1 Samoɛl 10 - mzwDBL

¹ Belaa Samoɛl kpɔ ɔleve noo loŋbir dɛ fuɡe do Sɔɔl nyu ta, dɛ ɡbaaro pɛl bambile dɛ ŋɔ, “Korowii lee he ɛ o nɛra Israel tena sitɔɔ. Hɛɛ nyiŋi ba nɛɛ, dɛ́ lɛɛ ba le ba dɔma baa bar ba cheme nɔn ta. Anee dɛ́ baɡle kɛŋɔ Korowii lee he ɛ o nɛra Israel sitɔɔ.

² He le n be bonɔ fini dɛɛ kaa laa, hɛɛ cheme baala banɛ bane Rakɛl ŋwam taa, o lɔ Sɛlsa ne Bɛnjamen dea harɛ jwɛh ta. Baa ŋɔ he bee ŋɔ, ‘Keeɡore aa nyoɡra hɛɛ ɡaaɡe a bɔr la, ba naa. A waa laa bera hiah he mɛɛ kpa, o dɛ bɔɔ bela waa nae.’

³ He le bela dɛɛ kaa laa, hɛɛ ka tel dajen bɛl waa lɔ bwɛɛ Tabɔ munii. Hɛɛ ka pu baala batoro bane baa dɛ kaa bwɛjen Bɛtel ka ɛ saraha tɛ Korowii. Ba bini bɛl lawɛ bombiire atoro teŋɛ o nɛ, nɛɛte kpoŋe paanoo atoro, asɛ toorote la ɡe kpoŋe sen aa lɔ oltɔn pur bini.

⁴ Baa jaamee, dɛ́ kpɔ paanoo anɛ baa ɡɔɔra nyundua tɛ Korowii tɛɛ, ásɛ he lɛ.

⁵ A habɔɔ, hɛɛ ka tel Korowii deŋɡare waa lɔ Gebea la taa, belaa Filisti tena baŋre ba tɛnte deene dɛ so. Haa dɛɛ jo bwɛɛ la doonyojen bini la, hɛɛ cheme Korowii keamere baa le saraha bɔr deŋɡare la ta dɛ teŋɛ dɔŋa nɛɛ dɛɛ ba, dɛɛ lɔ janjela ne ɡboŋri, dɛɛ hoh kalipere. Baa bol Korowii waa.

⁶ Korowii Doma ɛɛ ba so he nɛɛ kpeɡri nɛɛ, dɛ́ beɡre nɛnfale, ásɛ he ne ba bwa ɛɛ bol Korowii waa aa dɛ́ ba bala kerekere.

⁷ Gɛ waa nɔ bwa ɛo waa, Korowii ɛɛ ba ja he nɛɛ he ɛ waa waa dɛ nyin kɛ he ɛ.

⁸ Berɛ tɔ n sie dɛ kaa bwɛjen Gelɡal. Mɛɛ pui belaa dɛ́ ba fuh kwaa ɛ saraha ne deŋnesɔɔhna saraha. Kɛ so ka tel tɔpera anuanɛ mɔɔ ń ba baɡle waa haa ɛ.”

Ba cheɡ Sɔɔl kora ta

⁹ Sɔɔl aa dɛ le Samoɛl be la, Korowii charɛ Sɔɔl liire asɛ waa Samoɛl aa bola la bwa ɛ ɡɛ.

¹⁰ Baa tel Gebea la, Korowii keamere teŋɛ dɔŋa nɛɛ ba chemo, asɛ Korowii Doma ba so o nɛɛ kpeɡri nɛ, o ka ja ba nɛ baa bol Korowii waa aa dɛ ba bala kerekere.

¹¹ Nɛra ba fa aa jemɛ Sɔɔl, dɛ na kɛ o berɔ ja Korowii keamere nɛɛ o ne baa bol Korowii waa ɡɛ la bɔɔ dɔŋa ŋɔ, “Bɔkwa waa ba Kes bibaa nɔ nɛɔ? O ɡe berɔ ɛ Korowii keame la bɛl kɛɛ?”

¹² Anee baa bɛl waa soɡe bela bɔɔ ŋɔ, “Ba mɛɛnanaree bame waɔ?” Anomanta, ba kpɔɔ dɛɛ bol waa ŋɔ, “Sɔɔl ɡe ɛ Korowii keamere la bɛl kɛɛ?”

¹³ Sɔɔl aa bol Korowii waa tonɛ la, o berɔ kaa saraha bɔr deŋɡare la ta.

¹⁴ Asɛ Sɔɔl mɛwee bɔɔ o ne o bonɔɔ la ŋɔ, “Leperaa he kaalɔ?” Sɔɔl ɡe chaŋo ŋɔ, “Keeɡore la bɔree ya kaa ɡaaɡe, asɛ yaa wola an na la ya kaa Samoɛl be.”

¹⁵ Sɔɔl mɛwee la ŋɔ, “Bol waa Samoɛl aa bol he be la baɡ mɛ.”

¹⁶ Anee Sɔɔl ŋɔ, “Samoɛl ɡelɔ ya jemɛ kɛŋɔ ba na keeɡore la.” Kɛ o ta kara dii waa Samoɛl aa bola la te baɡlɛ.

Sɔɔl lɛɛ dɛ do kɛ kooro

¹⁷ Samoɛl cheme Israel tena la bwa Korowii sie Mispa,

¹⁸ dɛ ŋɔ Korowii Israel tena aa dɛ tomɔ la ŋɔ, “Menee lawɛ heyaa le Ijipt harɛ ta, dɛ lɛ heyaa le Ijipt tena ne harɛfala nɛra baa dɛ fiiɡi heyaa nɔn ta.

¹⁹ Kɛ taraken he vɛh men Korowii haa dɛ tom mɛ, n lɛ heyaa le wahala ne wekpeɡa bwa ta la. He berɔ ŋɔ ń tɛ heyaa kooro wɛɛ tɔ he sie. Anomanta, he bwa ba cheme n sie deenaa ta.”

²⁰ Samoɛl aa ɡela Israel deene bwa ba cheme la, Bɛnjamen dea tenaa Korowii lawɛ.

²¹ O berɔ ɡel Bɛnjamen dea nɛra ba o sie lolanar ta, asɛ Korowii lawɛ Matri lolanar. A habɔɔ la, Sɔɔl waa ɛ Kes bibaa laanee Korowii lawɛ, kɛ baa nyiŋa la dɛ Sɔɔl toole ba bini.

²² Anee ba ka bɔɔ le Korowii be ŋɔ, “Sɔɔl ta bonɔ balɛ mɔɔ kɛɛ?” Asɛ Korowii ŋɔ, “O sɔh bone la habɔɔ.”

²³ Ate, ba chwa ka kpɔɔ ba, dɛ o cheɡɛ nɛra bini, dɛ kpeɡ ɡwaa ba bwa.

²⁴ Samoɛl ŋɔ nɛra la bwa be ŋɔ, “Kɛ he bwa na nɛn Korowii aa leo kenɛ? Ya bini bɛlbwa toole dɛ do kɛ on.” Anee nɛra la bwa moo ŋɔ, “Kórowii tɛ kooro mkpajaŋ!”

²⁵ Samoɛl kure kara mun mmarare baɡle nɛra la. O chwera do tɔn bini dɛ kpɔ ka bil Korowii sie bela. Asɛ Samoɛl ta ba ŋwɛnɛ, bɛlbwa kaa bela waa lea ba.

²⁶ Sɔɔl ɡe berɔ kaa Gebea bela waa soɡa. Korowii ɡelɔ laa tena baa kpeɡa sie lɛ o nɛ, asɛ ba teŋɛ o nɛɛ kaa.

²⁷ Kɛ nɛnchɔɡa bane ɡe ŋɔ, “Ɛrɛɛ nɛn waa do ken ɡe ɛɛ ba wona lɛ yaa ɔ?” Ba haoh dɛɛ nyiŋi o nyubaah, ba ta on koŋkɛɛla bɛlbwa ba tɛɛ. Sɔɔl ɡe ta ba waa la kpɔe ɛ wobɛlbwa.