aa naa kɛŋɔ a kpeɡri tɛɛ ba name la, ba chwao ka sɔh bwebɔɔne ne sɔɔhne bini, ne bwea ne bɔɔne dɛ kɔlɔŋa bini dɛ́ lɛ ba nyuune.

⁷ Ba bini banɔ la baa kaa ɡe ɡale Jɔɔdan Moo, dɛ kaa Gad ne Gelead harɛre ta. Kooro Sɔɔl te ka Gelɡal, asɛ ɔmee chole laa tena baa ja o nɛɛ la nɛɛ kohona baa chel.

⁸ Kooro Sɔɔl soɡe bela ka tel tɔpera anuanɛ ɡɛ Samoɛl aa doo la. Kɛ Samoɛl ta wone ba o be Gelɡal ɡɛ waa doo la, asɛ Sɔɔl nɛra la pa mun dɛɛ peɡre.

⁹ Kooro Sɔɔl ŋɔ ba be ŋɔ, “Hé kpɔ saraha kwaa baa fuah ne deŋnesɔɔhna saraha kwaa ba.” Asɛ Kooro Sɔɔl kpɔ fuh ɛ saraha.

¹⁰ Waa ɛ saraha la dɛɛ tonɛ la, buɡ la ta, Samoɛl ɡe den tel bela. Asɛ Kooro Sɔɔl le dɛ ba chemo.

¹¹ Samoɛl bɔɔro ŋɔ, “Bɔkwa waa he ɛ nɔɔ?” Kooro Sɔɔl chaŋo ŋɔ, “Saŋ haa doa la aa baa kaa haa wola balɛ mɔɔ, asɛ nɛra la ɛɛ peɡre, asɛ Filisti tena ɡe baa cheme Mikmas la,

¹² n liiro kɛ Filisti tena ɛɛ ba yoo mɛɛ Gelɡal, maa wola chae soŋɛ le Korowii be wa. Anomanta, n nao kɛ a chɛ kɛ ń fuh saraha kwaa tɛ Korowii.”

¹³ Samoɛl ŋɔ o be ŋɔ, “He ɛ ɡɛnewa. He ta Korowii haa dɛ tomɔ doe waa doe la kpɔe ɛ toma ɡɛ aa chɛa. He fe teŋɛ ɡɛ waa doe la ta naa, o fe ɛɛ ɡeloo he ne he naanar di kora Israel harɛ saŋ bɛlbwa dɛɛ la.

¹⁴ Taraken he kora aa lee do kpa. Korowii ɛɛ le nɛnfale o bambile aa lawaa, ásɛ o tɔ o nɛra sie. Dɛkalkɛ he ta o waa ta teŋɛ.”

¹⁵ Samoɛl le Gelɡal dɛ kaa Gebea waa lɔ Bɛnjamen harɛ ta, asɛ Kooro Sɔɔl kure baala baa ja o nɛɛ la. Baa ɛ nɛra lafraanumɛlee.

¹⁶ Kooro Sɔɔl ne o bibaa Jonatan ne baala baa ja ba nɛɛ la soɡe Gebea waa lɔ Bɛnjamen harɛ ta, asɛ Filisti tena la ɡe ka baŋre ba tɛnte deene dɛ so Mikmas.

¹⁷ Filisti laa tena le bela baa soɡa, ba bɔne ba bini kuore atoro ba ka yo dɛ pa laala dɛɛ ba. Beŋkpoŋ kpɔ sie pa weekaŋle nyunduabɔr bwɛjen Ofra waa lɔ Sual harɛ ta,

¹⁸ Bɛl ɡe kpɔ sie pa wee cholibɔr Bɛt Hɔrɔn pera. Banɔ la baa kaa la ɡe kpɔ sie chaɡɛ wee leebɔr pua hɛŋle ɡbo harɛ jwɛh ta, asɛ Seboim Fɛlembɔjen la sie chaɡɛ bela.

¹⁹ Dɛ loɡre bɛlbwa toole Israel harɛ ta, dɛkalkɛ Filisti tena la ta sɛɛh kɛŋɔ Hibru tena la loɡɛ buni kon bɛlbwa. Gɛ laa aa, baa loɡɛ lampeare ne kerii.

²⁰ Anomanta, dɛ Filisti tena harɛ taa Israel tena la kaa sar ba para ne kpanfɛre ne ɡoori dɛ buni kon te bɛlbwa.

²¹ Ba sar Israel tena la kwaa tɛɛ ba aa, ɡɛɛ ba lɛɛ ba yokpeɡ. Suuɡabwe jeɡaa ba lɛ dɛɛ sar kpanfɛre ne buni baa kpɔ lɔ nao o do sie parɛ, ne para nae aa dɛ parɛ ane ne para te bwa soo siwi la, suuɡabwea anɛɛ baa lɛ.

²² Anomanta, dɛ laa baa chole aa, Israel te bɛlbwa aa kere kɛɛ lampea kpoŋe ka ja Kooro Sɔɔl ne o bibaa Jonatan nɛ.

²³ Filisti tena le laa tena la bini bane, ba ka che ŋwɛnɛ waa chɔa kaa Mikmas dɛɛ daah bela.