1 Samoɛl 12 - mzwDBL

Samoɛl wobol aa ka mun

¹ Samoɛl ŋɔ Israel tena la bwa be ŋɔ, “N no waa haa bɔɔra la, dɛ nyin kooro tɛ heya o tɔ he sie dɛɛ nyiŋi he nɛ.

² Taraken he dɔ kooro o ɛ he sitɔɔ. N hwɛɛhrɔ n nyumpona to, asɛ n bibaala do he bini bonɔ. N bonɔɔne saŋ bwaa n le dɛ tɔ he sie dɛ ba le fini.

³ N cheɡɛ bonɔ fini, dɛ n ɛ nomɛl wechɔɡe bɛl aa, bɛlbwa bol Korowii ne nɛn waa leo cheɡ o ɛ kooro nɔ sie. N lɛ nomɛl keeɡo kɛɛ nao o be naa? N faah nomɛl kɛɛ dɛ fiiɡi nomɛl aa? Umee n ɡel o yaɡ mɛ sen ɔ? Dɛ n ɛ anɔ bini bɛlbwa naa, mɛɛ bɔ naate a kemee.”

⁴ Ba ɡe chaŋe ŋɔ, “He ta yaa faahrɛ kɛɛ dɛ fiiɡi bɛlbwa, he ta komɛlbwa ɡe lɛɛ le nomɛlbwa be.”

⁵ Anee Samoɛl ŋɔ, “Korowii ne kooro waa leo laanee ɛ he danseɛ fini kɛŋɔ he ta wechɔɡe bɛlbwa n nɛɛ nae.” Asɛ ba chaŋe ŋɔ, “Ɔɔh, Korowiirii ya danseɛ.”

⁶ Ate, Samoɛl berɛ ŋɔ ba be ŋɔ, “Korowiirii le Mosis ne Arɔn ba ka lawɛ he naawa le Ijipt harɛ ta.

⁷ Name, hé che bonɔ, ásɛ n ɡel Korowii bol he be hé jemɛ nyokpowe-ɛɛla waa ɛa dɛ́ lɛ he ne he naawa la.

⁸ Jekɔb ne o bii aa kaa jo Ijipt harɛ ta asɛ baa fiɡ ba la, he naawa wio no Korowii ŋɔ ó cha ba. Asɛ o tomɛ Mosis ne Arɔn ba ba lawɛ he naawa le Ijipt harɛ ta, dɛ kpɔ ba ba so bonɔ.

⁹ Kɛ ba soh Korowii baa dɛ tomɔ la wa, anomanta, o ɡelɔ Filisti tena ne Moab kooro dɛ Sisera waa ɛ laa sitɔɔ dɛ do bwɛjen Hasɔ ba yo he naawa dɛ pɔ ba nɛ.

¹⁰ Ba wio yerɛ Korowii ŋɔ, ‘Korowii, ya ɛɛ wechɔɡa dɛ vɛh he toma dɛ kaa tomɛ voɡa Baalre aa ɛ baala ne voɡhaahna Astɔrɛt. Name te lɛ yaa le ya dɔma nɔn ta ásɛ yaa tomɛ.’

¹¹ Korowii tomɛ Gedeɔn ne Barak ne Jɛfta dɛ men Samoɛl asɛ ya ba lɛ heyaa le he dɔma nɔn ta, he so deŋnesɔɔhna ta.

¹² Háa na Amɔn Kooro Nahas wɛɛ ba dɛ́ ba yo heyaa la, he le Korowii waa ɛ he kooro la habɔɔ, dɛ ŋɔ n be ŋɔ, ‘Ya dɛ nyin kooro wɛ́ɛ nyiŋi ya nɛ.’

¹³ Taraken, kooro haa ŋɔa he dɛ nyinu laanee la, Korowiirii leo tɛ heya.

¹⁴ Dɛ he dɛ ɔmɛ Korowii dɛɛ tomɔ dɛɛ teŋɛ o Mmarare ta, hale he ne he kooro bwa naa, he wobɛlbwa ɛɛ do werii tɛ heya.

¹⁵ Kɛ dɛ haa duure kpɔe dɛɛ tɛo, dɛ vɛh o Mmarare ta teŋa aa, o baah ɛɛ di he ne he kooro nɛɛ ɡɛ o baah fa aa di he naawa nɛɛ la.

¹⁶ Anomanta, hé che bela haa cheɡa, dɛ́ na wejena Korowii aa dɛ́ ba ɛɛ he siwi ta.

¹⁷ Lɔmɔɡa saŋ laa nɔ naa? Mɛɛ soŋe Korowiirii ó ɡel bwaala nɛ dɛ kɔr. Anee hɛɛ ba nae kɛŋɔ kooro haa soŋa la ɛ wechɔɡa Korowii be.”

¹⁸ Anee Samoɛl soŋe Korowii awola, asɛ bwaala nɛ dɛ kɔr kohona. Asɛ ɔmee kohona lawɛ nɛra la bwa Korowii ne Samoɛl wa.

¹⁹ Ate, nɛra la bwa ŋɔ Samoɛl be ŋɔ, “Soŋe Korowii haa dɛ tomɔ la, ásɛ yan yaa ɛ he bonɔɔna nɔ bɛ serewe. Ya wechɔɡa la habɔɔ, ya berɔ ɛ wechɔɡa kɛŋɔ yaa ŋɔa ya dɛ nyin kooro la.”

²⁰ Samoɛl ŋɔ, “A lole kɛŋɔ he ɛ wechɔɡa nɔ bwa te, kɛ hɛɛ berɛ ɔma, he bɛ habɔɔ berɛ kpo Korowii, hɛ́ɛ tomɔ bambile bwa ne.

²¹ Hé laa sie kpɔ voɡa ta. Wedɛɛɡa bɛlbwa toole a toma ta. Aa won lɛ heya, a wobɛlbwa ɛ wepuu.

²² Korowii ŋwɛɛrɔ ŋɔ, waa o nɛraa vɛh. O sie lɛo kɛŋɔ ó kpɔ heyaa ɛ o nɛra.

²³ Korowii ɛɛ la ane bojaŋ kɛŋɔ n ɛo wechɔɡa dɛ́ vɛh kɛ mɛɛ soŋo tɛ heya. Mɛɛ baɡle heyaa waa aa wera ne anɔ la aa toɡraa.

²⁴ Hé nyiŋi kɛrɛdɛ dɛ́ɛ teŋɛ Korowii waa ta dɛ́ɛ tomɔ kasinteŋ ne bambile bwa ne, dɛ́ɛ lii wejena waa ɛa tɛ heya la.

²⁵ Kɛ dɛ he ta nao dɛɛ ɛ wechɔɡa aa, he ne he kooro bwa ɛɛ serewoo.”