1 Samoɛl 11 - mzwDBL

Sɔɔl yo Amɔn tena dɛ pɔ ba nɛ

¹ Dɛ ɛ korobie beŋkpoŋ habɔɔ la, Amɔn Kooro Nahas tɔ o laa tena sie ba ka bar bwɛɛ Jabes waa lɔ Gelead harɛ ta dɛ́ yoo ba. Anee Jabes baala bwa ŋɔ Kooro Nahas be ŋɔ, “Gel ya ne he fɔwɛ fɔo, ásɛ ya do he lɔɡa.”

² Anee Kooro Nahas chaŋe ŋɔ, “N ne hɛɛ fɔwɛ fɔwee yaa, webeŋkpoŋ taa aa ba cheɡa. Atane n fome he bini bɛlbwa diɡ siwi, ásɛ a ɛ sihihwa tɛ Israel tena bwa.”

³ Belaa Jabes nomonome ŋɔ o be ŋɔ, “Tɛ yaa tɔpera anuanɛ ásɛ ya tomɛ nɛra Israel harɛ ta bwa, dɛ ya ta nomɛlbwa dɔe ó ba lɛ yaa aa, yáa kpɔ ya tenee do he lɔɡa.”

⁴ Toroma la aa tel Gebea bela Sɔɔl aa soɡa dɛ bol ɡɛ waa nɔ ba be la, ba wio kɛrɛdɛ.

⁵ Buɡ la ta, dɛ Sɔɔl teŋɛ o nae baa kpɔa dɛɛ parɛ le koo ta dɛɛ ba. Waa no wii la, o bɔɔrɔ ŋɔ, “Bɔkwa waa chiɡa ɔ? Ɛrɛɛ bɛlbwa ɛɛ wi ɡɛ nɔɔ?” Asɛ ba bol waa Jabes baala la aa baa bol la ba be.

⁶ Sɔɔl aa no waa nɔ la, Korowii Doma baa so o nɛɛ kpeɡri nɛ, asɛ o baah di kohona.

⁷ O lawɛ nabala anɛ kpo, dɛ chɛwa dɛ kpɔ tomɛ nɛra Israel harɛ ta bwa ŋɔ, “Nomɛlbwa waa wola Samoɛl ne Sɔɔl nɛɛ teŋɛ la, kenii baa ba o nae kpoe dɛ chɛwa.” Korowii ɡelɔ ɔmee kohona chole ba bwa nɛ, asɛ ba pɛ nyoa ba ja Samoɛl ne Sɔɔl nɛ.

⁸ Sɔɔl aa boa ba bwa nyoa bwɛɛ Bɛsɛk la, dɛ Israel baala lɔ nɛra kaɡboŋa lafraatoro, asɛ Juda baala ɡe ɛ nɛra kaɡboŋa fifraatoro.

⁹ Sɔɔl ne o nomonome ŋɔ toroma baa le Jabes la be ŋɔ, “Hé ka ŋɔ he nɛra be kɛŋɔ, ‘Le kere wee ne ŋɔ o che nyufala dɛ he dɔ lɛɛ.’ ” Toroma la aa laŋa dɛ ka bol Jabes tena la be la, ba sie lɛo kohona,

¹⁰ dɛ ŋɔ Amɔn tena la be ŋɔ, “Kere yaa kpɔ ya tenee ba do he lɔɡa, ásɛ he ɛ yaa ɡɛ bwa haa dɛ nyin.”

¹¹ Tɔ aa pera la, Sɔɔl bɔne o laa tena bini kuore atoro, asɛ bɔr aa dɛ chaah la ba ka lɔ tɔ Amɔn tena la nɛ bela baa soɡa, dɛ kpoo ba ka tel webaŋa. Banɔ la baa kaa la ɡe lɔ peɡre, bɛlbwa chwa dɛɛ nyin o nyu.

Sɔɔl lɛɛ dɛ do kɛ kooro

¹² Ate, Israel tena la ŋɔ Samoɛl be ŋɔ, “Nɛn besooree ŋɔa ŋɔ Sɔɔl bɛ ya kooro ɛ laɔ? Le ba ne tɛ yaa ya kpoo ba.”

¹³ Anee Sɔɔl ŋɔ, “Baa nomɛlbwa kpoe ba fini, fini tɔperee Korowii lɛ o nɛra Israel tena.”

¹⁴ Ate, Samoɛl ŋɔ Israel tena la be ŋɔ, “Hé ba ya bwa kaa Gelɡal dɛ́ ka che Sɔɔl mun ta dɛ́ lɛo do kɛ ya kooro kɛrɛdɛ.”

¹⁵ Anomanta, nɛra la bwa la Gelɡal bela, Korowii sie, dɛ ka lɛo do kɛ ba kooro. Ba kpoo kwaa ɛ deŋnesɔɔhna saraha, asɛ Sɔɔl ne Israel tena la bwa di kondikonjena dɛ lɛ ba sie.